قىتايدا مۇردەنى جەرلەۋدىڭ جاڭا ءتاسىلى پايدا بولدى

استانا. 28 ءساۋىر. قىتايدىڭ شانحاي قالاسىندا قايتىس بولعان جانداردى جەرلەۋدىڭ جاڭا ءتاسىلى شىقتى. ياعني, باقيلىق بولعان ادامنىڭ مۇردەسى ورتەلىپ, كۇللى بيولوگيالىق تىڭايتقىشقا اينالىپ كەتەتىن ىدىسقا سالىنادى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. جەرگىلىكتى بيلىك مۇردەنى جەرلەۋدىڭ جاڭا ءتاسىلى قىتايلىقتار ءۇشىن وتە ءتيىمدى ءارى ارزان دەگەندى ايتتى. ال قايتىس بولعان ادامعا ۇلكەن مەگاپوليستەگى زيراتتا ورىن جوق بولعاندىقتان, جانازا شىعارۋمەن اينالىساتىن جەرگىلىكتى بيۋرو قىمبات ەمەس ەكولوگيالىق قىزمەت ءتۇرىن ۇسىنۋدا. «مۇردەنى اتالعان ىدىسقا سالعاننان كەيىن ونىڭ ۇستىنە گۇل وتىرعىزۋعا بولادى. ءۇش ايدان كەيىن بارلىعى توپىراققا ءسىڭىپ كەتەدى», – دەدى جەرلەۋ قىزمەتىن كورسەتەتىن بيۋرو ماماندارى. قازىرگى تاڭدا شانحاي بيلىگى تۇرعىنداردى وسى ءتاسىل ارزان ءارى ەكولوگيالىق تازا دەپ ۇگىتتەۋدە. ءتىپتى ولار وسى جولدى تاڭداعان تۇرعىندارعا اقشالاي جەڭىلدىك جاسايدى. بۇگىندە ەكولوگيالىق جەرلەۋ ءتاسىلىن 30 پايىز حالىق قۇپتاۋدا. ويتكەنى, قىتايدا قايتىس بولعان ادامدى اقتىق ساپارعا شىعارىپ سالۋ تىم قىمباتقا تۇسەدى. ايتا كەتەيىك, شانحايلىقتار ءۇشىن تاعى ءبىر ءتاسىل بار. جاڭا تەحنولوگيا بويىنشا سۇيەكتى ورتەپ, كۇلگە ەمەس, 150-دەي شاعىن كريستالعا اينالدىرىپ, ونى ۇيگە ساقتاپ قويۋعا نەمەسە القا, سىرعانىڭ تاسىن جاساۋعا بولادى. تالعات رايىمبەك. دەرەك, فوتو: 24.kz.