سەرىكتەستىكتىڭ جاڭا كەزەڭى

جاقىندا 2015 جىلعى 21 جەلتوقساندا قول قويىلعان قازاقستان مەن ەۋروپالىق وداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمىنىڭ (كاىك) كەيبىر ەرەجەلەرىنىڭ ۋاقىتشا قولدانىلۋى باستالدى. 2016 جىلعى 25 ناۋرىزدا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ كەلىسىمدى راتيفيكاتسيالاۋ تۋرالى زاڭعا قول قويعان بولاتىن. ەۋروپا تاراپىنىڭ رەسمي حابارلاندىرۋىنا سايكەس, ۋاقىتشا قولدانىسقا تەك ەۋروپالىق كوميس­سيا­نىڭ قۇزىرەتىنە جاتاتىن ەرەجەلەر ەنەدى. ولاردىڭ اراسىندا سىرت­قى ساياسات پەن قاۋىپسىزدىك, دەموكراتيا­لاندىرۋ جانە زاڭ ۇستەمدىگىن قام­تا­ماسىز ەتۋ, ەكونوميكالىق جانە تۇ­راقتى دامۋ, ساۋدا, ەنەرگەتيكا, كولىك, قورشاعان ورتانى قورعاۋ, اۋىل شا­رۋاشىلىعى جانە باسقا سالالار بو­يىنشا ىنتىماقتاستىق ماسەلەلەرى بار. كەلىسىم تولىق كۇشىنە ەۋرو­پالىق وداققا مۇشە بارلىق 28 مەملەكەتتىڭ ۇلتتىق پارلامەنت­تەرىندە راتيفيكاتسيالاۋدان وتكەن­نەن كەيىن ەنەدى. وعان دەيىن 1995 جىلعى قازاقستان مەن ەۋروپالىق وداق اراسىنداعى ارىپتەستىك پەن ىنتىماقتاستىق تۋرالى كەلىسىم ءوز كۇشىن ساقتايدى. قازاقستان – ەۋروپالىق وداق­پەن وسىنداي ەكىنشى بۋىنداعى كەلىسىمگە قول قويعان ورتالىق ازياداعى ءبىرىنشى مەملەكەت. جاڭا كەلىسىم ارەكەتتەستىكتىڭ شەگىن 29 سالاعا دەيىن كەڭەيتىپ, قازاقستاننىڭ دۇنيەجۇزىلىك ساۋدا ۇيىمىنا قوسىلۋىن جانە ەۋرازيالىق ەكونوميكالىق وداققا مۇشە ەل بولۋىن ەسكەرۋمەن قاتار, قازاقستان مەن ەۋرووداق ارا­سىن­داعى ساۋدا-ەكونوميكالىق جانە ينۆەستيتسيالىق ىنتى­ماق­تاس­­تىقتىڭ جاڭا مۇمكىندىكتەرىن اشادى. كەڭەيتىلگەن ارىپتەستىك پەن ىنتىماقتاستىق تۋرالى كەلىسىمگە قول قويىلۋى قازاقستان مەن ەو اراسىنداعى قارىم-قاتىناستاردى دامىتۋ مەن  نىعايتۋداعى ماڭىزدى قادام بولىپ, ىنتىماقتاستىقتىڭ جاڭا دەڭگەيگە وتكەندىگىن ايقىن­دايدى. سىرتقى ىستەر ءمينيسترى ەرلان ىدىرىسوۆ 2016 جىلعى 29 ساۋىردە «ەگەمەن قازاقستان» گازەتىندە جاريالانعان ءوزىنىڭ ماقالاسىندا اتاپ وتكەندەي, «ەۋرووداقپەن جاڭا كەلىسىم ەۋروپالىق ينستيتۋتتارمەن دە, ەۋروپا مەملەكەتتەرىمەن دە بارلىق دەڭگەيدە ءارى قاراي ىنتىماقتاسۋدى تەرەڭدەتۋدىڭ بەرىك نەگىزىن قالايدى, سونداي-اق, قازاقستاننىڭ ودان ءارى ساياسي جانە ەكونوميكالىق دامۋىنىڭ قوزعاۋشى كۇشى بولادى». «ەگەمەن-اقپارات»