Alatau Invest Capital ماشينا قۇراستىرۋ ءوندىرىسىن قولدايدى

Alatau Invest Capital مەن قوستانايداعى AllurGroup كومپانياسى اراسىندا ينۆەستيتسيا تارتۋ جانە ستراتەگيالىق سەرىكتەستىك جونىندەگى مەموراندۋمعا قول قويىلدى. ەكىجاقتى مەموراندۋم  جولاۋشىلار اۆتوموبيلدەرى, جەڭىل كوممەرتسيالىق جانە اۋىر جۇك ماشينالارى, اۆتوبۋستار ءوندىرىسىن ىلگەرىلەتۋ, قوستانايدا جالپى اۋدانى 400 گەكتار بولاتىن يندۋستريالىق ايماقتى  دامىتۋ, عىلىمي-زەرتتەۋ جانە كونس­ترۋكتورلىق بازا قۇرۋ باعىت­­­تارىنا ينۆەستيتسيا تارتۋ ماسە­لەلەرىن قامتيدى. – ءبىز ەڭ ءىرى قازاقستاندىق AllurGroup يننوۆاتسيالىق كومپانياسىمەن قوستانايدىڭ يندۋس­تريالىق ايماعى اياسىندا اۆ­توكولىك ءوندىرىسىن دامىتۋ ءۇشىن بىرلەسىپ جۇمىس ىستەيمىز. بۇل  تولىق ورىندالاتىن مىندەت. مى­سالى, SsangYong Nomad ماركالى اۆتوموبيلدەردىڭ وتاندىق بولىكتەرى بۇگىننىڭ وزىندە شامامەن 40 پايىزعا جەتتى, كوممەرتسيالىق مودەلدەردە بۇل دەڭگەي 50 پايىز بولادى. ءبىز قازاقستاندا وندىرىلەتىن قوسالقى بولشەكتەردىڭ ءتۇرىن كوبەيتپەكپىز, دەمەك, ءبىز­دىڭ ەلىمىزدە شىعارىلاتىن اۆتو­مو­بيلدەردىڭ قازاقستاندىق بولىگىن ارتتىرساق دەيمىز, – دەدى Alatau Invest Capital-دىڭ باسقارۋشى سەرىكتەسى قايرات ساتىبالدى ۇلى. AllurGroup ديرەكتورلار كەڭەسىنىڭ توراعاسى اندرەي لاۆرەنتەۆتىڭ ايتۋىنشا, كومپانيا 2018 جىلدان باستاپ قوستانايداعى يندۋستريالىق ايماق  اياسىندا, سونىڭ ىشىندە ەكسپورتقا شىعارۋ ءۇشىن جىلىنا 40 مىڭ اۆتوموبيل قۇراستىرۋدى جوسپارلاپ وتىر. – 2022 جىلعا دەيىن ءونىم شىعارۋدىڭ ورتاق كولەمى 700 ميللياردتان استام تەڭگەنى قۇرايدى, ونىڭ ىشىندە 7 جىلدىڭ ىشىندە تەك ەكسپورت كولەمى شامامەن 418 ميلليارد تەڭگە بولادى.  بۇل  جوسپارلاردى ىسكە اسىرۋ ءۇشىن 500-دەن استام جاڭا بىلىكتى جۇمىس ورنىن قۇرۋ قاجەت بولادى, ال جەرگىلىكتى ءوندىرىس دەڭگەيى 50 پايىزعا جەتەدى, – دەدى اندرەي لاۆرەنتەۆ. مەموراندۋمعا قول قويۋ شاراسىنا قاتىسقان قوستاناي وبلى­سىنىڭ اكىمى ارحيمەد مۇحام­بەتوۆ ينۆەستيتسيا تارتۋ جونىندەگى مەموراندۋم زاۋىت جۇمىسىنا جاڭا سەرپىن بەرەتىنىن ايتتى. – يندۋستريالاندىرۋ باع­دار­لاماسى بويىنشا وبلىستا 81 ينۆەستيتسيالىق جوبا جۇزەگە اسى­رىلادى, سونىڭ ىشىندە 4 جوبا اۆتوموبيل جاساۋ ىسىنە قاتىستى. AllurGroup زاۋىتتارى تۇراقتى دامىپ كەلەدى, ولار ءوندىرىستى رەتكە كەلتىرىپ, اۆتوموبيل جاساۋدى دامىتۋدا ينۆەستيتسيا تارتىپ قانا قويماي, بۇكىل ايماقتىڭ  دامۋىنا جاعداي جاسايدى», – دەدى ارحيمەد مۇحامبەتوۆ. اتالعان جوبالار كەدەن وداعى ەلدەرىندە عانا ەمەس, حالىقارالىق نارىقتا قازاقستاننىڭ باسەكەگە قابىلەتتىلىگىن ارتتىرۋعا باعىت­تالعان. ءنازيرا جارىمبەتوۆا, «ەگەمەن قازاقستان». قوستاناي.