لوندوندا ۋيليام شەكسپيرگە ارنالعان كورمە وتەدى

استانا. 15 ءساۋىر. ۇلىبريتانيانىڭ استاناسى لوندوندا ايگىلى اقىن ۋيليام شەكسپيردىڭ قايتىس بولعانىنا 400 تولۋىنا وراي كورمە وتەدى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. ايگىلى اقىن, دراماتۋرگتىڭ شىعارمالارىنداعى باستى رولدەردى سومداعان اكتريسا ۆيۆەن ءليدىڭ ساحنالىق كوستيۋمدەرى, «گاملەت» قويىلىمى ءۇشىن سارا بەرنارعا سىيعا بەرىلگەن ادامنىڭ باس سۇيەگى, سونداي-اق, ۋيليام شەكسپيردىڭ قولىمەن جازىلعان جالعىز ستسەناري لوندون قالاسىنداعى كىتاپحانادا وتەتىن كورمەدە جۇرتشىلىق نازارىنا ۇسىنىلادى. «شەكسپيردىڭ 400 جىلدىعىن الەمدەگى ەڭ ءىرى كىتاپحانالاردىڭ بىرىندە اتاپ ءوتىپ جاتقانىمىز ءۇشىن قۋانىشتىمىز. كورمەدە تالانتتى اقىننىڭ ومىرىنە قاتىستى زاتتاردىڭ ءبارى قويىلادى. ونىڭ اراسىندا شەكسپيردىڭ ومىرىندەگى اتاق-داڭقىنىڭ شارىقتاۋ كەزەڭى مەن قۇلدىراۋ كەزدەرىن دالەلدەيتىن زاتتار دا بار. وسىعان قاراپ شەكسپير مۇراسىنىڭ بۇگىنگە دەيىن جۇرتشىلىق اراسىندا قانشالىقتى ماڭىزدى ەكەنىن بىلۋگە بولادى», – دەيدى ۇيىمداستىرۋشىلار. لوندون قالاسىنداعى ەڭ ءىرى كىتاپحانادا وتەتىن كورمە وسى جىلدىڭ قازان ايىنىڭ التىسىنا دەيىن جالعاسادى. ۋيليام شەكسپير – اعىلشىننىڭ  ۇلى دراماتۋرگى ءارى اقىنى. ومىرىندە كەم دەگەندە 12 تراگەديا , 16 كومەديا, 6 تاريحي حرونيكا جازىپ كەتكەن. ونىڭ پەسالارى الەمنىڭ بارلىق تىلدەرىنە اۋدارىلىپ, وزگە اۆتورلارعا قاراعاندا ەڭ كوپ قويىلادى. شىعارمالارى اعىلشىن ءتىلىنىڭ دامۋىنا زور ۇلەسىن قوستى. ماسەلەن, كوپتەگەن ءسوز تىركەستەرى قاناتتى ءسوز رەتىندە كۇنى بۇگىنگە دەيىن قولدانىلىپ كەلەدى. ايان ءابدۋالي. دەرەك, فوتو: ريا «نوۆوستي».