ۇكىمەتارالىق كەلىسىم راتيفيكاتسيالاندى

كەشە ءماجىلىس سپيكەرى باقتىقوجا ىزمۇحامبەتوۆتىڭ توراعالىعىمەن پالاتانىڭ جالپى وتىرىسى ءوتىپ, راتيفيكاتسيالىق زاڭ جوبالارى تالقىلاندى, دەپ حابارلادى ءماجىلىستىڭ ءباسپاسوز قىزمەتى. دەپۋتاتتار حالىقارالىق قايتا قۇرۋ جانە دامۋ بانكىمەن قازاقستاندا وفيستەر قۇرۋ جانە ولاردىڭ جۇمىس ىستەۋى تۋرالى ۇكىمەتارالىق كەلىسىمدى راتيفيكاتسيالاۋ تۋرالى زاڭ جوباسىن ماقۇلدادى. بۇل كەلىسىم قازاقستان مەن دۇنيەجۇزىلىك بانك اراسىنداعى كەلىسىمدى نىعايتۋ ماقساتىندا 2016 جىلى 21 قاڭتاردا داۆوس قالاسىندا جاسالعان. قۇجات 1994 جىلعى الماتى قالاسىندا تۇراقتى وكىلدىك قۇرۋ تۋرالى كەلىسىمدى الماستىرادى. 2001 جىلى استانا قالاسىندا وكىلدىك اشىلعاننان كەيىن الماتى قالاسىنداعى وفيس اۋماقتىق وفيس مارتەبەسىنە يە جانە دۇنيەجۇزىلىك بانكتىڭ ورتالىق ازياداعى قىزمەتىن قامتاماسىز ەتەدى. ال جاڭا كەلىسىم دۇنيەجۇزىلىك بانكتىڭ قازاقستانداعى بارلىق كەڭسەلەرىنىڭ جانە قىزمەتكەرلەرىنىڭ ماقساتتارىن, مارتەبەسىن, ارتىقشىلىقتارى مەن يممۋنيتەتتەرىن انىقتايدى. ماسەلەن, دۇنيەجۇزىلىك بانكتىڭ مۇلكى جانە اكتيۆتەرى اتقارۋشى نەمەسە زاڭ شىعارۋشى بيلىك اكتىلەرىنىڭ ناتيجەسىندە ءتىنتۋدىڭ, رەكۆيزيتسيالاۋدىڭ, تاركىلەۋدىڭ, ەكسپروپرياتسيالاۋدىڭ ەشقانداي نىسانىنا نەمەسە الىپ قويۋدىڭ كەز كەلگەن باسقا نىسانىنا جاتپايدى جانە ونىڭ اكتيۆتەرىنە, مەنشىگىنە, كىرىسىنە, سونداي-اق, قىزمەتى مەن ترانزاكتسيالارىنا ەشقانداي سالىقتار جانە كەدەندىك باجدار سالىنبايدى. قىزمەتكەرلەر ولارعا دۇنيەجۇزىلىك بانك تولەيتىن جالاقىدان جانە سىياقىلاردان نەمەسە ولارعا قاتىستى سالىقتار جانە باسقا دا مىندەتتى اۋدارىمدار تولەۋدەن بوساتىلادى, وفيستە جۇمىس ىستەيتىن دۇنيەجۇزىلىك بانك قىزمەتكەرلەرى جۇبايلارىمەن جانە ولاردىڭ اسىراۋىنداعى ادامدارمەن بىرگە ەلگە كىرۋ جانە شەتەلدىكتەردى تىركەۋ بو­يىنشا شەكتەۋلەردەن بوساتىلادى. ايتا كەتەيىك, قازاقستانمەن ىنتىماقتاستىق ورناعان 1992 جىلدان بەرى دۇنيەجۇزىلىك بانك 6,8 ملرد. اقش دوللارىنان استام ينۆەستيتسيا سالدى. سونىمەن قاتار, جالپى وتىرىستا 2006 جىلعى 15 تامىزداعى رەسەي مەن قازاقستان اۋماعىندا ورنالاسقان قوس مەملەكەتتىڭ تەمىرجول ۋچاسكەلەرى بويىنشا تاسىمالداۋ تولەمدەرىن تولەۋ جانە جۇك تاسىمالدارىن رەسىمدەۋ ءتارتىبى تۋرالى ۇكىمەتارالىق كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋعا بايلانىستى زاڭ جوباسى جۇمىسقا قابىلداندى.