قازاقستان ازىق-ت ۇلىك ونىمدەرىنىڭ دۇكەنى اشىلدى
ماسكەۋدە قازاقستان ەلشىلىگىنىڭ جانە قازاقستاننىڭ رەسەيدەگى ساۋدا وكىلدىگىنىڭ قولداۋ كورسەتۋىمەن قازاقستان ازىق-ت ۇلىك ونىمدەرىنىڭ «باۋىرساق» دەپ اتالاتىن ساۋدا جەلىلەرى دۇكەنى ەسىگىن ايقارا اشتى. بۇل بولشەك ساۋداداعى بەسىنشى ساۋدا نۇكتەسى بولىپ تابىلادى.
دۇكەننىڭ اشىلۋ سالتاناتىنا ەلشىلىكتىڭ, ساۋدا وكىلدىگىنىڭ, قازاق دياسپوراسىنىڭ وكىلدەرى ءجانە ماسكەۋ جوو-لارىندا وقيتىن قازاقستاندىق ستۋدەنتتەر قاتىستى.
«باۋىرساق» جەلىسىنىڭ قۇرىلتايشىسى ەلەنا كونداكوۆا بىلاي دەيدى: «مەن قازاقستاندا تۋىپ-وسكەنمىن. بىراق ماسكەۋدە تۇرعانىما 20 جىلدىڭ ءجۇزى بولدى. وسىندا قونىس اۋدارعالى بەرى قازاقستاندا جەگەن كەيبىر تاعامداردىڭ ءدامى اۋزىمنان كەتپەي, سول شاقتارىمدى ساعىنىشپەن ءجيى-ءجيى ەسكە الاتىنمىن. قازاقستانعا ءار بارعان سايىن وسىندا ازىق-ت ۇلىك الىپ كەلەتىنمىن. سودان سوڭ باسىما ءبىر يدەيا كەلدى, قازاقستاننىڭ ازىق-ت ۇلىكتەرىن استانادا نەگە ساتپاسقا دەگەن. اۋەلدە كورمەلەردە ساتا باستادىق, ال كەيىن تۇتىنۋشىلار ازىق-ت ۇلىكتى تۇراقتى نەگىزدە جەتكىزىپ تۇرۋدى ءوتىندى. ءسويتىپ, مىنە, ءبىز دۇكەندەر اشا باستادىق. سۇرانىس ۋاقىت وتكەن سايىن وسە ءتۇسىپ وتىر. ءبىزدىڭ باستى ەرەجەلەرىمىزدىڭ ءبىرى – تەك قانا قازاقستاننىڭ ازىق-ت ۇلىكتەرىن ساتۋ. جىلىنا ءبىزدىڭ تاۋار اينالىمىمىز شامامەن 50 ملن. ءرۋبلدى قۇرايدى. ەندى ءبىزدىڭ جوسپارىمىزدا جاڭا جەكە دۇكەندەرىمىزدى اشۋدان بولەك, بارلىق قالايتىندارعا ءبىزدىڭ ماركامىزبەن ساۋدا-ساتتىق ۇيىمداستىرۋدى ۇسىنۋ بار.
ءسوز رەتىندە ايتار بولساق, «باۋىرساق» بىرتە-بىرتە برەندكە اينالىپ كەلەدى. ادامدار ءبىزدى بۇگىندە قازاقستاننان ازىق-ت ۇلىك اكەلۋشىلەر دەپ قانا ەمەس, اتاۋىمىز بويىنشا, ياعني «باۋىرساق» دەپ ىزدەيتىن بولدى».
ەندى قازاقستان رەسپۋبليكاسىنىڭ رەسەي فەدەراتسياسىنداعى ساۋدا وكىلىنىڭ ورىنباسارى گۇلجان بودىقوۆانىڭ اڭگىمەسىنە قۇلاق تۇرەيىك. «سوڭعى كەزدەرى ەلشىلىك جانە ساۋدا وكىلدىگى تاراپتارىنان قازاقستان تاۋارلارىن رەسەي نارىعىنا ىلگەرىلەتۋ بويىنشا بەلسەندى جۇمىس جۇرگىزىلە باستادى. ءبىزدىڭ تاۋارلارىمىزدىڭ ۇلكەن سۇرانىسقا يە ەكەنىن ايتا كەتكەننىڭ ارتىقتىعى جوق. سۇرانىس پەن ساتۋ كولەمى بويىنشا وتە جاقسى سەرپىن بايقالادى. قازاقستاندىق كاسىپكەرلەرگە رەسەي نارىعىنا شىعۋدىڭ وسىنداي جاقسى مۇمكىندىگىن جىبەرىپ الماڭدار, ال ساۋدا وكىلدىگى بۇعان وڭ ىقپال ەتۋگە ءار كەز ءازىر ەكەنىن ايتقىم كەلەدى», – دەيدى گ.بودىقوۆا.
«باۋىرساق» ساۋدا جەلىسى ماسكەۋ قالاسى مەن وبلىسىنا قازاقستاننان ازىق-ت ۇلىك ونىمدەرىن جەتكىزۋمەن جانە ساتۋمەن 2012 جىلدان باستاپ اينالىسىپ كەلەدى. رەسەي نارىعىندا ءتورت جىل جۇمىس ىستەگەن كومپانيا قازاقستاننىڭ «راحات», «بايان سۇلۋ», «الماتى ءونىمى», «كونديتەرلىك بۇيىمدار», «تسەسنا», «ليا», «كەممي», «كۋبلەي», «سەمەي ەت كومبيناتى», «ومەگا دامدەۋىشتەرى», «بەلەس», «راحمەت», «يمانوۆ ونىمدەرى», «تراپەزا», تاعى باسقا, شامامەن 30 شاقتى قازاقستاندىق ءوندىرۋشىلەرمەن تابىستى ىنتىماقتاستىق قالىپتاستىرىپ ۇلگەرگەن.
ساۋلەبەك ءبىرجان
