«جەتىنشى ارنا» جاڭاشا جۇمىس ىستەمەك

جۋىردا وتاندىق «جەتىنشى ارنا»  تەلەارناسىنىڭ باسشىلىعى ءباسپاسوز ءماسليحاتىن وتكىزىپ, ويىن-ساۋىق باع­دارلامالارىن دايىندايتىن الەمدىك جە­تەكشى ۇيىم – Endemol كومپانيا­سىنىڭ ستراتەگيالىق ارىپتەسى «ۆايت مەديا» كومپانياسىمەن ۇزاق مەرزىمدى كەلىسىم جاساعاندارى جونىندە حا­بار­لادى. وسى كەلىسىم بويىنشا  «جەتىنشى ارنانىڭ» جالپى ستراتەگياسى مەن حابار تاراتۋ مانەرىندە وزگەرىس­تەر بولماق. سونداي-اق, «جەتىنشى ارنا» ءوزىنىڭ لوگوتيپىن, فيرمالىق ءستيلىن وزگەرتىپ, اۋقىمدى رەسپۋبليكالىق جارناما ناۋ­قانىن وتكىزەدى. ماقساتى مىنا­داي: «جەتىنشى ارنامەن بىرگە وزگەرەتىن كەز كەلدى». بۇل دەگەنىڭىز, الەمدىك ستان­دارتقا سايكەس قۇرىلىم تاڭداعان تەلەارنا ءوز  كورەر­مەندەرىنىڭ دە سول دەڭگەيدە بولعانىن قالايدى دەگەن ءسوز. «جەتىنشى ارنا» ديرەكتورلار كە­ڭەسى­نىڭ ءتورايىمى بيبىگۇل جەكسەن­بايدىڭ ايتۋىنشا, «ۆايت مەديا», سول ارقىلى Endemol-مەن ارىپتەستىك «جەتىنشى ارنانىڭ» دامۋ تۇجىرىم­داما­سىنا ەنگىزىلگەن ءساتتى باستاما. «ەندى ەفيرگە 80 پايىز جاڭا كونتەنت شىعادى. بۇل قازاق­ستاندىق رىنوكقا جولداما العان سۋ جاڭا باعدارلامالار بولماق, ال ەلىمىز ءۇشىن ارنايى دايىندالاتىن تەلەجوبا­لاردى دا وسى جىلى كورسەتە باستايمىز. تەلەكونتەنت ءوندىرىسى ەلىمىزدە ەندى عانا دامي باستادى. ۇلتتىق فيلمدەر مەن باعدار­لا­مالاردىڭ ۇلەسى اسا ءىرى تەلەارنالار ەفيرىنىڭ 20 پا­يىزىنا دا جەتە المايدى. سوندىقتان ءبىز تەلەوندىرىس سالاسىندا ساراپتاما ءجۇر­گىزۋ شەبەرلىگىن مەڭگەرگەن جانە جوبالاردى ەفيرگە شى­عارۋدىڭ ءار­تاراپتاندىرىلعان پورتفەلىن يەلەنگەن سەنىمدى ارىپتەستەرمەن ۇزاق مەرزىمدى كەلىسىم جاساۋعا شەشىم قابىل­دادىق» – دەيدى بيبىگۇل جەكسەنباي. «جەتىنشى ارنا» بىزگە سەرىكتەس بولۋ ارقىلى 2011 جىلعا جوسپارلاپ وتىرعان جاڭا جوبالارىمىزعا قول جەتكىزىپ وتىر. سونداي-اق, «ۆايت مەديا» ەندى تۇڭعىش رەت ۇلتتىق تەلە­ونىم جاساۋعا ارالاسادى. كورەرمەن­نىڭ ءوز وتانىنىڭ, ءوز ۇلتىنىڭ كونتەنتىنە قىزىعۋشى­لىعى الەمدىك ءۇردىس بولىپ تابىلادى. ماسەلەن, رەسەيدە جەرگىلىكتى تەلەونىم­دەردىڭ ۇلەسى اسا جوعارى دەڭگەيدە, ياع­ني 80 پايىزعا جۋىق. ال, قازاق­ستانعا ونداي كور­سەتكىشكە جەتۋ ءۇشىن ءبىراز ۋاقىت كەرەك»-دەدى «ۆايت مەديا­نىڭ» باس پروديۋسەرى تيمۋر ۆاينشتەين. ال, Endemol Group باس ديرەكتورى مارينا ءۋليامستىڭ سوزىنە سەنسەك, ورتا­لىق ازيانىڭ, ونىڭ ىشىندە قازاق­ستان­نىڭ تەلەۆيزيالىق رىنوگى وتە تار­تىم­دى. ءوسۋ قارقىنى جاعىنان ءبىز ەۋرو­پالىق رىنوكتان 50 پايىز الدا كەلەدى ەكەنبىز. «الايدا, الەمدىك تەلە­ۆيزيا­لىق رىنوك­تىڭ ويىنشىلارى ءۇشىن قازاق­ستان ءالى دە تولىق يگەرىلمەگەن اۋماق بولىپ قا­لىپ وتىر. سوندىقتان جاس ءارى قار­قىندى دامىپ كەلە جاتقان «جەتىنشى ارنامەن» ارىپتەستىك ورناتۋ, مەنىڭ ويىم­شا, بارلىق قازاقستاندىق رىنوك ءۇشىن ەلەۋلى وقيعا ءارى ساپالى تەلەحابار تاراتۋدىڭ جاڭا دەڭگەيىنە كوشۋ» – دەيدى ول. ايگۇل سەيىلوۆا.