بىلىمگە قۇشتار ۇرپاق ءوسىپ كەلەدى

بۇگىنگى جاستاردىڭ تالابى بولەك, تالپىنىسى جاقسى. ولار ءبىلىمسىز بولاشاقتىڭ بۇلدىر بولاتىنىن جاقسى تۇسىنەدى, بىلمەككە تالپىنادى. ەلباسىمىز ايتقان ءۇش تۇعىرلى ءتىلدى بارىنشا قولداپ وتىرعان دا وسى جاستار. ءبىزدىڭ ۋنيۆەرسيتەت ومىرگە اسا قاجەتتى تەحنيكالىق پاندەردى اعىلشىن تىلىندە وقىتۋدى 2004-2005 وقۋ جىلدارى سىناق رەتىندە تاجىريبەگە ەنگىزدى. ءوز باسىم حيميا ءپانىن اعىلشىن تىلىندە وقىتامىن. تىلەك بىلدىرگەن ستۋدەنتتەر مەن وقىتۋشىلارعا ۋنيۆەرسيتەت باسشىلىعى تەگىن كۋرس­تار ۇيىمداستىرادى. ۋنيۆەرسيتەتتەگى «تىلدەردى دامىتۋ ورتالىعى» ارقىلى ءۇش تىلدە ءبىلىم الۋعا جاعداي جاسالىپ كەلەدى. اعىلشىن تىلىندە ساباق بەرەتىن وقىتۋشىلارعا كوتەرمەلەۋ رەتىندە ءبىر ساعاتى ءۇش ساعاتقا تەڭەستىرىلدى. ويتكەنى, قازاق, ورىس تىلىندەگى ماتەريالدى اعىلشىن تىلىنە ءتارجىمالاپ, ءپاندى وقىتۋعا دايىنداۋ كوپ ۋاقىتتى تالاپ ەتەدى. ستۋدەنتتەرگە دە قىزىقتىرۋ ءۇشىن جاقسى جاعدايلار جاسالعان. ۇزدىكتەرى ۋنيۆەرسيتەت تاراپىنان شەتەلدەگى وقۋ ورىندارىنا جىبەرىلىپ, كۋرستان وتكىزىلەدى. سونداي-اق, ۋنيۆەرسيتەتتە «شەت تىلىندە ءبىلىم بەرۋدىڭ ساپاسىن ۇيىمداستىرۋ جانە باقىلاۋ» ءبولىمى اشىلعان. ونىڭ ماقساتى اعىلشىن تىلىندە ساباق بەرەتىن مۇعالىمنىڭ دەڭگەيىن ۇدايى كوتەرىپ وتىرۋىنا جاعداي جاساۋ ارقىلى بىلىكتىلىگىن قاداعالاۋ. بۇگىندەرى ستۋدەنتتەردىڭ تالابىمەن تەحنيكالىق پاندەر قاتارىنا گۋمانيتارلىق سالالار بويىنشا دا وقىتۋ قولعا الىنىپ جاتىر. ۇستازدارىمىز «ورلەۋ» باعدار­لاماسى ارقىلى شەتەلدەگى ۇزدىك وقۋ ورىندارىنا بىلىكتىلىگىن ارتتىرۋعا جىبەرىلسە, ستۋدەنتتەر جازدىق لاگەرلەردە ءۇش ءتىلدى تولىق مەڭگەرۋدىڭ تاجىريبەسىنەن وتەدى. ءۇش تۇعىرلى ءتىل – ۇلتتىڭ كەلەشەگى. قازاق ءتىلى – انا ءتىلىڭ بولسا, ورىس ءتىلى – حالىقارالىق ءتىل. ال, اعىلشىن تىلىندە ءبىلىم الساڭ دۇنيە ءجۇزىنىڭ قاي تۇكپىرىندە بولسا دا جۇمىسسىز قالمايسىڭ. بۇگىنگى ءبىلىم قۋعان جاستار وسىنىڭ ءبارىن جاقسى تۇسىنەدى. ال, جاقسى ءومىر ءسۇرۋ ءۇشىن كوپ ءتىل ءبىلۋدىڭ پايداسىنان باسقا, زيانى جوق. اينۇر تۇكىباەۆا, م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ وقىتۋشىسى, حيميا عىلىمدارىنىڭ كانديداتى, دوتسەنت وڭتۇستىك قازاقستان وبلىسى