ورداباسى اۋدانىنا جاڭا اكىم تاعايىندالدى

استانا. 6 ءساۋىر. قازاقستان رەسپۋبليكاسى پرەزيدەنتى اكىمشىلىگى مەن ورداباسى اۋداندىق ءماسليحاتىنىڭ كەلىسىمى بويىنشا وڭتۇستىك قازاقستان وبلىسى اكىمىنىڭ وكىمىمەن ورداباسى اۋدانىنىڭ اكىمى لاۋازىمىنا الماسبەك مامىتبەكوۆ تاعايىندالدى. بۇل تۋرالى otyrar.kz سايتىنا سىلتەمە جاساعان egemen.kz ءتىلشىسى حابارلادى. الماسبەك مامىتبەكوۆ 1969 جىلى تۋعان. ءبىلىمى جوعارى, ماماندىعى – گەوگرافيا جانە بيولوگيا پاندەرىنىڭ وقىتۋشىسى, ەكونوميكا جانە بيزنەس باكالاۆرى. ەڭبەك جولىن 1984 جىلى شىمكەنت وبلىسى تۇلكىباس اۋدانىنىڭ قۇس فابريكاسىنىڭ ەلەكترومونتەرى رەتىندە باستاعان. 1996 جىلى شىمكەنت قالالىق جاستار ءىسى, تۋريزم جانە سپورت باسقارماسىنىڭ مامانى بولىپ باستاپ, مەملەكەتتىك قىزمەتكە كەلەدى. 2005-2016 جىلدارى وڭتۇستىك قازاقستان وبلىسى ىشكى ساياسات دەپارتامەنتى ديرەكتورىنىڭ ورىنباسارى, تۇلكىباس اۋدانى اكىمىنىڭ ورىنباسارى,  وبلىستىق ىشكى ساياسات باسقارماسىنىڭ باستىعى, وڭتۇستىك قازاقستان وبلىسى اكىمى اپپاراتى ۇيىمداستىرۋ-ينسپەكتورلىق بولىمىندەگى وبلىس اكىمىنىڭ باس ينسپەكتورى, «نۇر-وتان» پارتياسىنىڭ وڭتۇستىك قازاقستان وبلىسى بويىنشا فيليالى توراعاسىنىڭ ورىنباسارى جانە ءبىرىنشى ورىنباسارى, وڭتۇستىك قازاقستان وبلىسى اكىمى اپپاراتى ءباسپاسوز قىزمەتىنىڭ باسشىسى, وبلىستىق ىشكى ساياسات جانە ءدىن ىستەرى باسقارماسىنىڭ باسشىسى لاۋازىمدارىن اتقارعان. 2016 جىلدىڭ اقپان ايىنان باستاپ وڭتۇستىك قازاقستان وبلىسى ىشكى ساياسات باسقارماسىنىڭ باسشىسى بولىپ قىزمەت ەتىپ كەلدى. داستان كەنجالين. دەرەك, فوتو: otyrar.kz