استانادا ۇرلىق جاساعان كۇدىكتى اۋىلدا ۇستالدى

قوستاناي. 11 مامىر. قوستاناي وبلىسىنىڭ دەنيسوۆ اۋدانىنان ىزدەۋدە جۇرگەن قىلمىسكەر ۇستالدى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. دەنيسوۆ اۋدانىنداعى جەرگىلىكتى پوليتسيا قىزمەتكەرلەرى, ۋچاسكەلىك ينسپەكتورلار داۋرەن ىسقاقوۆ پەن باعدات كەنەشەۆ شىعىنى ونداعان ميلليون تەڭگە تۇراتىن اسا ءىرى كولەمدە ۇرلىق جاساعان كۇدىكتىنى ۇستادى. ەكى ينسپەكتور قاشقان ونى قۋىپ ۇستاپ الۋ ءۇشىن ەگىندىك القاپپەن 3 شاقىرىمداي جۇگىرىپ وتىردى. ينسپەكتور داۋرەن ىسقاقوۆ: «مەرەكەدە اۋدانداعى ەلدى مەكەندەردەگى ءتارتىپتى كۇشەيتكەنبىز. ءبىز ارىپتەسىم ەكەۋمىز تاران مەن دەنيسوۆ اۋداندارىنىڭ شەكاراسىندا ورنالاسقان پەرەلەسكي اۋىلىندا ءتارتىپتى قاداعالادىق. ءبىز پوسەلكەگە كىرىپ كەلە جاتقاندا الدىمىزدان قارسى شىققان ماشينادان ەر ادامدى بايقاپ قالدىق. ءتۇرى ىزدەۋ سالىنعان قىلمىسكەرگە ۇقساپ كەتتى. ءبىز ماشينانى توقتاتتىق, وعان جاقىنداي بەرگەندە الگى كىسى ماشينادان سەكىرىپ ءتۇستى دە قاشا جونەلدى», – دەدى. كۇدىكتى جەرگىلىكتى تۇرعىن, جەردىڭ وي-شۇقىرىن جاقسى بىلەدى. ول پوسەلكەنىڭ شەتىنە دەيىن باردى دا, ەگىن القابىنا ءتۇسىپ قاشتى. ەكى ۋچاسكەلىك ينسپەكتور جاياۋ ارتىنان قۋىپ وتىردى, ءبارىبىر ۇستالدى. ۇستالعان ادام شىندىعىندا استانادا, دەنيسوۆ اۋدانىندا ءىرى ۇرلىقتار جاساپ, قاشىپ جۇرگەن, استانا قالالىق ىشكى ىستەر دەپارتامەنتى ىزدەۋ سالعان قىلمىسكەر بولىپ شىقتى. قازىر ول قاماقتا وتىر, سوتقا دەيىنگى تەرگەۋ امالدارى ءجۇرىپ جاتىر. ءنازيرا جارىمبەتوۆا. دەرەك, فوتو: قوستاناي وبلىستىق ىشكى ىستەر دەپارتامەنتىنىڭ ءباسپاسوز قىزمەتى.