تەمىرتاۋداعى ەڭ ۇلكەن گراففيتي سۋرەتتىڭ اۆتورى تابىلدى

قاراعاندى. 21 ءساۋىر. تەمىرتاۋ قالاسىندا بەس قاباتتى ءۇيدىڭ قاپتالىنا تۇتاستاي گراففيتي ۇلگىسىمەن سۋرەت سالعان بەلگىسىز اۆتوردىڭ ونەرى قالا تۇرعىندارىن عانا ەمەس, جەلى قولدانۋشىلارىن دا ءتانتى ەتتى. بۇل تۋرالى egemen.kz ءتىلشىسى حابارلادى. بەلگىسىز سۋرەتشى ءبىر ءتۇننىڭ ىشىندە تەمىرتاۋدىڭ 9-شى ىقشام اۋدانىنداعى №96 تۇرعىن ءۇيدىڭ قاپتال قابىرعاسىنا فرانتسيانىڭ ايگىلى سۋرەتشىسى انري ءماتيسستىڭ «بي» دەپ اتالاتىن كارتيناسىن كوشىرىپ سالعان. كارتيناعا ەنگىزىلگەن ءبىر عانا وزگەرىس – گراففيتي سۋرەتتە بيشىلەر ءتۇتىنى بۋداقتاپ جاتقان الىپ مۇرجانى اينالا بي بيلەپ ءجۇر. كوپ ۇزاماي گراففيتي سۋرەتتى سالعان پاۆەل كاس دەگەن قازاقستاندىق ستريت-ارت-سۋرەتشى ەكەنى انىقتالدى. ول ءوزىنىڭ مۇنداي ارەكەتكە قالاداعى ەكولوگيالىق اۋىر احۋالعا جۇرتشىلىقتىڭ نازارىن اۋدارتۋ ءۇشىن بارعانىن جەلىدەگى Instagram پاراقشاسىنا جازىپ, گراففيتي سالىنعان ءۇيدىڭ سۋرەتىن جۇكتەگەن. گراففيتي اۆتورى بەلگىلى بولعاننان كەيىن تەمىرتاۋ قالاسىنىڭ اكىمى عالىم ءاشىموۆ سۋرەتشىگە قاتىستى ەشقانداي جاۋاپكەرشىلىك شاراسىنىڭ قولدانىلمايتىنىن مالىمدەدى. مۇنى وبلىستىق ىشكى ىستەر دەپارتامەنتى دە قۋاتتادى. ال ءتۇن جامىلىپ سۋرەت سالعان پاۆەل كاس 13-15 مامىردا شىمكەنت قالاسىندا وتەتىن Shymkent Art Days 2016 زاماناۋي ونەر فەستيۆالىنە شاقىرتۋ الدى. قايرات ءابىلدينوۆ. دەرەك, فوتو: egemen.kz.