پالۋان ەلامان ەرعاليەۆ «سىر بارىسى» اتاندى

استانا. 3 مامىر. قىزىلوردا قالاسى قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان قازاق كۇرەسىنەن وبلىستىق «التىن بەلبەۋ» جارىسىنىڭ فينالدىق كەزەڭى مارەسىنە جەتتى. بۇل تۋرالى egemen.kz ءتىلشىسى حابارلادى. «التىن بەلبەۋ» جارىسى ءبىر ايدان استام ۋاقىتقا سوزىلدى. بوز كىلەمدەگى پالۋاندار ءۇش كەزەڭ بويىنشا ءتورت جاس دەڭگەيىندە سىنعا ءتۇستى. ءبىرىنشى كەزەڭ اۋىل اراسىندا وتكىزىلىپ, وعان 5 731 سپورتشى قاتىستى. ەكىنشى كەزەڭ اۋدان, قالا اراسىندا ءوتتى. بۇل جارىستاردا 1 476 سپورتشى باق سىناسسا, فينالدىق سايىسقا 279 پالۋان قاتىستى. بارلىعى ءۇش كەزەڭگە ءبولىنىپ وتكەن جارىستا 7 486 سپورتشى كۇش سىناستى. «التىن بەلبەۋ» جارىسى وتە تارتىستى ءوتتى. ويتكەنى, ءاربىر پالۋاننىڭ بەلدەسۋگە تىڭعىلىقتى دايىندىقپەن كەلگەنى كورىنىپ تۇردى. تۇيە پالۋان سايىسىنا 19 سپورتشى قاتىستى. ولاردىڭ اراسىندا قارماقشىلىق ەلامان ەرعاليەۆ «سىر بارىسى» اتاندى. وعان «التىن بەلبەۋ» بەلدىگى مەن 1 ملن. 300 مىڭ تەڭگەنىڭ سەرتيفيكاتى تابىس ەتىلدى. «سىر ارلانى» تيتۋلىن يەلەنگەن جالاعاشتىق رۋسلان ابدىرازاقوۆقا 700 مىڭ تەڭگەنىڭ سەرتيفيكاتى بەرىلسە, «سىر سۇڭقارى» - ارالدىق نۇرىم سالىمگەرەەۆكە 400 مىڭ تەڭگەنىڭ سەرتيفيكاتى تاپسىرىلدى. جارىستا كىشى جاسوسپىرىمدەر اراسىندا جالاعاش اۋدانىنىڭ سپورتشىلارى جاقسى قىرىننان تانىلا ءبىلدى. ال جاسوسپىرىمدەر اراسىندا ارال اۋدانى مەن قىزىلوردا قالاسىنىڭ جەتكىنشەكتەرى وزدەرىنىڭ مىقتىلىقتارىن بايقاتتى. جاستار مەن ەرەسەكتەر اراسىندا قارماقشى اۋدانى, قىزىلوردا قالاسىنىڭ پالۋاندارى دا بىرنەشە جۇلدەنى يەلەندى. 3 شىلدە كۇنى استانا قالاسىندا قازاقستان رەسپۋبليكاسى پرەزيدەنتى جۇلدەسى ءۇشىن وتەتىن «قازاقستان بارىسى» رەسپۋبليكالىق تۋرنيرىنە قىزىلوردا وبلىسىنان ەلامان ەرعاليەۆ پەن رۋسلان ابدىرازاقوۆ وبلىس نامىسىن قورعايتىن بولادى. داستان كەنجالين. دەرەك, فوتو: شتاتتاعى ۇلتتىق كوماندالار جانە سپورت رەزەرۆى ديرەكتسياسى.