اۋىلداعى جيھاز تسەحى

ونىڭ بۇيىمدارىن كورشى اۋدان تۇرعىندارى دا ساتىپ الۋدا جاقىندا زايسان اۋدانىنىڭ قارابۇلاق اۋىلىندا بولعانىمىزدا جيھاز تسەحىنىڭ جۇمىسىمەن تانىسۋدىڭ ورايى كەلدى. اۋىل اكىمى قامبار شيلىباەۆ ىسكەر ازامات قاسىم جاقيناشەۆتىڭ ەكى دوسىمەن بىرگە «بيزنەستىڭ جول كارتاسى-2020» باعدارلاماسى بويىنشا 3 ميلليون تەڭگە نەسيە الىپ, وعان قاجەتتى قۇرال-جابدىقتاردى ساتىپ العانىن, قازىر جيھازدىڭ ءتۇر-ءتۇرىن شىعارىپ جاتقانىن تىلگە تيەك ەتتى. قاسىمدى جۇمىس ورنىنان جولىق­تىردىق. از سويلەپ, كوپ تىڭدايتىن ازامات ساۋالدارعا ساراڭ جاۋاپ قايتاردى. – جاندوس حاليتوۆ, جاندوس تۇرا­حانوۆ جانە مەن 7 پايىزدىق ۇستەمەمەن جەڭىلدەتىلگەن نەسيە الدىق. اعاش تىلەتىن ستانوكتار رەسەيدىكى, ال جونىلعان تاقتايلار مەن پليتالاردى جەر-جەردەن الىپ جاتىرمىز. باستاپقىدا ءىسىمىز العا باسسا جاقسى, ال شىعارعان تاۋارلارىمىز وتپەسە نە ىستەيمىز دەپ قوبالجىعانىمىز راس. «كوز قورقاق, قول باتىر» دەگەن راس ەكەن, العاش رەت اۋىلداعى اباي اتىنداعى ورتا مەكتەپتەن 15 وقۋشىلار پارتاسىن جاساۋعا تاپسىرىس ءتۇستى. ءتىپتى, سارىتەرەك, جارسۋ اۋىلدارىنداعى مەكتەپتەرگە ۇستەل, ورىندىق, شكاف جاساپ بەردىك. ساپاسى جاقسى, باعاسى ارزان جيھاز بولعان سوڭ ساتىپ الىپ جاتقاندار بار, – دەپ قاسىم اعىنان جارىلدى. ادەتتە, وبلىس ورتالىعىنان جەت­كىزىل­گەن جيھازدىڭ باعاسى زايسانعا جەتكەنشە شىرقاپ كەتەتىنى بەلگىلى. بىردە قاسىم وزدەرى شىعارعان قابىرعا جيھازىن اۋدان ورتالىعىنداعى جيھاز ساتاتىن دۇكەنگە اپارىپ, باعاسىن 40 مىڭ تەڭگەگە باعالايدى. كوزدىڭ جاۋىن الاتىن جيھازدى دۇكەن ساتۋشىسىنىڭ باسقا بىرەۋگە ءوز كوزىنشە 80 مىڭ تەڭگەگە ساتىپ جىبەرگەنىن كورگەندە, ونىمدەرىنىڭ شىن مانىندە ساپالى ەكەنىنە كوز جەت­كىزەدى. ءتىپتى, تارباعاتاي اۋدانىنىڭ بىرنەشە مەكتەبىنەن جيھاز جاساۋعا تاپسىرىس تۇسكەنى اۋىلداعى شەبەرحانانىڭ اتاعىن الىسقا جەتكىزگەنى ءسوزسىز. – ۇستەل, شكافتاردىڭ باعاسىن 15-18 مىڭنان ارتتىرمايمىز. اۋىلدىق جەردە اقشانىڭ تاپشى ەكەنى بەلگىلى. ەڭ باستىسى, جەرلەستەرىمنىڭ العىسىن الساق, ودان ارتىق  باقىت بار ما؟ – دەيدى جيھاز تسەحىنىڭ جەتەكشىسى قاسىم ءىنىمىز. قارابۇلاق اۋىلىندا گۇلدانا ەسىمدى كاسىپكەر ناۋبايحانا اشىپ, ءۇش ادامدى جۇمىسپەن قامتاماسىز ەتىپ وتىر ەكەن. اۋىل تۇرعىندارى گۇل­دانا پىسىرگەن ناننىڭ ءدامى كەرەمەت دەيدى. تاياۋدا اۋىل اكىمى قامبار شيلىباەۆپەن تىلدەسكەنىمىزدە ىسكەر ازاماتتاردىڭ توعاندا فورەل بالىعىن وسىرە باستاعانىن ايتتى. وڭداسىن ەلۋباي, جۋرناليست شىعىس قازاقستان وبلىسى, زايسان اۋدانى سۋرەتتە:  قاسىم جاقيناشەۆ جيھاز تسەحىندا