بۇلاقتىڭ كوزىن اشاتىن اۋىل

اقجار – ۇرجارعا كىرەبەرىستە, اۋدان ورتالىعىمەن جالعاسىپ جاتقان جاسىل اۋىل. اۋىلدىق وكرۋگكە اقجاردان بولەك امانگەلدى مەن قارامويىل ەلدى مەكەندەرى ەنەدى. بارقىتبەلدىڭ بەرەكەلى باۋىرىنداعى شاعىن اۋىلدىڭ اكىمى ءتاۋىرجان شومانوۆپەن اۋدان باسشىسى سەرىك زاينۋلدين تانىستىرعان بولاتىن. بۇرىن قارجى, سالىق سالاسىندا ەڭبەك ەتكەن ءتاۋىرجان قاباي ۇلى قارا سوزگە جۇيرىك, حالىق كوكەيىندەگى ماسەلەنى قوزعاي بىلەتىن قاجىرلى جاس قىزمەتشىلەردىڭ ءبىرى ەكەن. ەكى كۇندىك ساپارىمىزدا ەتەنە اڭگىمەلەسىپ كەتتىك. جوسپارىمىزدا جوق بولسا دا, ساپار سوڭىنداعى ءسال ايالدى پايدالانىپ, جاس اكىم جەتەكشىلىك ەتەتىن اۋىل تىنىسىمەن تانىستىق. ءۇرجار – سپورتشىلار كوپ شىققان ءوڭىر. اقجاردىڭ ورتالىق كوشەسى تاۋەل­­سىز قازاقستاننىڭ العاشقى چەم­پيوندارىنىڭ ءبىرى, بەلگىلى سپورتشى نۇربولات جىڭعىلباەۆتىڭ ەسىمىمەن اتالادى. كوشە 2013 جىلى تولىق جارىق­تاندىرىلىپتى. سونداي-اق, تۇرعىندار مەن سپورت ۇيىرمەلەرىنەن كەش قايتاتىن بالالاردىڭ قاۋىپسىزدىگى ءۇشىن باسقا دا بىرقاتار كوشەلەر مەن بولات تۇرلىحانوۆ اتىنداعى ورتا مەكتەپتىڭ ماڭايى سامالاداي جارقىرايدى. اق­جاردىڭ دامۋىنا اۋدان اكىمىنىڭ قولداۋ كورسەتىپ وتىرعانىن جەتكىزگەن ت.قاباي ۇلىنىڭ ايتۋىنشا, 18 مىڭنان استام حالقى بار اقجارلىقتار نەگىزىنەن ەگىن جانە مال شارۋاشىلىعىمەن شۇعىلدانادى. 145 شارۋا قوجالىعى, 16 مىڭعا جۋىق ەگىستىك القابى بار. سوڭعى ۋاقىتتا «قازاگروقارجى» اق ارقىلى 6 جاڭا تەحنيكا ساتىپ الىندى. قازىر وبلىس اكىمىنىڭ تاپسىرماسى اياسىندا سۋارمالى القاپتاردى كوبەيتۋ, جەردى قۇنارلاندىرۋ ءۇشىن القاپتاردى مايلى داقىلداردان ءداندى داقىلدارعا كوشىرۋ جۇمىستارى جۇرگىزىلۋدە. اۋىل ورتاسىندا 1,6 ملن. تەڭگە قارجىعا بالالاردىڭ ويىن جانە سپورت الاڭى سالىنىپ جاتىر. سونداي-اق, ماقانشىلىق كاسىپكەر جۇمان قىڭىربەكوۆتىڭ 45 ادامدىق الەۋمەتتىك مونشاسى جۇمىس ىستەيدى. اۋىل «قىزىلتاۋ قىراندارى» اتالعان كەڭەستىك كەزەڭنەن كەلە جاتقان مادەنيەت ءۇيى اۋداندىق مادەنيەت ءۇيىنىڭ مەنشىگىنە بەرىلىپ, كۇردەلى جوندەۋدەن وتكىزىلدى. قازىر بۇل عيماراتتا ۋچاسكەلىك پوليتسيا پۋنكتى, پوشتا بولىمشەسى, اۋىلدىق وكرۋگ اكىمدىگى جانە ۆەتەريناريا قىزمەتى ورنالاسقان. بىلتىر مەكتەپ پەن مادەنيەت ءۇيىنىڭ قازاندىقتارى جاڭعىرتىلدى. اۋدانداعى ءىرى الەۋمەتتىك نىسان – «شاپاعات» بالالاردى وڭالتۋ ورتالىعى اقجاردا ورنالاسقان. «اۋىل تىنىسى» تاقتاسىندا اق­جار­لىقتاردىڭ مادەني-سپورتتىق ءھام قوعامدىق ءىس-شارالارى كورىنىس تاۋىپتى. «گۇلدەر-اي», «اجەلەر» ءانسامبلى سياقتى جەرگىلىكتى