ەلباسى مەديا فورۋمنىڭ جۇمىسىنا تابىس تىلەدى

استانا. 21 ءساۋىر. بۇگىن استانادا XIII ەۋرازيالىق مەديا فورۋمىن پرەمەر-ءمينيستردىڭ ورىنباسارى, وسى باسقوسۋدى ۇيىمداستىرۋ كوميتەتىنىڭ ءتورايىمى داريعا نازارباەۆا اشىپ, مەملەكەت باسشىسى نۇرسۇلتان نازارباەۆتىڭ قۇتتىقتاۋ حاتىن وقىپ بەردى. بۇل تۋرالى egemen.kz ءتىلشىسى حابارلادى. داريعا نازارباەۆا حاتتا ەلباسىنىڭ فورۋمنىڭ جۇمىسىنا ساتتىلىك تىلەيتىنىن, استاناعا جەر-ءجۇزىنىڭ ءار تۇكپىرىنەن جينالعان جۋرناليستەر مەن ساياساتكەرلەردىڭ پىكىرى الەمدىك اقپارات كەڭىستىگىنە قوماقتى ۇلەس قوسىپ كەلە جاتقانىن اتاپ وتكەنىن ايتتى. «جاڭا الەمنىڭ, ءبارىمىزدىڭ ورتاق بولاشاعىمىزدىڭ قانداي بولاتىنى ارقايسىمىزعا بايلانىستى. مەن «الەم. ءححى عاسىر» اتتى مانيفەسىمدى ۇسىندىم. ونىڭ ماقساتى – جەر بەتىندە سوعىستى ءتۇپ-تامىرىمەن جويۋ. بۇل عاسىر ورتاق ەرىك-جىگەر ارقىلى پاراسات پەن جاھاندىق سىندارلى ديالوگ سالتانات قۇراتىن دامۋ جولى بولۋى ءتيىس. سول سەبەپتى ەۋرازيالىق مەديا فورۋم الاڭىندا قوردالانعان الەمدىك پروبلەمالاردى اشىق تالقىلاپ, تەڭگەرىمدى شەشىمدەر ىزدەستىرۋ كەرەك. فورۋم جۇمىسىنىڭ ناتيجەسى سىزدەردىڭ يدەيالارىڭىز بەن باستامالارىڭىزدىڭ جەمىسى بولماق. فورۋم قاتىسۋشىلارىنا ساتتىلىك تىلەيمىن», دەلىنگەن دەدى حاتتا داريعا نازارباەۆا. سونىمەن بىرگە ول فورۋمنىڭ ءمانى مەن ماڭىزىن ايتا كەلىپ, ونىڭ ادامزاتتىڭ پروبلەمالارىن تالقىلاۋعا, شەشۋگە ارنالعان اشىق الاڭعا اينالعانىن اتاپ ءوتتى. «ەۋرازيالىق مەديا فورۋم 13 رەت وتكىزىلىپ كەلەدى. بۇل وڭى مەن سولىن تانىپ, ەرەسەك ومىرگە اياق باسقان بوزبالانىڭ ءبىر ومىرلىك جاسى. وسى ۋاقىتتا فورۋمدا كوپتەگەن ماسەلەلەر تالقىلاندى, قارالدى. بيىلعى باسقوسۋدا دا ءبىز الەمنىڭ ءار جەرىندە توبە كورسەتىپ جاتقان پروبلەمالاردى شەشۋدىڭ جولىن ىزدەيمىز, قاراستىرامىز. فورۋمنىڭ استانادا ءوتىپ جاتقانىندا دا ءبىر ءمان بار. قازىرگى كەزدە استانامىز ەلىمىزدىڭ حالىقارالىق ساحناداعى سيمۆولىنا اينالىپ وتىر. استانا – ەلىمىزدىڭ جاڭارۋىنىڭ ايناسى. وسى اينادان اينا-قاتەسىز ەلىمىزدىڭ ساۋلەتى مەن داۋلەتىرىڭ جىل وتكەن سايىن دامىپ كەلە جاتقانىن كورۋگە بولادى. استانا ء–بىزدىڭ ماقتانىشىمىز, ءبىزدىڭ ماحابباتىمىز, قازاقستاننىڭ دامۋ دەڭگەيىنىڭ ءبىر كورىنىسى. بۇگىندە قالامىز EXPO-2017 كورمەسىنە دايىندالىپ جاتىر. وسى ۇلكەن شارانىڭ لايىقتى وتۋىنە ءبارىمىز اتسالىسىپ كەلەمىز», دەدى ول. وسىدان كەيىن داريعا نازارباەۆا اۋعانستاننىڭ بۇرىنعى پرەزيدەنتى حاميد كارزايعا فورۋمعا قاتىسۋعا كەلگەنىنە راحمەتىن ايتىپ, باسقا دا شەتەلدىكتەردىڭ قوناقجاي قازاق جەرىنە تابان تىرەگەندەرىنە ريزاشىلىعىن ءبىلدىردى. «ءبىز سىزدەردىڭ استاناعا كەلگەندەرىڭىزگە قۋانىشتىمىز. فورۋمدا كوپتەگەن ماسەلەلەردىڭ تالقىلاناتىنىن بىلەسىزدەر. ءبىزدىڭ ءبارىمىزدىڭ ويىمىز بىردەي ەمەس, باسقوسۋ كەزىندە قاراما-قايشى كوزقاراستار, پىكىرلەر دە بولادى. ونىڭ ءبارى زاڭدى نارسە. سول سەبەپتى ءبىز ءبىر-ءبىرىمىزدى تىڭداپ, ويلارىمىزعا وي قوسىپ كەلەمىز. ەندەشە, فورۋمنىڭ جۇمىسى اشىق دەپ جاريالايمىن», دەدى  داريعا نازارباەۆا. داستان كەنجالين. دەرەك, فوتو: egemen.kz