ۇيلەستىرۋ كەڭەسىنىڭ وتىرىسى ءوتتى

باس پروكۋرور اسحات داۋىلباەۆتىڭ توراعالىعىمەن زاڭ­دى­لىقتى, قۇقىقتىق ءتارتىپتى جانە قىلمىسقا قارسى كۇرەس­تى قامتاماسىز ەتۋ جونىندەگى ۇيلەستىرۋ كەڭەسىنىڭ وتىرىسى ءوتتى. وندا جالعان كاسىپكەرلىككە قارسى ءىس-قيمىل زاڭدىلىعىنىڭ جاي-كۇيى, ۋاكىلەتتى مەملەكەتتىك ورگانداردىڭ قابىلداپ وتىرعان شارالارى جانە ولاردىڭ ءوزارا ءىس-قيمىل جاساسۋ تيىمدىلىگى ماسەلەلەرى تالقىلاندى. جيىنعا ۇيلەستىرۋ كەڭەسىنىڭ مۇشەلەرى, پرەزيدەنت اكىمشىلىگىنىڭ, پرەمەر-مينيستر كەڭسەسىنىڭ جاۋاپتى قىزمەتكەرلەرى, جوعارعى سوت وكىلدەرى, قۇقىق قورعاۋ, ارنايى جانە وزگە دە ورتالىق اتقارۋشى ورگانداردىڭ جاۋاپتى لاۋازىمدى تۇلعالارى قاتىستى. وتىرىس بارىسىندا باس پروكۋرور كۇن ءتارتىبىنىڭ ەرەكشە وزەكتىلىگىن اتاپ ءوتتى. بيۋدجەتتىك قاراجاتتى ۇرلاۋ مەن سالىق تولەمىنەن جالتارۋ مەملەكەتتىڭ ەكونوميكالىق نەگىزىن ەداۋىر بۇزا وتىرىپ, ۇلتتىق قاۋىپسىزدىككە نۇقسان كەلتىرۋدە. ويتكەنى, كەيىنگى بەس جىلدا جالعان كاسىپكەرلىك فاكتىلەرىن انىقتاۋدىڭ تۇراقتى ءوسۋ سەرپىنى بايقالۋدا. اتاپ ايتقاندا, 2011 جىلى 438 قىلمىس, ال وتكەن جىلى 2626 قىلمىس تىركەلگەن. اعىمداعى جىلدىڭ ەكى ايى ىشىندە جالعان كاسىپكەرلىك تۋرالى 628 قىلمىستىق ءىس تىركەلدى, ال وتكەن جىلدىڭ وسىنداي كەزەڭىندە 261 قىلمىستىق ءىس بولعان ەدى. دەگەنمەن, ا.داۋىلباەۆ اتاپ وتكەن­دەي, جۇرگىزىلىپ وتىرعان جۇمىستاردىڭ تيىمدىلىگىنە مەملەكەتتىك كىرىس كومي­تەتىنىڭ وكىلەتتى قىزمەتتەرىنىڭ جەتكىلىكسىز ۇيلەستىرىلۋى مەن كەلىسىمسىز ارەكەتى جانە بانك مەكەمەلەرى تاراپىنان قارجى وپەراتسيالارىنا قاتىستى ءتيىستى باقىلاۋدىڭ بولماۋى كەدەرگى جاساپ وتىر. قىلمىستى الدىن الا ەسكەرتۋدىڭ تەتىكتەرى ناشار قولدانىلادى, سونىڭ سالدارىنان زاڭسىز تابىستى جىلىستاتۋدىڭ قىلمىستىق جولدارى ورىن العان سوڭ عانا انىقتالادى. سوڭعى بەس جىلدا اياقتالعان ىستەر بويىنشا انىقتالعان زالالدىڭ سوماسى 242 ملرد.-تان استام تەڭگەنى قۇرادى. زالالدى وتەۋ بولسا ورتاشا ەسەپپەن 7 پايىزدان اسپايدى, ال 2015 جىلى نەبارى 1,2 پا­يىزدى قۇرادى. تالقىلاۋ قورىتىندىسى بويىنشا ۇيلەستىرۋ كەڭەسى مەملەكەتتىك كىرىس كوميتەتىنە جالعان كاسىپكەرلىك فاكتىلەرى بو­يىنشا ءتيىستى تەرگەۋ جۇمىستارىن قامتاماسىز ەتۋگە, قارجىنى زاڭسىز قولما-قول اقشاعا اۋدارۋ ماقساتى بار كەلىسىمدەردى انىقتاۋ تۋرالى مەكەمەارالىق اقپارات الماسۋدى جۇرگىزۋ باعىتىندا شارالار ۇيىمداستىرۋعا كەڭەس بەردى. سونىمەن قاتار, اكتيۆتەردى شىعارۋ مەن سالىقتى تولەۋدەن جالتارۋ جولدارىن پايدالانۋ كەزىندە كوزگە ىلىككەن سەنىمسىز ۇيىمدار مەن جەكە تۇلعالاردىڭ «قارا ءتىزىمىن» قالىپتاستىرۋ جانە اكتيۆتەرىنە شەكتەۋ قويا وتىرىپ ولارمەن قايسىبىر قارجى وپەراتسيالارىن جۇرگىزۋگە تىيىم سالۋ قۇقىعىن بەرۋدىڭ ەۋروپالىق تاجىريبەسىن زەردەلەۋ ۇسىنىلدى. باس پروكۋرور بارلىق ۋاكىلەتتى ورگانداردان العا قويىلعان مىندەتتەردىڭ ءتيىمدى جۇزەگە اسىرىلۋىن قامتاماسىز ەتۋدى, زاڭسىز تابىستاردى جىلىستاتۋ تاسىلدەرىن انىقتاۋ جانە جولىن كەسۋ بويىنشا پروفيلاكتيكالىق جانە جەدەل ءىس-شارالاردىڭ ناتيجەلىلىگىن ارتتىرۋدى تالاپ ەتتى, دەپ حابارلادى باس پروكۋراتۋرانىڭ ءباسپاسوز قىزمەتى.