ونەرپازدار مەن شىعارماشىلىق ۇجىمداردىڭ قاتىسۋىمەن «اۋىلىم – التىن بەسىگىم» بايقاۋىندا گران-پري, «اسىل مۇرا» بايقاۋىندا باس جۇلدەنى جەڭىپ العان اقجارلىقتار ارداگەرلەرگە, باتىر انا­لارعا دا ءجيى قۇرمەت كورسەتىپ, ءتۇرلى شارالار ۇيىمداستىرىپ تۇرادى. «تۋعان جەرگە – تاعزىم» اكتسياسى اياسىندا جەرلەس كاسىپكەرلەردىڭ كومەگىمەن اۋىلدىڭ كىرەبەرىسىنە اركا, اۋىل ىشىنە ساحنا, بالاباقشا اتكەنشەكتەرى ورناتىلىپ, كومىر قويماسى سالىندى جانە سپورت ۇيىرمەسىنە كۇرەس كىلەمى سىيعا تارتىلدى. دۋلات شابدانوۆ ەسىمدى جەكە كاسىپكەردىڭ اۆتوبۋسىمەن الاكول جاعالاۋىنا الەۋ­مەتتىك جاعدايى تومەن وتباسىلاردى دەمالۋعا تەگىن تاسىمالداۋ داستۇرگە اينالدى. سوڭعى جىلدارى ءۇرجار اۋدانىن­دا كوگالداندىرۋ, اباتتاندىرۋ جۇ­مىستارىنا كوپ كوڭىل ءبولىنىپ وتىر. اۋدان اكىمىنىڭ باستاماسىمەن كوكتەم, جاز جانە كۇز ماۋسىمدارىندا تۇراقتى تۇردە سەنبىلىك وتكىزىلدى. «بۇلاق كورسەڭ, كوزىن اش!» اتتى اۋداندىق اكتسياعا اق­جارلىقتار دا ەرەكشە ۇلەس قوسىپ, جۇزدەگەن اۋىل جاستارى بەلسەنە اتسالىسا باستادى. ياعني, اۋىلدىڭ تاۋعا ورلەيتىن تۇسىنا كوتەرىلگەن تۇرعىندار وزەن جاعا­لاۋى مەن ءار جەردە بۇرقىلداپ شىعىپ جاتقان تۇما-قاينارلاردىڭ كوزىن ارشىپ, ارىقتاردى تازالايدى, مال اياعىنان قورۋ ءۇشىن قورشايدى. ناتيجەسىندە, باۋ-باقشاسى جايقالعان اۋىلعا بۇلاق سۋلارى سىلدىرلاپ, تاپ-تازا بولىپ اعادى. مەكتەپ جىلىجايىندا وقۋشىلاردىڭ بيولوگيا, ەڭبەك ساباقتارىن وتكىزىپ, عىلىمي-زەرتتەۋ جۇمىستارىن جۇرگىزۋىنە جاعداي جاسالعان. «جاسىل ەل» ەڭبەك جاساقتارىنا قاتىسۋشى ستۋدەنتتەردىڭ كومەگىمەن كوشە جيەكتەرىنە گۇل ەگىلەدى. بۇل – اۋىل ستۋدەنتتەرىن ەڭبەككە باۋلۋمەن بىرگە, قوسىمشا تابىس تابۋىنا مۇمكىندىك بەرىپ وتىر. وسى جۇمىستاردىڭ قورىتىندىسىندا, اقجار اۋىلى «ۇزدىك اباتتاندىرىلعان اۋىل» بايقاۋىندا جۇلدەلى ورىنعا يە بولدى. «جاس كەلسە – ىسكە» دەيدى. دەسە دە, اۋىل باسشىسى يگى ىستەردىڭ اتقارىلۋىنا اۋداندىق ءماسليحات دەپۋتاتى رىسحان جانكۇشىكوۆا باستاپ, كوپتەگەن اۋىل ازاماتتارىنىڭ قولداۋ كورسەتىپ كەلە جاتقانىن جەتكىزدى. – پرەزيدەنت جانىنداعى مەملەكەتتىك باسقارۋ اكادەمياسىندا بىلىكتىلىگىن جەتىلدىرۋ كۋرسىنان ءوتىپ, استانادا وتكەن «نۇر وتان» پارتياسىنىڭ XV سەزىنە قاتىستىم. «نۇر وتان» پارتيا­سى توراعاسىنىڭ ءبىرىنشى ورىنباسارى ا.مىرزاحمەتوۆتىڭ العىس حاتىنا يە بولدىم. بۇل ەلباسىمىزدىڭ جاستاردى قولداۋ ساياساتىنىڭ جەمىسى دەپ ويلايمىن. ءمۇنىڭ بارلىعى بىزگە زور جاۋاپكەرشىلىك جۇكتەيدى, – دەدى ت.شومانوۆ. دۋمان اناش, «ەگەمەن قازاقستان» شىعىس قازاقستان وبلىسى, ءۇرجار اۋدانى