باتىس قازاقستان وبلىسىنا اكىم تاعايىندالدى

استانا. 26 ناۋرىز. بۇگىن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ جارلىعىمەن باتىس قازاقستان وبلىسىنىڭ اكىمى بولىپ التاي كولگىنوۆ تاعايىندالدى. بۇل تۋرالى egemen.kz ءتىلشىسى حابارلادى. پرەمەر-مينيستر كارىم ءماسىموۆ پەن قازاقستان پرەزيدەنتى اكىمشىلىگىنىڭ جەتەكشىسى نۇرلان نىعماتۋللين الدىمەن وبلىستىق ءماسليحات دەپۋتاتتارىنىڭ تالقىسىنا ايماقتىڭ جاڭا باسشىسىنىڭ كانديداتۋراسىن ۇسىندى. حالىق قالاۋلىلارى التاي كولگىنوۆتى قولداپ, ءبىراۋىزدان داۋىس بەردى. وسىدان كەيىن جاڭا اكىم وبلىس اكتيۆىنە تانىستىرىلدى. التاي سەيدىر ۇلى كولگىنوۆ 1978 جىلى تۋعان. ق. ياسساۋي اتىنداعى حالىقارالىق قازاق-تۇرىك ۋنيۆەرسيتەتىن, قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىن, شوتلانديانىڭ ابەردين ۋنيۆەرسيتەتىن بىتىرگەن. التاي كولگىنوۆ 2000 جىلى اسكەر قاتارىنان ورالعان. 2001-2008 جىلدارى ادىلەت مينيسترلىگىندە, مەملەكەتتىك قىزمەت جونىندە اگەنتتىك پەن باس پروكۋراتۋرادا ءارتۇرلى قىزمەتتەر اتقارعان. 2008-2010 جىلدارى «الاش مەديا گرۋپپ» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورىنىڭ ورىنباسارى, 2010-2012 جىلدارى قازاقستان پرەزيدەنتى اكىمشىلىگىنىڭ مەملەكەتتىك باقىلاۋ جانە ۇيىمداستىرۋ-تەرريتوريالىق جۇمىستار ءبولىمىنىڭ باس ينسپەكتورى بولعان. 2012 جىلدىڭ اقپانىنان 2013 جىلدىڭ ساۋىرىنە دەيىن باتىس قازاقستان وبلىسى اكىمىنىڭ ورىنباسارى بولىپ ىستەدى. ال 2013 جىلدىڭ ءساۋىر ايىنان بەرى ورال قالاسىنىڭ اكىمى بولىپ قىزمەت اتقارىپ كەلگەن. تەمىر قۇسايىن. دەرەك: egemen.kz. فوتو: oraloniri.kz.