ۇبت-دا جاڭالىق بار

بايتاق وتانىمىزداعى مىڭ­داعان مەكتەپتەردى بىتىرگەلى وتىر­عان تۇلەكتەردىڭ كوكەيىندەگى ءبىر عانا سۇراق, بيىل ۇبت قالاي وتەر ەكەن, نە جاڭالىعى بار ەكەن دەگەنگە ساياتىنى بەلگىلى. بۇل تۋرالى ءبىلىم جانە عىلىم مينيسترلىگى تاياۋدا وسىعان قاتىس­تى بايلامىن تاراتتى. وعان كوڭىل اۋدارار بولساق, ۇستىمىزدەگى جىلى تەست تاپسىرۋ مەرزىمى ماۋ­سىم ايىنىڭ 1-ءى مەن 15-ءى ارا­لىعىندا وتەدى ەكەن. ەمتيحان تالابىندا كورسەتىلگەن شەكتى دەڭگەيدەگى بالدى جيناي الماعان بىتىرۋشىلەر ءۇشىن اعىمداعى جىلى مۇددەلىلەرگە تاعى ءبىر مۇمكىندىك جاسالماقشى. ول بويىنشا الداعى تامىز ايىندا بارلىق وبلىس ورتالىقتارى مەن استانا جانە الماتى قالالارىندا ورنالاسقان بازالىق جوعارى وقۋ ورىندارىندا ۇمىتكەرلەر ءۇشىن تەستىلەۋدى قايتا وتكىزۋ كوزدەلىپ وتىر. وسى ارادا مىنا ءبىر ماسەلەنى جۇرتشىلىقتىڭ نازارىنا سالا كەتەلىك. ۇلتتىق بىرىڭعاي تەس­تىلەۋدى قايتا تاپسىرۋعا بولاتىن جوعارى وقۋ ورىندارىنىڭ ءتىزىمى مينيسترلىكتىڭ تاراپىنان ايقىندالادى ەكەن. الدا ايتقان شەكتى دەڭگەيدى جيناي الماعان تۇلەكتەر تەستىلەۋ كەزىندە 4 ءپان بويىنشا باقتارىن سىنايدى. ول پاندەردىڭ قاتارىندا ءبىرىنشى – وقىتۋ ءتىلى, ەكىنشى – قازاقستان تاريحى, ءۇشىنشى – ماتەماتيكا, ءتورتىنشى – تاڭداۋ ءپانى, بۇل بەيىندى دەپ تە اتالادى.  تەستىلەۋگە ەكىنشى رەت قاتىساتىن تالاپكەر سىناققا قاتىسۋ ءۇشىن قانداي قۇجاتتار ازىرلەۋ قاجەت دەگەنگە بەرەر جاۋاپ: تۇرعىلىقتى جەرىنە قاراي جاقىن ورنالاسقان بازالىق جوعارى وقۋ ورىندارىنا ءوزىنىڭ ءوتىنىشىن بەرىپ, وعان قوسا 3ح4 سۋرەتىن جانە ورتا مەكتەپتى نەمەسە تەحنيكالىق جانە كوللەدج بىتىرگەندىگى تۋرالى قۇجاتتارىن تاپسىرسا بولعانى. قايتا تەستىلەۋ راسىمىنە قاتىسىپ, سىناق تاپسىراتىن تالاپكەرلەر 2 242 تەڭگە تولەيتىنىن دە نازارعا سالا كەتسەك دەيمىز. بۇل جوعارى وقۋ ورىندارىندا وقۋعا نيەت ەتكەن جاستارعا جاسالىپ وتىرعان مول مۇمكىندىك دەپ بىلەمىز. جالپى, كەيبىر ءبىلىم ۇيالارى, ياعني مەكتەپتەر وزدەرىنىڭ بەدەلىن ويلاپ, كوپ جاعدايدا ناشار وقيدى دەگەن تۇلەكتەردى تەستىلەۋگە جىبەرمەيتىن ادەت ءبى­رازدان بەرى جالعاسىپ كەلەدى. بيىل وسى ماسەلە ءوز شەشىمىن تاۋىپ, ۇمتىلعان جاستى ۇبت-عا جىبەرۋ جاعىن, وقۋشىنى الالاماي قاتاڭ ەسكەرسەك, قۇبا-قۇپ بولار ەدى. ناشار دەيتىن تۇلەك تە سول ءبىلىم ورنىنىڭ, مۇعالىمدەرىنىڭ «جەمىسى» ەمەس پە؟ سۇلەيمەن مامەت, «ەگەمەن قازاقستان».