استانا. 16 مامىر. وڭتۇستىك كورەيا بيلىگى Nissan Motor اۆتوونەركاسىبىنە جىبەرگەن كەمشىلىكتەرى ءۇشىن 300 ميلليون ۆون (280 مىڭ دوللار) كولەمىندە ايىپپۇل سالىپ, Qashqai ۇلگىسىندەگى كولىكتەردىڭ شىعارىلۋىنا تىيىم سالماق. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
«ءبىز Nissan كومپانياسىنا قورشاعان ورتاعا تارايتىن قالدىقتاردى ازايتىپ كورسەتەتىن قۇرىلعى ورناتقانى ءۇشىن وسىنداي كولەمدە ايىپپۇل سالۋدى جوسپارلاپ وتىرمىز. ال Qashqai كولىكتەرىنىڭ شىعارىلۋى توقتاتىلادى. سونىمەن قاتار, وتكەن جىلدىڭ قاراشا ايىنان بەرى شىققان اۆتوماشينالار كەرى قايتارىلادى», – دەدى وڭتۇستىك كورەيانىڭ قورشاعان ورتانى قورعاۋ مينيسترلىگى.
اتالعان مينيسترلىكتىڭ مالىمدەۋىنشە, اۆتوكونتسەرننىڭ پرەزيدەنتىنە قاتىستى قىلمىستىق ءىس قوزعالۋى مۇمكىن. بيلىك جاپونيالىق اۆتوكونتسەرنگە اقاۋلى كولىكتەردى جوندەۋدەن وتكىزۋگە 45 كۇن ۋاقىت بەردى.
ايتا كەتەيىك, 2015 جىلى ءدال وسىنداي ماسەلەگە Volkswagen اۆتوكونتسەرنى دە تاپ بولعان. كومپانيا باسشىلىعىنا ەۋروپانىڭ, ازيانىڭ بىرقاتار ەلدەرى ءىرى كولەمدە ايىپپۇل سالىپ, كومپانيانى سوتقا بەردى. مالىمەتتەر بويىنشا, الەمدە 11 ميلليونعا جۋىق كولىكتە قورشاعان ورتاعا تارايتىن قالدىقتار كورسەتكىشىن ازايتىپ كورسەتەتىن قۇرىلعى ورناتىلعانى انىقتالدى. ال وسى ولقىلىقتىڭ ورنىن تولتىرۋ ءۇشىن Volkswagen جالپى كولەمى 16,2 ميلليارد دوللارعا شىعىندالدى.
ايان ءابدۋالي.
دەرەك, فوتو: تاسس.