قاراعاندى وبلىسىندا ەكى اۋداننىڭ اكىمدەرى تاعايىندالدى

قاراعاندى. 14 ءساۋىر. قاراعاندى وبلىسىندا شەت جانە اقتوعاي اۋداندارىنىڭ جاڭا اكىمدەرى تاعايىندالدى. بۇل تۋرالى وبلىس اكىمىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. پرەزيدەنت اكىمشىلىگىنىڭ جانە دەپۋتاتتاردىڭ كەلىسۋىمەن, وبلىس اكىمىنىڭ وكىمىمەن شەت اۋدانىنىڭ اكىمى لاۋازىمىنا مارات جانداۋلەتوۆ تاعايىندالدى. مارات جانداۋلەتوۆ 1957 جىلى تۋعان. ەكى جوعارى ءبىلىمى بار. 1980 جىلى قاراعاندى مەملەكەتتىك ۋنيۆەرسيتەتىن, 1991 جىلى الماتى ساياساتتانۋ جانە باسقارۋ ينستيتۋتىن تامامداعان. ماماندىعى بويىنشا حيميا ءپانىنىڭ مۇعالىمى جانە ساياساتتانۋشى. ەڭبەك جولىن قاراعاندى وب­لىسىنداعى اقتاس كەنتىندە مۇعالىم بولىپ باستاعان. 1984-1991 جىلدارى پارتيالىق قىزمەتتە بولدى. 1991 جىلدان بەرى مەملەكەتتىك كىزمەتتە. مەملەكەتتىك قىزمەتتەگى ەڭبەك جولىن جاڭاارقا اۋدانىنىڭ اكىمى اپپاراتىنىڭ رەفەرەنتى قىزمەتىنەن باستاپ, كەيىن اتالعان اۋدان اكىمىنىڭ ورىنباسارى قىزمەتىنە تاعايىندالدى. بۇل تاعايىنداۋعا دەيىن جاڭاارقا اۋدانى اكىمىنىڭ الەۋمەتتىك ماسەلەلەر جونىندەگى ورىنباسارى قىزمەتىن اتقاردى. سونداي-اق, پرەزيدەنت اكىمشىلىگىنىڭ جانە دەپۋتاتتاردىڭ كەلىسۋىمەن, وبلىس اكىمىنىڭ وكىمىمەن اقتوعاي اۋدانىنىڭ اكىمى لاۋازىمىنا سالتانات ابەۋوۆا تاعايىندالدى. سالتانات ابەۋوۆا ماماندىعى بويىنشا «ورتا مەكتەپتەردەگى نەمىس جانە اعىلشىن تىلدەرى ءپانىنىڭ مۇعالىمى». الماتى پەداگوگيكالىق شەت تىلدەر ينستيتۋتىن تامامداعان. اقتوعاي اۋدانىنداعى قىزىلاراي سەلوسىندا نەمىس ءتىلى ءپانىنىڭ مۇعالىمى رەتىندە ەڭبەك جولىن باستاپ, كومسومول, پارتيا ۇيىمدارىندا قىزمەت ەتتى. 1992 جىلى اقتوعاي اۋدانى اكىمىنىڭ اپپاراتىنا قىزمەتكە قابىلدانىپ, ءتۇرلى لاۋازىمداردا, ونىڭ ىشىندە, ۇيىمداستىرۋ جانە كادر جۇمىسى ءبولىمىنىڭ مەڭگەرۋشىسى بولىپ قىزمەت ەتتى. اۋدان اكىمىنىڭ ورىنباسارى, كەيىن اقتوعاي اۋدانىنىڭ اكىمى قىزمەتىنە تاعايىندالدى. بۇل تاعايىنداۋعا  دەيىن قاراعاندى وبلىسىنىڭ مادەنيەت, مۇراعات جانە قۇجاتتاما ءىسى باسقارماسى باسشىسىنىڭ ورىنباسارى قىزمەتىن اتقاردى. قايرات ءابىلدينوۆ. دەرەك, فوتو: قاراعاندى وبلىسى اكىمىنىڭ ءباسپاسوز قىزمەتى.