ىشكى ىستەر قىزمەتىن جەتىلدىرەتىن كەڭەس

كەشە ورتالىق كوممۋنيكاتسيالار قىزمەتىندە قازاق گۋمانيتارلىق زاڭ ۋنيۆەرسيتەتىنىڭ قىلمىستىق-پروتسەستىك زەرتتەۋلەر جانە سىبايلاس جەمقورلىققا قارسى ءىس-قيمىل عزي ديرەكتورى, ءىىم جانىنداعى قوعامدىق كەڭەس توراعاسى, پرەزيدەنت جانىنداعى قۇقىق قورعاۋ ورگاندارىنداعى كادر ساياساتى جونىندەگى مەملەكەتتىك كوميسسيا مۇشەسى مارات قوعاموۆ ارنايى بريفينگ وتكىزدى. اتالعان شارا ءىىم جانىنداعى قوعامدىق كەڭەسى جانە اۋماقتىق ءىىد-ءنىڭ جانىنداعى كونسۋلتاتيۆتىك-كەڭەسشى ورگانداردىڭ جۇمىسىنا ارنالدى. نەگىزىنەن بۇل جۇمىس «100 ناقتى قادام» – ۇلت جوسپارىنىڭ 31-ءشى قادامىن جۇزەگە اسىرۋدان تۋىنداپ وتىرعانى بەلگىلى. بۇعان دەيىن قابىلدانعان «قوعامدىق كەڭەستەر تۋرالى» زاڭنىڭ تالاپتارىنا سايكەس, ىشكى ىستەر مينيسترلىگى قوعامدىق كەڭەستى قۇرۋ جونىندەگى جۇمىس توبىنىڭ مۇشەلەرىن سايلاۋ تۋرالى كونكۋرس جاريالاعان ەدى. سونىمەن بىرگە, ۇستىمىزدەگى جىلدىڭ 12-21 اقپانىندا اتالعان كەڭەس مۇشەلەرىن سايلاۋ تۋرالى كونكۋرس جاريالانىپ, ونىڭ ەرەجەسىنىڭ جوباسى دا ازىرلەنگەن بولاتىن. قوعامدىق كەڭەس قۇرامىنا كىرۋگە نيەت بىلدىرگەن كانديداتتاردان 32 ۇسىنىس ءتۇسىپ, جاريالانعان كونكۋرس قورىتىندىسى بويىنشا جۇمىس توبىنىڭ قۇرامى جاساقتالدى. ونىڭ قۇرامىنا بەلگىلى قوعام قايراتكەرلەرى, حالىقارالىق جانە رەسپۋبليكالىق قوعامدىق ۇيىمدار وكىلدەرى, قۇقىق قورعاۋشىلار (بارلىعى ازاماتتىق قوعامنان 12 مۇشە, ءىىم-نەن 5 وكىل) كىرىپ وتىر. وسىعان وراي, اعىمداعى جىلعى 29 اقپاندا قوعامدىق كەڭەستىڭ ءبىرىنشى ۇيىمداستىرۋشىلىق وتىرىسى وتكىزىلىپ, وندا توراعا, حاتشى جانە كەڭەس پرەزيديۋمىنىڭ بارلىق قۇرامى سايلاندى. قوعامدىق كەڭەستىڭ قازىرگى توراعاسى مارات قوعاموۆ ءمالىم ەتكەنىندەي, ىشكى ىستەر ورگاندارى جۇيەسىندە قوعامدىق كەڭەستەر 2007 جىلدان بەرى جۇمىس ىستەپ كەلەدى ەكەن. سونىڭ بارىسىندا وسى ىشكى ىستەر ورگاندارى جۇيەسىندەگى قوردالانعان تاجىريبەلەر جاقىندا قابىلدانعان زاڭدىق قۇجاتتا كورىنىس تاۋىپتى. توراعا, سونداي-اق, قوعامدىق كەڭەستە ەكى كوميسسيا قۇرىلعاندىعىنان