وڭتۇستىكتە جەر شەتەلدىكتەرگە ساتىلمايدى

شىمكەنت. 14 ءساۋىر. شىمكەنتتە ۇلتتىق ەكونوميكا مينيسترلىگىنىڭ ۇيىمداستىرۋىمەن جەر كودەكسىنىڭ نورمالارىن جانە «100 ناقتى قادام» ۇلت جوسپارىن ىسكە اسىرۋ شەڭبەرىندەگى زاڭنامالىق اكتىلەردى ءتۇسىندىرۋ بويىنشا سەمينار-كەڭەس ءوتتى. بۇل تۋرالى egemen.kz ءتىلشىسى حابارلادى. وبلىس اكىمىنىڭ ورىنباسارى جاقىپ بوكەنباەۆ جۇرگىزىپ وتىرعان جيىندا جەر كودەكسىندەگى وزگەرىستەر ءتۇسىندىرىلدى. وبلىس شارۋالارىمەن وتكىزىلگەن كەلەلى كەڭەستە ۇلتتىق ەكونوميكا مينيسترلىگى ەكونوميكانىڭ ينفراقۇرىلىمىن دامىتۋ دەپارتامەنتى ديرەكتورىنىڭ ورىنباسارى گۇلجاحان بيمەندينا اۋىل شارۋاشىلىعى ماقساتىنداعى جەر ەلىمىزدىڭ ازاماتتارىنا عانا جەكە مەنشىككە ساتىلىپ, شەتەلدىكتەر مەن ورالماندارعا بەلگىلى ءبىر مەرزىمگە جالعا بەرىلەتىنى جونىندە اتاپ ءوتتى. سونداي-اق, گۇلجاحان بيمەندينا مەملەكەت مەنشىگىندەگى اۋىل شارۋاشىلىعى ماقساتىنداعى جەر ۋچاسكەلەرىن جەكەمەنشىككە اۋكتسيون ارقىلى بەرۋدىڭ تارتىپتەرى بەكىتىلگەندىگى تۋرالى دا ايتتى. باقتيار تايجان. دەرەك, فوتو: egemen.kz