پەتروپاۆلدا جازۋشى گەرولد بەلگەرگە مۇراجاي اشىلدى

پەتروپاۆل. 3 مامىر. بەلگىلى جازۋشى, پۋبليتسيست, اۋدارماشى, قوعام قايراتكەرى, انا ءتىلىمىزدىڭ جاناشىرى گەرولد بەلگەردىڭ قۇرمەتىنە پەتروپاۆل گۋمانيتارلىق-تەحنيكالىق كوللەدجدە مۇراجاي بوي كوتەردى. ونىڭ اشىلۋ سالتاناتىنا ايماق باسشىسى ەرىك سۇلتانوۆ قاتىستى. بۇل تۋرالى وبلىستىق اكىمدىكتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. سولتۇستىك قازاقستان وبلىسىنىڭ اكىمى ەرىك سۇلتانوۆ ءۇش بىردەي ادەبيەتتىڭ دامۋىنا زور ۇلەس قوسقان گەرولد بەلگەر جايلى جۇرەكجاردى لەبىزىن ءبىلدىردى. ول ءوز سوزىندە گەرولد كارل ۇلىمەن ىسقاق ىبىراەۆ اۋىلىنداعى قازاق مەكتەبىندە بىرگە وقىعانىن, كوپ ءتالىم-تاربيە العانىن, جوعارعى كەڭەس دەپۋتاتى بولىپ جۇرگەندە ىنتىماقتاسا قىزمەت اتقارعانىن, مۋزەيدىڭ اشىلۋى بيىل كەڭىنەن اتاپ وتىلەتىن وبلىستىڭ 80 جىلدىعى قارساڭىنداعى ايشىقتى مادەني وقيعا ەكەنىن اتاپ ءوتتى. اباي جىرلارىن گەتە تىلىندە جىرلاتۋ ارقىلى ۇلتىمىزدى وزگەلەرگە تانىتۋدا دا ولشەۋسىز ەڭبەك ءسىڭىردى. كوللەدج ديرەكتورى الەكساندر مەركتىڭ باستاماشىلدىعىمەن قۇرىلعان مۇراجايعا جۇزگە جۋىق قۇندى ەكسپوناتتار قويىلعان. ولاردىڭ اراسىندا جازۋشىنىڭ جەكە تۇتىنعان زاتتارى, جارى مەن قىزى تابىستاعان جادىگەرلەر ەرەكشە ىستىق. توعىز تاقىرىپتىق بولىمنەن تۇراتىن مۇراجايدا شىعارماشىلىعى مەن ءومىرى جايلى الۋان سىر شەرتەتىن اقپاراتتار دا توپتاستىرىلعان. ءومىر ەسقالي. دەرەك, فوتو: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى.