قۇسقاناتى

ناۋرىزدا جاۋعان قاردى حالقىمىز جاقسى ىرىمعا جوريدى. بۇل كەزدە قار جاۋسا, جىل جاقسى, استىق مول بولادى دەپ بولجام جاسايدى. شىنتۋايتىنا كەلگەندە, وسى ءبىر حالىقتىق كۇنتىزبە كوپ جاعدايلاردا دالمە-ءدال, اينىماي كەلىپ جاتاتىن كورىنىستەر تابيعاتتا ءجيى كەزدەسەدى. ايتايىن دەگەنىمىز, 22 ناۋرىز – ۇلىستىڭ ۇلى كۇنى اقجايىق اسپانىنان جاپالاقتاپ جاۋعان اقشا قار كەشكە دەيىن ءبىر تولاستامادى. ءبىر تىنبادى. ناۋرىزدىڭ اقشا قارى وسىلايشا اقجايىق اتىرابىن ءبىر دەمدە اق كورپەگە ورادى دا تاستادى. اپپاق قار, كىرشىكسىز اق كوڭىلدەر ادامداردىڭ الداعى ارماندارىنا جول اشقانداي كۇن بولدى. ناۋرىزدىڭ اقشا قارى جونىندە حالقىمىزدىڭ اۋىز ادەبيەتىندە دە ايتىلاتىن ءاپسانالار از ەمەس. سونىڭ ءبارى تەك تامسانۋمەن جانە شەكسىز سۇيىسپەنشىلىكپەن ايتىلادى. مىنە, قاراڭىز! «قىز جىبەك» ەپوسىندا بىلاي دەلىنبەۋشى مە ەدى. قىز جىبەكتىڭ اقتىعى, ناۋرىزدىڭ اقشا قارىنداي. اق بەتىنىڭ قىزىلى, اق تاۋىقتىڭ قانىنداي. تاماشا ەمەس پە؟! ءسۇرى قاردى ەرىتىپ, جەردىڭ بەتىنىڭ جىلۋىنا جول اشاتىن بۇل قاردى قۇسقاناتى دەيدى حالقىمىز. ناۋرىزدىڭ وسى اقشا قارى الداعى ىرىس كوزىنە, مەرەكە باستاۋىنا اينالسىن! تەمىر قۇسايىن, «ەگەمەن قازاقستان». باتىس قازاقستان وبلىسى.