وقۋشىلاردىڭ تاۋەلسىزدىككە سىيى وسىنداي
شىمكەنت قالاسىنداعى №89 مەكتەپ-ليتسەيدىڭ وقۋشىلارى ەل تاۋەلسىزدىگىنىڭ 25 جىلدىعىنا وراي وبلىس ورتالىعىنا 25 مىڭ ءتۇپ گۇل سىيلادى. كوزدىڭ جاۋىن الاتىن جىلىجايدا وسىرىلگەن نەشە ءتۇرلى گۇلدەر قالانىڭ كوركىنە كورىك بەرىپ, اجارىن اشتى.
مەكتەپ جانىندا جاس جەتكىنشەكتەرگە ارنالعان ەكولوگتار ۇيىرمەسى بار. قورشاعان ورتانىڭ سىرىن ءبىلۋ ءۇشىن مۇندا ءبىلىم الىپ جاتقان وقۋشىلار از ەمەس. جىلىجاي وسىدان ءتورت جىل بۇرىن دەمەۋشىلەردىڭ كومەگىمەن سالىنعان. سودان بەرى جاسوسپىرىمدەر وسى جەردە كوز قىزىقتىراتىن ءتۇرلى گۇلدەر وسىرۋمەن اينالىسىپ كەلەدى.
سولاردىڭ ءبىرى – اتالعان ءبىلىم وشاعىنىڭ وقۋشىسى جانسايا ماحمۇدوۆا. ول جىلىجاي اشىلعالى بەرى شىرايگۇل ءتۇرىن ءوسىرىپ, ونىڭ جەتىلۋىن زەرتتەپ ءجۇر. ايتۋىنشا, وسىمدىكتىڭ بۇل ءتۇرى ىستىققا ءتوزىمدى ءارى تىڭايتقىشتى اسا كوپ قاجەت ەتپەيدى. تەك ۋاقىتىندا سۋارىپ تۇرۋ كەرەك. سونىمەن قاتار, توزاڭداندىرۋ ارقىلى ونىڭ ءتۇرىن ءوزگەرتۋگە دە بولاتىن ەرەكشە قىرىن اتاپ ءوتتى.
– جۇمىسىمىزدىڭ بارىسىندا ءبىر شاي قاسىق كولەمىنە شامامەن 25 مىڭ دانا تۇقىم سىياتىنى انىقتالدى. ەرتە كوكتەمدە ارنايى جاشىكتەردى دايىنداپ, وعان بيوگۋمۋس پەن توپىراقتى ارالاستىرىپ وتىرعىزىپ الامىز. وسىدان كەيىن 10-12 كۇندە كوشەت كۇيىنە جەتەدى, بۇدان سوڭ سيرەتۋ ادىسىمەن ستاكاندارعا ورنالاستىرامىز. بۇل شامامەن 1-2 اي ۋاقىت الادى, – دەيدى جانسايا.
قازىر مەكتەپ اۋلاسى كورگەن ادامنىڭ نازارىن ەرىكسىز تارتادى. وقۋشىلار جىلىجايدا وسىرگەن گۇلدەرىن وسى جەرگە اكەلىپ وتىرعىزادى. شاعىن عانا جىلىجايدا جۇزدەگەن ءتۇپ گۇل ءوسىپ تۇر. ونىڭ باسىم بولىگىن مەكتەپتەرگە, بالاباقشالارعا جانە سوعىس ارداگەرلەرىنىڭ ۇيىنە تەگىن وتىرعىزىپ بەرۋ داستۇرگە اينالعان.
– وقۋشىلارىمىز تەك گۇل وسىرۋمەن عانا شەكتەلىپ قالماي, سايالى وسىمدىكتەردى, جەمىس اعاشتارىن تۇقىمىنان جانە قالامشادان كوبەيتۋ ادىستەرىن ۇيرەنۋدە. وسى ارقىلى ەڭبەككە باۋليمىز. قازىر وقۋشىلارىمىز ساباقتان تىس ۋاقىتتارىن پايدالى نارسەگە جۇمسايدى, – دەيدى گەوگرافيا ءپانىنىڭ مۇعالىمى بازاركۇل جاباەۆا.
وقۋشىلاردىڭ ەندىگى ماقساتى – قالانىڭ گۇلدەنۋىنە سەپتىگىن تيگىزۋ. قالا بويىنشا, 1 ميلليوننان استام گۇل كوشەتىن وتىرعىزۋ جوسپارلانسا, №89 مەكتەپتىڭ جىلىجايىندا 30 مىڭ ءتۇپ گۇل دايىن تۇر.
باقتيار تايجان,
«ەگەمەن قازاقستان»
شىمكەنت