تاراز. 24 ناۋرىز. تاراز قالاسىندا «بلوگقۇرىلتاي-2016: تاراز» شاراسى ءوتتى. بۇل تۋرالى egemen.kz ءتىلشىسى حابارلادى.
قازاق ەلىنىڭ ينتەرنەتتەگى ءيميدجىن كوتەرەتىن توپتار قالىپتاستىرۋ, مەملەكەتتىك يدەولوگيانى ينتەرنەت ارقىلى جۇزەگە اسىرۋ, جاستاردىڭ مۋلتيمەديالىق جاڭا تەحنولوگيالاردى مەڭگەرۋىنە ىقپال ەتۋ, ساپالى پىكىرتالاس مادەنيەتىن قالىپتاستىرۋ, بلوگشىلاردىڭ جاڭا ەليتارلى ورتاسىن قۇرۋ, قازاق تىلىندەگى بلوگتارعا قاتىستى زاڭنامالىق ماسەلەلەردى تالداۋدى باستى ماقسات ەتكەن ءىس-شارا وسىمەن التىنشى رەت وتكىزىلۋدە. قازىرگى اقپارات عاسىرىندا الەۋمەتتىك جەلىلەر مەن عالامتوردى ءتيىمدى پايدالانۋدا بلوگشىلاردىڭ ازاماتتىق قوعامدى قالىپتاستىرۋدا قوسار ۇلەستەرى زور. ەلىمىزدە بۇگىنگى كۇنى 300-گە جۋىق قازاق تىلىندە بلوگتار بار. «بلوگقۇرىلتاي-2016: تاراز» شاراسى جاڭا مەديا ماماندارىنىڭ, سايت جاساۋشىلاردىڭ ءوزارا تاجىريبە الماسۋ الاڭىنا اينالدى. وعان استانا مەن الماتى قالالارىنان جانە وزگە دە وڭىرلەردەن 200-دەن اسا بلوگشىلار مەن قوناقتار قاتىستى.
قۇرىلتاي اياسىندا تاجىريبەلى مامانداردىڭ جۇرگىزۋىمەن ءتۇرلى باعىتتاردا دارىستەر وقىلىپ, ەڭ ۇزدىك پرەزەنتاتسيالار مەن ستارت-اپتار تانىستىرىلدى. وزگە وڭىردەن جينالعان بلوگشىلار كونە قالانىڭ تاريحي-مادەني جادىگەرلەرمەن جانە الەۋمەتتىك ماڭىزدى نىساندارىن ارالاپ, قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي «كونە تاراز» تاريحي-مادەني ورتالىعىندا اعاش وتىرعىزدى.
ورالحان ءداۋىت.
دەرەك: egemen.kz
سۋرەت: اقادىل رىسماحان.
