وڭتۇستىكتە «ازاماتتارعا ارنالعان ۇكىمەت» قۇرىلادى

شىمكەنت. 14 ءساۋىر. مەملەكەتتىك كىرىستەر دەپارتامەنتىنىڭ باسشىسى التىنسارى ۇمبەتاليەۆ «ايماقتىق» كوممۋنيكاتسيالار قىزمەتىندە مەملەكەتىمىزدىڭ بەس ينستيتۋتسيونالدىق رەفورماسىن جۇزەگە اسىرۋعا باعىتتالعان «100 ناقتى قادام» ۇلت جوسپارىنىڭ ورىندالۋى تۋرالى بريفينگ بەردى. بۇل تۋرالى egemen.kz ءتىلشىسى حابارلادى. ۇلت جوسپارىنداعى سالىق پەن كەدەن ساياساتىنا قاتىستى 9 قادام بويىنشا ويىن جۇلگەلەگەن دەپارتامەنت باسشىسى: «بۇل قويىلىپ وتىرعان مىندەتتەردىڭ بارلىعى دا ماڭىزدى تاپسىرمالار. سەبەبى, يندۋستريالاندىرۋ جانە ەكونوميكالىق ءوسىم رەفورماسىندا سالىق جانە كەدەن ساياساتىن ءتيىمدى جۇرگىزۋ ەل دامۋىندا ەرەكشە ءرول اتقارادى», دەدى. سونىمەن بىرگە ول بيۋدجەتتى تولىقتىرۋدىڭ باستى كوزى سالىقتان تۇسەتىن ءتۇسىم ەكەنىن,  قازىرگى جاعدايدا سالىقتىق تۇسىمدەردى كوبەيتۋ ماسەلەسىن سالىق جانە كەدەن ساياساتىن وڭتايلاندىرۋ ارقىلى شەشۋگە بولاتىنىن اتاپ ءوتتى. «جالپىعا بىردەي دەكلاراتسيالاردىڭ ۋاقىتىلى قابىلدانۋىن جانە وڭدەلۋىن تولىققاندى قامتاماسىز ەتۋ ماقساتىندا «ازاماتتارعا ارنالعان ۇكىمەت» مەملەكەتتىك كورپوراتسياسى قۇرىلۋدا. بۇل كورپوراتسيا, مەملەكەتتىك قىزمەت كورسەتە وتىرىپ, دەكلاراتسيالاردى قابىلداۋ تيىمدىلىگىن ارتتىرادى», دەدى ول. باقتيار تايجان. دەرەك, فوتو: egemen.kz