مينسك قالاسىنداعى بەلورۋسسيا مەملەكەتتىك مادەنيەت جانە ونەر ۋنيۆەرسيتەتىندە «فولكلور: تانىم, قابىلداۋ, ساقتاۋ پروبلەمالارى» تاقىرىبىندا حالىقارالىق عىلىمي كونفەرەنتسيا ءوتتى.
بەسىنشى رەت شاقىرىلعان فورۋمعا بەلورۋسسيا, قازاقستان, رەسەي, پولشا, ليتۆا مەملەكەتتەرىنىڭ وكىلدەرى قاتىستى. قازاقستان اتىنان اقمولا وبلىستىق فيلارمونياسىنىڭ «ايناكول» فولكلورلىق انسامبلى ەتنوگرافيالىق مادەنيەتتى ساقتاۋ, زەرتتەۋ جانە قابىلداۋ ماسەلەلەرىنە قاتىستى اتقارىلىپ جاتقان ىستەرمەن تانىستىرۋ قۇرمەتىنە يە بولدى. انسامبل جەتەكشىسى رۋسلان قويشىباەۆ ءوز بايانداماسىندا قازاق فولكلورىنىڭ رۋحاني ماڭىزى جايىندا اڭگىمەلەپ, ۇلتتىق مۋزىكا اسپاپتارىنىڭ ەرەكشەلىگىن تالداپ كورسەتتى.
گالا-كونتسەرتتە قازاق كومپوزيتورلارىنىڭ ەڭ ۇزدىك شىعارمالارى ورىندالىپ, دارقان دالامىزدىڭ, قازاق جەرىنىڭ جۇرەك سوعىسى ەستىلىپ تۇردى. جۇرتشىلىق, اسىرەسە, ابىلاي حاننىڭ «قارا جورعا», اقان سەرىنىڭ «بالقاديشا», ە.ۇسەنوۆتىڭ «سىرلى كوكشە» شىعارمالارىنا ايرىقشا قۇرمەت كورسەتتى.
ەتنواۋىلداعى كورمەدە قازاق ونەرى مەن كونە مۋزىكالىق اسپاپتارىنا دەن قويۋشىلار كوپ بولدى.
باقبەرگەن امالبەك,
«ەگەمەن قازاقستان»
اقمولا وبلىسى