الماتىدا ورتالىق قالالىق قلينيكالىق اۋرۋحانانىڭ كونفەرەنتس-زالىندا قالالىق دەنساۋلىق ساقتاۋ باسقارماسىنىڭ ۇيىمداستىرۋىمەن حالىقارالىق مەدبيكەلەر كۇنىنە ارنالعان سالتاناتتى ءىس-شارا ءوتتى. بيىل مەدبيكە ءىسىنىڭ نەگىزىن سالۋشى انگليالىق مەدبيكە فلورەنس نايتينگەيل تۋعانىنا 196 جىل تولىپ وتىر. تورتكىل دۇنيەدە اتالىپ ءوتىپ جاتقان بيىلعى شارا «مەدبيكەلەر – حالىقتىڭ مەديتسينالىق كومەككە دەگەن قولجەتىمدىلىگىن ارتتىرىپ, ادىلدىك ءۇشىن قىزمەت ەتەدى!» ۇرانىمەن وتۋدە. قازىرگى تاڭدا قازاقستاندا 26 مەملەكەتتىك جانە 37 جەكە مەديتسينالىق كوللەدجدە جىل سايىن ورتا ەسەپپەن 12 مىڭعا جۋىق ورتا بۋىن مەدقىزمەتكەر دايىندالادى. بۇگىندە ەلىمىزدە ورتا مەدپەرسونال سانى شامامەن 160 مىڭ بولسا, ونىڭ 10 مىننان استامى تەك الماتى قالاسىندا دەنساۋلىق كۇزەتىندە.
ەلىمىزدىڭ مەملەكەتتىك ساياساتتىندا العاشقى باسىمدىق حالىق دەنساۋلىعىن قورعاۋعا باعىتتالعان. حالىققا كورسەتىلەتىن مەديتسينالىق كومەكتىڭ ساپاسى – ونىڭ ۋاقتىلى كورسەتىلۋى, الدىن الۋ شارالارىنىڭ, ەمدەۋ مەن قايتا قالپىنا كەلتىرۋدىڭ دۇرىستىعى ارقىلى بەلگىلەنسە, بۇل كومپونەنتتەردىڭ ءساتتى جۇزەگە اسىرىلۋىنىڭ نەگىزى – مەدبيكەنىڭ ەڭبەگى, ونىڭ كاسىبي شەبەرلىگى بولىپ تابىلادى. بۇگىنگى كۇنى مەدبيكە مامانداردىڭ الەۋمەتتىك ميسسياسى ىزگىلىك جانە مەيىرىمدىلىكپەن عانا شەكتەلمەيدى, ولاردىڭ حالىق دەنساۋلىعىن ساقتاۋدا, مەديتسينالىق كومەكتىڭ قولجەتىمدىلىگى مەن وڭتايلىلىعىن ارتتىرۋدا ماڭىزدى ورنىمەن بەلگىلەنەدى.
قوعامنىڭ ەڭ باستى بايلىعى – ادام دەنساۋلىعى دەسەك, وسى قۇندىلىقتى ساقتاۋدا سىزدەردىڭ ۇلەستەرىڭىز زور! – دەپ جيىندى اشىپ, كوبىنە كوپ ەلەنە بەرمەيتىن مەدبيكە ءىسىنىڭ قيىندىعى مەن جاۋاپكەرشىلىگىنە توقتالعان دەنساۋلىق ساقتاۋ باسقارماسىنىڭ باسشىسى ءۋاليحان احمەتوۆ بىرقاتار ەرەن ەڭبەگىمەن كوزگە تۇسكەن ەڭبەك مايتالماندارىن الماتى قالاسى اكىمدىگى مەن قالالىق دەنساۋلىق ساقتاۋ باسقارماسىنىڭ العىس حاتتارىمەن ماراپاتتادى.
ءبىر ايتا كەتەرلىگى, اتالمىش مەرەكە قارساڭىندا قالانىڭ مەدبيكە ماماندارى اراسىندا ۇزدىكتەردى انىقتاۋدا ءداستۇرلى تۇردە «ۇزدىك مامان-2016» كاسىبي قالالىق بايقاۋ وتكىزىلەدى. بيىل قاتىسقان 25 ۇمىتكەردىڭ اراسىنان سايىس جەڭىمپازدارىن ەلىمىزدىڭ مەديتسينا سالاسىنىڭ ارداگەرلەرى گۇلشارا عازيزقىزى مەن ابابكوۆا مايا الەكساندروۆنا «ۇزدىك مەيىربيكە», «بمسك ۇزدىك مەيىربيكەسى», «ۇزدىك اكۋشەر» جانە «ۇزدىك فەلدشەر» نوميناتسيالارى بويىنشا ماراپاتتاپ, اقشالاي, زاتتاي سىيلىقتار تاپسىردى.
بيىلعى مەرەكەنىڭ ەرەكشەلىگى دەسەك بولادى – اۋرۋحانا الدىندا قاتىسۋشىلار مەن قوناقتاردى الماتى مەديتسينا كوللەدجىنىڭ جۇزگە تارتا ستۋدەنتى فلەش-موبپەن قارسى الىپ, دالىزدە وقكا-نىڭ مەدبيكەلەرى ءار قاتىسۋشىعا گۇل شوعىن سىيلادى.
گۇلزەينەپ سادىرقىزى,
«ەگەمەن قازاقستان»