سەمەي پوليگونى جابىلۋىنىڭ 25 جىلدىعى – جاھاندىق ماڭىزى بار داتا

 سەنات توراعاسى قاسىم-جومارت توقاەۆتىڭ توراعالىق ەتۋىمەن سەمەي يادرولىق سىناق پوليگونىنىڭ جابىلۋىنىڭ 25 جىلدىعىنا ارنالعان «يادرولىق قارۋسىز الەم قۇرۋ» تاقىرىبى بويىنشا حالىقارالىق كونفەرەنتسياعا دايىندىق جانە ونى وتكىزۋ جونىندەگى ۇيىمداستىرۋ كوميتەتىنىڭ العاشقى وتىرىسى بولدى, دەپ حابارلادى وسى پالاتانىڭ ءباسپاسوز قىزمەتى. كونفەرەنتسيا الەمدىك قوعامداستىق وكىلدەرىنىڭ, پارلامەنتشىلەر جانە ساراپشىلاردىڭ قاتىسۋىمەن بيىل 29 تامىزدا استانادا ءوتتى. كەڭەستى اشا كەلىپ, ق.توقاەۆ: «قارۋسىزدانۋ جانە يادرولىق قارۋدى تاراتپاۋ ىسىنە قوماقتى ۇلەس قوسقان قازاقستان پرەزيدەنتى نۇرسۇلتان نازارباەۆ شىن مانىندە جاھاندىق يادرولىق قارۋعا قارسى قوزعالىستىڭ مويىندالعان كوشباسشىسى بولىپ تابىلادى», – دەدى. مەملەكەت باسشىسىنىڭ «الەم. ءححى عاسىر» مانيفەسىنىڭ نەگىزىندە يادرولىق قارۋدان تولىق ارىلۋ يدەياسى جاتىر. «سەمەي يادرولىق سىناق پوليگونىنىڭ جابىلۋىنىڭ اتاۋلى كۇنى قازاقستان عانا ەمەس, كۇللى الەمدىك قوعامداستىققا جەر جۇزىندە ورنىقتى بەيبىتشىلىكتى قالىپتاستىرۋدىڭ ءبىرىنشى كەزەكتەگى ماڭىزدىلىعى تۋرالى ويلانۋعا يگى سەبەپ بولۋى ءتيىس», – دەدى ءارى قاراي سەنات باسشىسى. وسىعان بايلانىستى پارلامەنتتىڭ جوعارعى پالاتاسىنىڭ توراعاسى جينالعاندارعا كونفەرەنتسيانى وتكىزۋدىڭ مازمۇندىق جانە ۇيىمداستىرۋ ماسەلەلەرىن مۇقيات ازىرلەۋدى تاپسىردى. پرەزيدەنت اكىمشىلىگى باسشىسىنىڭ ورىنباسارى باعلان مايلىباەۆ ءوز سوزىندە ۇيىمداستىرۋ كوميتەتىنىڭ مۇشەلەرىن كونفەرەنتسيا الدىندا تۇرعان مىندەتتەرمەن تانىستىردى. سىرتقى ىستەر ءمينيسترىنىڭ ورىنباسارى رومان ۆاسيلەنكو فورۋمعا ازىرلىكتىڭ مازمۇندىق جانە ۇيىمداستىرۋ ماسەلەلەرى, سەرىكتەستەرمەن, ونىڭ ىشىندە حالىقارالىق ۇكىمەتتىك ەمەس ۇيىمدارمەن ءوزارا ءىس-قيمىل تۋرالى اقپاراتپەن تانىستىردى.