«ەڭلىكگۇل-2016»

سىيلىقتارىنىڭ ەسىمى بەلگىسىز اتىمتاي جومارتى كىم؟ ونەر ولكەسىنىڭ وكىلدەرى وتكەن جىلى القىمنان العان قارجى­لىق داعدارىس ساحنا سالاسىنا دا سال­­­­قىنىن تيگىزگەندىكتەن, تەاتر ونەرىنىڭ كاسىبي سىيلىعى – «ەڭ­لىكگۇل» جۇلدەسى ەشكىمگە بەرىلمەي قالعانىن بىلەدى. بيىل دا وسى جاعداي جالعاسىپ, «قازمۇنايگاز» كومپانياسى تۇراق­تى دەمەۋشىلىكتەن باس تارت­قان سوڭ, قازاقستان تەاتر قايراتكەرلەرى وداعىنىڭ توراعاسى تۇڭعىشباي ءال-تارازي ءوزىنىڭ ايتۋىنشا, تانى­مالدىلىعىن العا تارتىپ, دەمەۋشى تاۋىپ, ساحنا ونەرىنە ەڭبەگى سىڭگەن تالانتتاردىڭ مەرەيى تاسۋىنا سەپ­تىگىن تيگىزدى. الايدا, كاسىبي سىي­لىقتىڭ تاعايىندالۋىنا قوماق­تى قاراجات بولگەن مەتسەنات ءوز اتى-ءجونىنىڭ قۇپيا بولۋىن قالاعان. حالىق­ارالىق تەاتر كۇنىنە وراي ءداستۇرلى «ەڭلىكگۇل-2016» جۇلدەسى التىنشى رەت يەلەرىن تاپتى. ەلى­مىز­دىڭ ءار شالعايىنداعى تەاتر ونەرى مايتالماندارىنىڭ باسىن توعىستىرعان سالتاناتتى ماراپاتتاۋ ءراسىمى الماتىداعى م.لەرمونتوۆ اتىنداعى مەملەكەتتىك اكادە­ميا­لىق ورىس دراما تەاترىندا ءوتتى. بىردەن ايتا كەتەلىك, بيىلعى بايقاۋعا 41 تەاتردان 137 ۇسىنىس كەلىپ تۇسكەن. قازاقستان تەاتر قاي­رات­كەرلەرى وداعىنىڭ قازىلار القا­سى ساراپقا سالا كەلە, الدىمەن ىنتا­لاندىرۋ سىيلىقتارىن تابىستادى. «جىلدىڭ ەڭ ۇزدىك جارىق بەرۋ­شىسى» اتالىمى بويىنشا شى­عىس قازاقستان وبلىستىق ورىس دراما تەاترىنىڭ قىزمەتكەرى اناتولي كوبلوۆ ماراپاتتالدى. «جىلدىڭ مۋزىكالىق كوركەم­دەۋشىسى» سىيلى­عىنا استاناداعى م.گوركي اتىن­داعى اكادەميالىق ورىس دراما تەاترىنان نەيليا تەرەحينا لايىق دەپ تانىلسا, «جىلدىڭ تەاتر مەنەد­جەرى» اتالىمىن س.سەيفۋللين اتىن­­داعى قاراعاندى وبلىستىق دراما تەاترىنىڭ بەلدى قىزمەتكەرى سان­­سىزباي بەكبولاتوۆ يەلەندى. «جىل­دىڭ تەاترتانۋشىلىق ماقا­لاسى» جۇلدەسى استانالىق تەاتر­تانۋشى ايزات قادىراليەۆاعا بۇيىردى. سول سياقتى, «جىل دراماتۋرگى» سىي­لىعى ت.