ساپاسىز تاۋاردىڭ قۇنىن قايتاردى

البەتتە, ءار تۇتىنۋشى ءوزىنىڭ زاڭدى قۇقىعىن قورعاۋدى جەتىك بىلە مە؟ ارينە, ءبارى بىردەي دەمەسەك تە, كەيبىرى كۇندەلىكتى كۇيبەڭ تىرلىكتىڭ قامىمەن ءجۇرىپ, كوبىنەسە ساتىپ العان تاۋارى ساپاسىز بولسا دا, قولىن ءبىر سىلتەپ جۇرە بەرەدى. دەگەنمەن, اتىراۋلىق تۇتىنۋشىنىڭ ءبىرى ساپاسىز تاۋارعا تولەگەن اقشاسىن قايتارۋ ءۇشىن سوتقا جۇگىندى. ويتكەنى, تۇتىنۋشى «كازوبۋۆ» جشس دۇكەنىنەن قۇنى 21 525 تەڭگەگە باعالانعان قىسقى اياق كيىم ساتىپ العان. الايدا, ءۇش كۇننەن كەيىن ساتىپ العان قىسقى اياق كيىمنىڭ ىڭعايسىز قالپىنىڭ كەسىرىنەن جۇرگەن كەزدە اياقتا قولايسىزدىق پايدا بولعان. سونىڭ سالدارىنان توبىعى العا قاراي جىلجىپ, ەكى اياعىنىڭ باشپايلارى بۇگىلە بەرگەن. وسىدان كەيىن تۇتىنۋشى دۇكەنگە جارامسىز اياق كيىمدى تاپسىرۋ ءۇشىن كەلىپتى. الايدا, دۇكەن مەڭگەرۋشىسى تاۋارعا تولەنگەن اقشانى قايتارۋدان باس تارتقان. ماڭدايى تاسقا سوعىلعانداي كەيىپكە تۇسكەن تۇتىنۋشى ءوز قۇقىن سوت ارقىلى قورعاۋعا قادام جاسادى.  سويتىپ, سوت ارقىلى تالاپ قويۋشىعا اينالعان تۇتىنۋشى «تۇتىنۋشىلاردىڭ قۇقىقتارىن قورعاۋ تۋرالى» زاڭنىڭ 14-بابىمەن بەلگىلەنگەن 14 كۇن ىشىندە تاۋاردى قايتارۋعا نيەت بىلدىرگەن. سوت, تالاپ قويۋشىنىڭ پايداسىنا «كازوبۋۆ» جشس-نەن ساپاسىز تاۋارعا تولەنگەن 21 525 تەڭگەنى, 12 485 تەڭگە كولەمىندەگى ايىپپۇلدى, بۇعان قوسا, 20 000 تەڭگە مورالدىق زيان وتەماقىسىن جانە سوت شىعىندارىن, ءسويتىپ, بارلىعى 65 087 تەڭگە ءوندىرىپ بەردى. جولداسبەك شوپەعۇل, «ەگەمەن قازاقستان» اتىراۋ