قىمىزدان بالمۇزداق جاساۋ جوباسى الەمدىك كۋبوككا جولداما الدى

پاۆلودار. 12 مامىر. بۇعان دەيىن س. تورايعىروۆ اتىنداعى پاۆلودار مەملەكەتتىك ۋنيۆەرسيتەتى كومانداسىنىڭ بۇل جوباسى Enactus Kazakhstan National EXPO 2016 ستۋدەنتتىك جاستاردىڭ الەۋمەتتىك جانە بيزنەس-جوبالارىنىڭ رەسپۋبليكالىق بايقاۋىندا جەڭىمپاز اتاندى. بۇل تۋرالى egemen.kz ءتىلشىسى حابارلادى. ءبىلىم جانە عىلىم مينيسترلىگى مەن پرەزيدەنت جانىنداعى جاستار ساياساتى جونىندەگى كەڭەستىڭ قولداۋىمەن وتكەن بايقاۋعا ەلىمىزدىڭ جوعارى وقۋ ورىندارىنان 42 كوماندا قاتىستى. ۋنيۆەرسيتەت كومانداسى ەكونوميكالىق, ەكولوگيالىق, الەۋمەتتىك ماسەلەلەردى شەشۋگە باعىتتالعان ءىس جۇزىندە جۇمىس جاساپ جاتقان 4 جوبا ۇسىندى. «قازاقستاندى قالاي تاماقتاندىرۋعا بولادى؟» بيزنەس-جوبالار بايقاۋىندا ستۋدەنتتەر قىمىزدان جاسالعان بالمۇزداق يدەياسى ءۇشىن 1 ميلليون تەڭگەگە يە بولدى. Enactus PSU كومانداسىنىڭ كاپيتانى ارناگۇل بۇركۇتتىڭ ايتۋىنشا, ستۋدەنتتەر ۋنيۆەرسيتەت قابىرعاسىندا العان تەوريالىق ءبىلىمى مەن كاسىپكەرلىك قابىلەتتەرىن تاجىربيەدە قولدانادى. ول: «كوماندانىڭ ءاربىر مۇشەسى ەلىمىزدىڭ ەكونوميكاسى مەن مادەنيەتىنىڭ دامۋىنا ءوز ۇلەستەرىن قوسىپ كەلەدى. ءبىزدىڭ يدەيالار عالامدىق يدەيا», – دەيدى. ۋنيۆەرسيەت كومانداسى جەڭىمپاز رەتىندە بيىل قازان ايىندا تورونتو قالاسىندا (كانادا) وتەتىن Enactus 2016 الەمدىك كۋبوگىندا ەلىمىزدىڭ اتىنان قاتىسادى. فاريدا بىقاي. دەرەك, فوتو: egemen.kz.