تاۋەلسىزدىكتىڭ 25 جىلدىعىنا – 25 مىڭ كوشەت

وڭتۇستىكتىڭ جەرى قۇنارلى. شىبىقتى تەرىس قاداساڭ دا سازداۋ جەر بولسا ءونىپ كەتەدى. قولقاسىنان كوك ۋلى ءتۇتىن اقتارىلاتىن ماشينالار كوبەيگەن زاماندا ەكولوگيالىق احۋالدى وڭالتۋ ءۇشىن ورماندى القاپتاردىڭ كوبەيگەنى ابدەن كەرەك. جاقىندا وقو تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ ۇيىتقى بولۋىمەن ورداباسى اۋدانىندا «وتان اعاشى» اكتسياسى ءوتتى. جەرگىلىكتى جۇرت اۋىزىندا «لەسحوز» دەپ اتالاتىن القاپ كەزىندە قوڭىر كۇزدە جەمىسى كوزدىڭ جاۋىن الاتىنداي باۋ-باقشا بولعان ەكەن. وسىلايشا, «بادام ورمان شارۋاشىلىعى جانە جانۋارلار الەمىن قورعاۋ جونىندەگى» مەكەمەسى ورمان قورىنىڭ 60 گەكتار جەرىنە 25 مىڭ كوشەت وتىرعىزىلدى. – كوگالداندىرۋ جۇمىستارى ەلىمىزدە جاپپاي قارقىن الۋدا. «سەبەبى, بۇل ءبىزدىڭ بولاشاق ۇرپاققا, وزىمىزگە جانە تابيعات اناعا جاساپ وتىرعان سىيىمىز. بۇل يگىلىكتى ىسكە ءاربىر ازامات اتسالىسۋى قاجەت. اسىرەسە, جاستاردىڭ قاتىسۋى اسا ماڭىزدى», دەگەن بولاتىن ەلباسى ن.نازارباەۆ. وسى ورايدا جانە وبلىس اكىمى ب.اتامقۇلوۆپەن بەكىتىلگەن «قر تاۋەلسىزدىگىنىڭ 25 جىلدىعىن اتاپ ءوتۋ بويىنشا وڭتۇستىك قازاقستان وبلىسىنىڭ ءىس-شارالار جوسپارىن» ورىنداۋ ماقساتىندا 25 مىڭ ءتۇپ جەمىس اعاشى وتىرعىزىلدى. جەمىس اعاشتارىن تاڭداعان سەبەبىمىز, ولاردىڭ كوگەرگەنى, گۇلدەگەنى وتە ادەمى. ەكىنشىدەن, ءوسىپ كەلە جاتقان كەلەشەك ۇرپاققا ءوزىنىڭ جەمىسىن بەرىپ, جاستاردىڭ نازارىن اۋداراتىنداي ءبىر باۋ-باقشا بولسىن دەيمىز. وبلىس اۋماعىن جاسىل جەلەككە اينالدىرۋ ماقساتىندا قولعا الىنعان شارا الداعى ۋاقىتتا دا ءوز جالعاسىن تابادى, – دەيدى وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى مۇحيت وتارشيەۆ. وڭتۇستىك قازاقستان وبلىسىنداعى ورمان قورىنىڭ جەرى 3 132,2 مىڭ گەكتار بولسا, ونىڭ ىشىندە 1 573,7 مىڭ گەكتارى ورماندى دالا. سەكسەۋىل القاپتارى دا جىل سايىن ۇلعايىپ كەلەدى. مىسالى, وتكەن جىلى ورمان قورىنىڭ 16418 گەكتار القابىنا سەكسەۋىل تۇقىمى سەبىلگەن. سونداي-اق, وبلىس ەلدى مەكەندەرىن كوگالداندىرۋدا 3126,1 گەكتار جەرگە 1294,6 مىڭ ءتۇپ اعاش كوشەتتەرى وتىرعىزىلىپتى. جاس كوشەتتەر تەز تامىر السىن دەسەڭىز سۋدان تارىقتىرۋعا بولمايدى. ال, القاپ جانىندا دەرمەنە ءدانىن جەگەن بالىعىمەن اتى شىققان «بوگەن» سۋ قويماسى بار. ياعني, سۋدان تاپشىلىق جوق. جاسىل جەلەكتى كۇتىمگە العان ديقاندار كوشەتتەر ارالىعىنداعى بوس جەرلەرگە قاۋىن-قاربىز ەگۋدى ويلاستىرۋدا. جەمىس-جيدەك, باۋ-باقشا ونىمدەرى كوپ بولسا باعا دا ارزاندايدى. بىلاي ايتقاندا, باسقارما وسى تىندىرعان جۇمىسى ارقىلى ەكى جەپ بيگە شىعىپ وتىر. باقتيار تايجان, «ەگەمەن قازاقستان». وڭتۇستىك قازاقستان وبلىسى.