ماقسات – كولىكتىك-لوگيستيكالىق جۇيەنى دامىتۋ

قازاقستان, رەسەي جانە بەلارۋس تەمىرجولدارىنىڭ باسشىلارى بىرلەسكەن كولىكتىك-لوگيستيكالىق كومپانيا (بكلك) مودەلىن دامىتۋ جايىن ۋاعدالاستى. ماسكەۋدە «قازاقستان تەمىر جولى» ۇك» اق پرەزيدەنتى اسقار مامين, «رەسەي تەمىرجولدارى» ااق پرەزيدەنتى ولەگ بەلوزەروۆ جانە «بەلارۋس تەمىرجولىنىڭ» باستىعى ۆلاديمير موروزوۆ كەزدەسۋ بارىسىندا بكلك-نى دامىتۋ جايىن تالقىلادى. تاراپتار كومپانيانىڭ 2015 جىلى اتقارعان جۇمىسىن قورى­تىندىلاپ, بيىلعى جىل باسىنان بەرگى جۇمىسى مەن «بكلك» اق-تىڭ دامۋ بولاشاعىن قاراستىردى. كومپانيا باسشىلارى «بكلك» اق وپەراتسيالىق ءمودۋلىنىڭ نەگىزگى تارتىپتەرىن رەتتەۋدى, ونىڭ ىشىندە رەسەي فەدەرا­تسياسى, قازاقستان رەس­پۋب­ليكاسى, بەلا­رۋس رەسپۋبليكاسى اراسىن­داعى تەمىر­جول شەكاراسىنداعى سەرىك­تەس­تىك اياسىن كەڭەيتۋ جايىن كەلىستى. «بكلك» اق كونتەينەرلىك با­عىتىنىڭ نەگىزى بولىپ تابىلاتىن دوستىق/التىنكول –برەست جانە كەرى قارايعى باعىتى مەن باسقا دا قوسىمشا مارشرۋتتار تاراپتار جوبالارىنىڭ دامۋىنا سايكەس بەكىتىلەدى. تاراپتار وزدەرىنىڭ ەنشىلەس كومپانيالارى مەن قاراماعىنداعى كاسىپورىنداردىڭ بارلىعىن بىرىڭعاي تاريف ساياساتىمەن قامتۋ, سونداي-اق, ەۋرازيا اۋماعىنداعى نارىقتاعى جۇك تاسىمالداۋشىلاردىڭ دا بىرەگەي ساياسات ۇستانۋىن قولدادى. «بكلك» اق جاڭعىرتىلعان وپەراتسيالىق مودەلى نارىقتىق جاعدايدىڭ تالابىنا وراي قىزمەت قۇنىن تومەندەتۋ مەن ساپالىق دەڭگەيىن كوتەرۋ ماقساتىندا جىلجىمالى قۇرامدار مەن لو­گيس­تيكالىق كومپانيالاردى سىرتتان تارتۋعا رۇقسات بەرەدى. «بكلك» اق – ءبىز ءۇشىن ىقپالداستىق الاڭى. تاپ وسىنداي مودەل بار­لىعىمىزعا دا باستاپقىداعى جوس­پارلارىمىزدى تەڭ قۇقىقتىق نەگىزدە جۇزەگە اسىرۋعا مۇمكىندىك بەرەدى. 2015 جىلى «بكلك» اق-تىڭ جۇك تاسىمالى كولەمى ارتتى. بيىلعى جىلى ودان دا وسىرە ءتۇ­سۋدى كوزدەپ وتىرمىز», – دەپ اتاپ ءوتتى «رتج» ااق پرەزيدەنتى. ول كەزدەسۋ بارىسىندا قا­تى­سۋشىلارعا رەسەي ۇكىمەتىنىڭ «بكلك» اق اياسىندا اتقارىلىپ جات­قان جۇمىستاردان حاباردار ەكەن­دىگىن, سوعان وراي «رتج» اق-تىڭ ستراتەگيالىق ماقساتتاعى اۋقىمدى جوبامەن جۇ­مىسىن جالعاستىرۋىن