كەشە, 21 ءساۋىر كۇنى گرەكيانىڭ وليمپ تاۋى ەتەگىندەگى ەجەلگى گەرا حرامىنىڭ اشىق الاڭىندا XXXI جازعى وليمپيالىق ويىنداردىڭ الاۋى تۇتاتىلدى. وسىعان ارنالعان سالتاناتتى شارادا گرەك اكتريساسى كاتەرينا لەحوۋ جوعارعى ابىز ايەلدىڭ ءرولىن اتقارىپ, باعزى ۇردىسپەن كۇن ءساۋلەسىنىڭ قىزۋى ارقىلى سيمۆولدىق ءمانى بار قۇتىعا وت جۇگىرتتى.
بۇدان كەيىن الاۋدى الىپ جۇگىرۋگە ارنالعان ءداستۇرلى ەستافەتا جولعا ءتۇستى. ونى گرەكتىڭ 25 جاستاعى گيمناستى ەلەفتەريوس پەترۋنياس باستادى. ەللادا جەرىندە التى كۇن شارلايتىن الاۋدى گرەك سپورتشىلارى الىپ جۇرەدى. ولاردىڭ اراسىندا بوسقىندار ساپىنداعى ءبىر سپورتشى بولاتىنى دا ايتىلىپ جاتىر.
ەستافەتا الاۋى 27 ءساۋىر كۇنى افينا قالاسىندا ريو-2016 وليمپياداسى ۇيىمداستىرۋ كوميتەتىنىڭ دەلەگاتسياسىنا سالتاناتتى تۇردە تابىس ەتىلەدى. وسىدان باستاپ وليمپيالىق الاۋ ءوزىنىڭ 100 كۇندىك ساپارىنا جول اشادى. ول برازيليا تەرريتورياسىنا 3 مامىردا تابان تىرەيدى. بۇدان ءارى ەلدىڭ اۋماعىن ۇزاق ۋاقىت ارالاپ كەلىپ, بارلىق شتاتتارداعى 500 ەلدى مەكەندى باسىپ وتەدى. تىعىرشىقتاعى وت 5 تامىز كۇنى عانا ساپارىن اياقتاپ, ريو-دە-جانەيروداعى «ماراكانا» ستاديونىنا ويىنداردىڭ سالتاناتتى جاعدايدا اشىلۋ ءراسىمى كەزىندە جەتكىزىلەدى.
وڭتۇستىك امەريكانىڭ وسى ەلىندە جالاۋ كوتەرەتىن وليمپيالىق ويىندار 5-21 تامىز ارالىعىندا جارىس كورىگىن قىزدىرادى.
وليمپيالىق الاۋدى الىپ جۇگىرۋ ءداستۇرى بۇدان 80 جىل بۇرىن, 1936 جىلى بەرليندە وتكەن وليمپيالىق ويىنداردىڭ قارساڭىندا ءبىرىنشى رەت قولعا الىنعان بولاتىن.
«ەگەمەن-اقپارات»