ءجۇر­گەنوۆ اتىنداعى ۇلت­تىق ونەر اكا­دەمياسىنىڭ وقىتۋ­شىسى ءانناس باعداتقا بەرىلدى. كىناز ونەردىڭ كىلتىن تاپقان ءانناس وسىمەن ەكىنشى رەت «ەڭلىكگۇلدىڭ» ەڭ مىقتى دراماتۋرگى اتانىپ وتىر. «تەاتر وركەسترىنىڭ جىل ءارتيسى» اتاعىن قاراعاندى اكادەميالىق مۋزىكالىق كومەديا تەاترىنىڭ ونەرپازى ناتاليا حان السا, جىل­دىڭ «سۋرەتشى-گريمەرى» ءجۇل­دەسىنە وڭتۇستىك قازاقستان وبلىس­تىق ورىس دراما تەاترىنىڭ گري­مەرى تاجەن بالاباەۆا لايىق دەپ تابىلدى. الماتىداعى م.اۋەزوۆ اتىن­داعى قازاق مەم­لەكەتتىك اكادە­ميا­لىق دراما تەاتردىڭ تابالدىرىعىن 15 جاسىندا اتتاپ, ءبىرىنشى بولىپ ەڭلىك ءرولىن ويناعان اكتريسا ايشا ابدۋلينا دا بيىل 100 جاسقا كەلدى. ياعني, بيىل كاسىبي قازىلار القاسى ءبىراۋىزدان ول كىسىنى «تەاتر ونەرىن دامىتۋعا قوسقان ۇلەسى ءۇشىن» سىيلىعىنا لايىق دەپ تاپقان. وسىدان كەيىن الماتى قالا­لىق قۋىرشاق تەاترىنان ايدىن جاقىپباەۆ «بالالارعا ار­نالعان سپەكتاكلدەگى جىلدىڭ شىعار­ماشىلىق جۇمىسى» ءجۇل­دەسىمەن ماراپاتتالدى. جام­بىل وبلىستىق دراما تەاترى­نىڭ قىلقالام شەبەرى راحات ساپاراليەۆا «جىل تەاتر سۋرەت­شىسى» اتانسا, استانا جاستار تاەترىنىڭ رەجيسسەرى نۇرقانات جاقىپباي بيىل «جىل رەجيسسەرى» اتالىمىن جەڭىپ الدى. «جىل اكتريساسى» جۇلدەسى بويىنشا استاناداعى قاليبەك قۋا­نىش­باەۆ اتىنداعى قازاق مۋزىكالىق دراما تەاترىنىڭ اكتريساسى اينۇر بەر­مۇحا­مەدوۆا­نىڭ باعى جاندى. «جىل اكتەرى» سىيلىعىن اقتاۋ قالاسىنداعى ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترىنىڭ مايتالمانى مەدعات ومىراليەۆ الىپ كەتتى. بۇل جۇلدەگەرلەردىڭ بار­لى­عى 1 ميل­ليون تەڭگەنىڭ قارجىلاي سىي­لىعىنا يە بولدى. ءبىر قى­زىعى, بيىل قازاقستان تەاتر قايرات­كەرلەرى وداعى «جىلدىڭ وپەرالىق (وپەرەتتا) بالەتتىك پارتياسى» سىيلىعىنا ۇسىنىلعان ەكى ۇجىمدى جۇلدەگە لايىق كورمەگەندىكتەن, ونىڭ قاراجاتىن وداق­پەن قويان-قولتىق جۇمىس ىستەگەن قاراعاندى اكادەميالىق مۋزىكالىق كومەديا تەاترى, وڭتۇستىك قازاقستان وب­لىس­تىق سايرام وزبەك تەاترى, وڭتۇستىك قازاقستان وبلىستىق ورىس دراما تەاترى, ن.بەكەجانوۆ اتىنداعى قىزىلوردا وبلىستىق مۋزىكالىق دراما تەاترى مەن شىعىس قازاقستان وبلىستىق دراما تەاترلارىنا ءبولىپ بەردى. ايناش ەسالي, «ەگەمەن قازاقستان». الماتى.