دا حاباردار ەتە كەتتى. ونىڭ ءبىرىنشىسى قۇقىقتىق-شىعارماشىلىق قىزمەت ماسەلەلەرى جونىندەگى كوميسسيا بولسا, ول ءىىم-دە ازىرلەنەتىن ازاماتتاردىڭ قۇقىقتارىنا, بوستاندىقتارى مەن مىندەتتەرىنە قاتىستى نورماتيۆتىك-قۇقىقتىق اكتىلەر جوبالارىن قارايتىنى ەرەكشە اتالدى. سونداي-اق, ءىىم-دە ازاماتتاردىڭ ارىزدارىن قاراۋعا جانە پوليتسيا قىزمەتىنىڭ اشىقتىعىن قامتاماسىز ەتۋگە قاتىستى ماسەلەلەر جونىندەگى كوميسسيا دا قۇرىلىپ وتىر. نەگىزىنەن جاڭادان قۇرىلعان قوعامدىق كەڭەس جونىندەگى بارلىق اقپاراتپەن ۆەدومستۆولىق ۆەب-پورتالدان تانىسۋعا بولادى. وندا قوعامدىق كەڭەستىڭ جانە ونى قۇرۋ جونىندەگى جۇمىس توبىنىڭ قۇرامى, ەرەجە, بۇيرىقتار, كەڭەس وتىرىسىنىڭ حاتتاماسى, ازاماتتاردى قابىلداۋ تۋرالى حابارلاندىرۋ جانە وزگە دە اقپاراتتار ورنالاستىرىلعان. ونىڭ ۇستىنە قوعامدىق كەڭەس ايىنا ەكى رەت ازاماتتاردى جەكە قابىلداۋدى جۇزەگە اسىراتىن بولادى. سونىمەن قاتار, ازاماتتار قوعامدىق كەڭەسكە ۆەدومستۆولىق سايت نەمەسە «ەلەكتروندى ۇكىمەت» پورتالى ارقىلى جۇگىنە الادى. بۇدان باسقا, ءىىم-ءنىڭ ورتالىق عيماراتىنىڭ كىرەبەرىسىندە جەكە پوشتا جاشىگى ورناتىلعان. وسىندا تۇسەتىن بارلىق حاتتار قوعامدىق كەڭەستىڭ قاراۋى ءۇشىن تىكەلەي بەرىلەتىن بولادى. سونداي-اق, «ىشكى ىستەر ورگاندارى تۋرالى» زاڭعا سايكەس, بارلىق وڭىرلىك ءىىد-دە ءبىرىنشى باسشىلاردىڭ بۇيرىقتارىمەن كونسۋلتاتيۆتىك-كەڭەسشى ورگاندار قۇرىلىپ, ادەپ نورمالارىن بۇزعان پوليتسيا قىزمەتكەرلەرىنىڭ ارەكەتتەرىنە قاتىستى ازاماتتاردىڭ ارىزدارىن قاراۋ وكىلەتتىگى دە بەرىلگەن. وڭىرلەردەگى ءىىد كونسۋلتاتيۆتىك-كەڭەسشى ورگاندارىنىڭ جۇمىس پراكتيكاسى ءىىم-ءنىڭ كادر جۇمىسى دەپارتامەنتىمەن اي سايىن قارالادى جانە تالدانىلادى. ءىىم جانىنداعى قوعامدىق كەڭەس توراعاسى بۇل رەتتە وڭىرلەردە ءتيىمدى كەزدەسۋلەر بولىپ وتكەندىگىن, سونىڭ ناتيجەسى بويىنشا ناقتى قىزمەتتىك جازبالار مەن ۇسىنىمدار جولدانعانىن ەرەكشە اتاپ كەتتى. بۇل ۇسىنىمدار ىشكى ىستەر ورگاندارى جۇيەسىن جەتىلدىرۋگە وزىندىك ۇلەسىن قوساتىن بولادى. اسقار تۇراپباي ۇلى, «ەگەمەن قازاقستان».