قولداپ وتىرعاندىعىن جەتكىزدى. «جاڭا مودەل كونتەينەرلىك تا­سىمالدىڭ دامۋىنا ىقپال ەتەدى. ول قازىرگىدەي ايماقتاعى تاۋار اينالىمى تومەندەپ, ەكس­پورت­تىق-يمپورتتىق تاسىمال ازاي­عان تۇستا ترانزيتتىك تاسىمال­داۋ­دان قوسىمشا تابىس تابۋعا ءمۇم­كىندىك بەرەدى», – دەپ اتاپ ءوتتى «قازاقستان تەمىر جولى» ۇك» اق پرەزيدەنتى اسقار مامين. ءوز كەزەگىندە بەلارۋس تە­مىرجولىنىڭ باسشىسى ۆلا­دي­مير موروزوۆ: «بۇگىنگى تاڭدا كون­تەينەرلىك تاسىمالداۋ سەگمەنتى بىردەن-ءبىر ءوسىم بەرىپ كەلە جاتقان تۇس. بكلك جوباسى ءبىز ءۇشىن وتە ماڭىزدى. ول ءبىزدىڭ تەمىرجول اكىمشىلىكتەرىمىزگە ترانزيتتىك تاسىمالداۋ كولەمىن ارتتىرىپ, قوسىمشا جۇكتەردى تارتۋعا دا ىنتالاندىرادى», – دەپ اتاپ ءوتتى. ءسويتىپ, ءۇش ەلدىڭ تەمىرجول كوم­پانيالارىنىڭ باسشىلارى «بكلك» اق-تىڭ 2025 جىلعا دەيىنگى بيزنەس-جوسپارىن جاساۋ مەن اكتسيونەرلىك كەلىسىمدەردى تۇزۋگە ۋاعدالاستى. سونداي-اق, «بكلك» اق اك­تسيو­نەرلەرىنىڭ جالپى جينالىسى وتكىزىلدى. وندا اق-تىڭ بۇعان دەيىن ءبىرىنشى ۆيتسە-پرەزيدەنتى قىز­مەتىن اتقارعان الەكسەي گروم ءبىراۋ­ىزدان جاڭا پرەزيدەنت بولىپ سايلاندى. سونىمەن قاتار, جاڭا­دان ديرەكتورلار كەڭەسى مەن كومپانيانىڭ باسقارما قۇرامى جاساقتالدى. * * * «بىرلەسكەن كولىكتىك-لوگيس­تي­كالىق كومپانيا» اق 2012 جىلعى مامىردىڭ 31-ىندە ءبىرتۇتاس ەكو­نوميكالىق كەڭىستىكتىڭ كولىكتىك-لوگيستيكالىق جۇيەسىن دامىتۋ جونىندەگى مەموراندۋمعا جانە 2013 جىلعى 29 مامىرداعى جو­عارى ەۋرازيالىق ەكونو­ميكالىق كەڭەستىڭ شەشىمىنە سايكەس, 2014 جىلعى قاراشانىڭ 13-ىندە ەۋرازيالىق ەكونوميكالىق وداقتىڭ – قازاقستان, رەسەي, بەلا­رۋس تەمىرجولدارى اكىم­شى­لىك­تەرىنىڭ ءوزارا كەلىسىم­شارتتارىنا وراي قۇرىلعان بولاتىن. «بكلك» اق-تىڭ جارعىلىق قورى 39,7 ملرد. ءرۋبلدى قۇرايدى. كومپانيانىڭ قۇرىلتايشىلارى «رەسەي تەمىرجولدارى» ااق (99,84%), «بەلارۋس تەمىرجولى» مك (0,08%) جانە «قازاقستان تە­مىر جولى» ۇلتتىق كومپانياسى» اق (0,08%) بولىپ تابىلادى. «بكلك» اق-تىڭ 2015 جىلعى تاسى­مال كولەمى 48,3 مىڭ TEU-گە جەت­كىزىلدى. 2016 جىلى بۇل كورسەت­كىشتى 70 پايىزعا ارتتىرىپ, 80 مىڭ TEU-گە جەتكىزۋ كوزدە­لىپ وتىر. ساۋلەبەك ءبىرجان.