كەشە اقوردادا مەملەكەتتىك حاتشى گۇلشارا ابدىقالىقوۆا سانكت-پەتەربۋرگ قالاسىنداعى «يسااكي سوبورى» مەملەكەتتىك ەسكەرتكىش-مۋزەيىنىڭ ديرەكتورى, رەسەي فەدەراتسياسىنىڭ حالىق ءارتىسى نيكولاي بۋروۆپەن كەزدەستى. كەزدەسۋگە قازاقستان رەسپۋبليكاسى پرەزيدەنتى كەڭسەسىنىڭ باستىعى ماحمۇت قاسىمبەكوۆ پەن قازاقستان رەسپۋبليكاسىنىڭ تۇڭعىش پرەزيدەنتى مۇراجايىنىڭ ديرەكتورى الما ساعىنعالي قاتىستى.
كەزدەسۋ بارىسىندا مەملەكەتتىك حاتشى قازاقستان ەكى ەلدىڭ مادەني-گۋمانيتارلىق ىنتىماقتاستىعىنا زور ءمان بەرەتىنىن ايتتى. سونداي-اق, گ.ابدىقالىقوۆا تۇڭعىش پرەزيدەنت مۇراجايى مەن «يسااكي سوبورى» ەسكەرتكىش-مۋزەيىنىڭ حالىقتى, ەڭ اۋەلى وسكەلەڭ ۇرپاقتى تاريحي جانە رۋحاني تاربيەلەۋدىڭ بىرىڭعاي جۇيەسىن قالىپتاستىرۋ ىسىندەگى تابىستى سەرىكتەستىگىنە جوعارى باعا بەردى.
سونىمەن قاتار, كەزدەسۋدە 2015 جىلى سانكت-پەتەربۋرگتە وتكەن, نۇرسۇلتان نازارباەۆتىڭ بىرەگەي كوشباسشىلىعىمەن قول جەتكىزىلگەن ەلىمىزدىڭ جەتىستىكتەرىن پاش ەتۋگە باعىتتالعان «قازاقستان جولى» اتتى كوشپەلى كورمە ءتيىمدى ىنتىماقتاستىقتىڭ جارقىن ۇلگىسى ەكەندىگى ايتىلدى. ودان بولەك, تاراپتار رۋحاني-مادەني سالاداعى جاھاندىق سىن-قاتەرلەرگە قاراماستان, قازاقستان مەن رەسەيدىڭ ازاماتتىققا جانە پاتريوتيزمگە, عاسىرلار بويى قالىپتاسقان تاتۋ كورشىلىك پەن وداقتاستىق داستۇرگە نەگىزدەلگەن ستراتەگيالىق سەرىكتەستىك قاعيداتتارىنا ادالدىق رۋحىندا تاربيەلەۋ ىسىندەگى باسىمدىقتارى جان-جاقتى كەڭەيە تۇسەتىنىنە سەنىم ءبىلدىردى.
گ.ابدىقالىقوۆا بىرلەسكەن جوبالاردى الداعى ۋاقىتتا مۋزەيلەر اراسىنداعى ىنتىماقتاستىق پەن كەڭ اۋقىمدى قوعامدىق ۇنقاتىسۋ نەگىزىندە جۇزەگە اسىرۋ مادەني مۇرانى ناسيحاتتاۋعا, پوليەتنوستىق قوعامدارىمىزداعى ازاماتتىق سانانى تاربيەلەۋگە سەپتىگىن تيگىزەتىنىنە سەنىممەن قارايتىنىن جەتكىزدى. سونداي-اق, مەملەكەتتىك حاتشى «يسااكي سوبورى» ەسكەرتكىش-مۋزەيىنىڭ ديرەكتورى ن.بۋروۆقا قازاقستان-رەسەي مادەني-گۋمانيتارلىق ىنتىماقتاستىعىن نىعايتۋ جانە دامىتۋ جولىندا تابىس تىلەدى.
ءوز كەزەگىندە باق وكىلدەرىنە بەرگەن سۇحباتىندا ن.بۋروۆ استاناعا ساپارى حالىقارالىق مۋزەي كۇنى اياسىندا ءوتىپ وتىرعانىن ايتا كەلىپ: «بۇگىن الەمنىڭ كوپتەگەن مۋزەيلەرىندە اشىق ەسىك كۇنى ۇيىمداستىرىلادى. اتالعان ءىس-شارالار قازاقستانداعى استانا, الماتى سىندى ءىرى قالالاردا دا وتەتىنى ءسوزسىز. ءبىز سونداي مادەني شاراعا ءوز ۇلەسىمىزدى قوسۋ ءۇشىن ارنايى كەلدىك. ساپار بارىسىندا استانادا ەكى كورمە جانە ءبىزدىڭ مۋزەي جانىنداعى كامەرالىق حوردىڭ قاتىسۋىمەن وتەتىن ەكى كونتسەرتتىك باعدارلاما ۇيىمداستىرامىز. وسىلايشا, ءبىز ەكىجاقتى رۋحاني قارىم-قاتىناستىڭ نىعايا تۇسۋىنە مۇددەلى ەكەنىمىزدى جەتكىزگىمىز كەلەدى», – دەدى.
بۇدان باسقا, رەسەيدەن كەلگەن مەيمان استاناداعى ءار عيمارات شاھاردىڭ ءسانىن كەلتىرىپ تۇرعانىنا ءمان بەرىپ, ەلوردامىزدى بىرەگەي, تاڭعاجايىپ مۋزەي قالاعا تەڭەدى. سونداي-اق, ول بۇل جاعىنان قازاقستاننىڭ باس قالاسى مەن سانكت-پەتەربۋرگتىڭ ۇقساستىقتارى كوپ ەكەنىنە نازار اۋداردى.
ءوز كەزەگىندە ا.ساعىنعالي اتالعان ءىس-شارالار قازاقستان مەن رەسەي اراسىنداعى دوستىق, ساياسي جانە مادەني قارىم-قاتىناستىڭ ىرگەسىن بەكىتە تۇسەتىنىن اتاپ ءوتتى. بۇدان بولەك, وسى باعىتتاعى جۇمىستاردىڭ قارقىنى كۇشەيەتىنىن دە تىلىنە تيەك ەتتى.
ەلامان قوڭىر,
«ەگەمەن قازاقستان»
سۋرەتتى تۇسىرگەن
ەرلان وماروۆ