بوتەنسىڭ دەپ بولەكتەمەيتىن ەل

قازاقستان حالقى اس­سامبلەياسى – ەلىمىزدەگى ماڭگى دوستىقتىڭ كەپىلى. ءبىز اتا-بابالارىمىز باسىنان كەشىرگەن قاسىرەتتى ۇمىتقان جوقپىز. ستاليندىك رەپرەسسيا, باسقا دا قۋعىنعا ۇشىراعان حالىقتار سياقتى كورەي حالقىنا دا وڭاي تيگەن جوق. قابىرعالارى شۇرىق­تەسىك اجال ۆاگوندارىمەن قيىر شىعىستان قازاقستانعا جەتكەنشە اشتىقتان, سۋىقتان جۇزدەگەن باۋىرلارىمىز جارىق دۇنيەمەن قوشتاسىپ جاتتى. ولاردى ەشكىم جەرلەگەن دە جوق, ءولى دەنەلەرى ۆاگوننان لاقتىرىلىپ, يت پەن قۇسقا جەم بولدى. ءبىز مۇنشالىق قاسىرەتتى اتا-انالارىمىزدان ەستىپ وستىك. ول كەزدە ولار ويىن بالاسى بولسا دا وسىنىڭ ءبارىن جۇرەگىنەن وتكىزدى, ەرتە ەسەيدى. اتاپ كورسەتەتىن جايت, ارىپ-اشقان, اشتىق پەن اۋرۋدان ءىسىنىپ كەپكەن بابالارىمىز بەن شەشەلەرىمىز تايانىشتى قازاق حالقىنان تاپتى. تۋمىسىنان اقكوڭىل, باۋىرمال قازاق «بوتەنسىڭ» دەپ ىرگەسىن بولەكتەگەن جوق. ءوز ۇيىنەن جاي بەردى, جەپ وتىرعان تاماعىنىڭ جارتىسىمەن ءبولىستى. قازاق حالقىنىڭ باۋىرمالدىعىن اتا-بابالارىمىز وسىلاي ريزالىقپەن ايتىپ وتىراتىن. ءبىزدىڭ بۇگىنگى ءتىرى جۇرگەنىمىزگە سەبەپكەر قازاق جۇرتى بولعاندىقتان, قالاي العىس ايتپاسسىڭ؟! بۇل – قازاقستانعا زورلاپ كوشىرىلگەن بارشا ۇلتتار مەن ۇلىستار اۋلەتىنىڭ باسىنان وتكەن تاعدىر. جاقىندا وڭتۇستىكتەگى ءتۇرلى ەتنومادەني بىرلەستىكتەردىڭ جەتەكشىلەرى, وكىلدەرى باس قوسىپ, جيىن وتكىزدىك. ماجىلىسكە وقو اپپاراتى باسشىسىنىڭ ورىنباسارى – اسسامبلەيا حاتشىلىعىنىڭ مەڭگەرۋشىسى ءمۇراتالى قالمۇراتوۆ قاتىسىپ, وي-جوسپارىمەن ءبولىستى. ءبارىمىز كەڭەسىپ, «قازاق حالقىنا مىڭ العىس» مونۋمەنتىن ورناتۋعا شەشىم قابىلدادىق. ءبىز – قازاقستاننىڭ ءبىر بولشەگىمىز. باسقا وتانىمىز جوق. ەلباسىمىزدىڭ سارا ساياساتىن جۇزەگە اسىرۋ جولىندا بولاشاعىمىز ءبىرتۇتاس ماڭگىلىك ەلگە اينالۋعا كۇش-قۋاتىمىز جەتەدى. ويتكەنى, ءبىزدى قاتال تاعدىر قازاق ەلىمەن اعايىن ەتىپ تابىستىرعان. روزا پاك, كورەي ەتنومادەني بىرلەستىگىنىڭ ءتورايىمى.   وڭتۇستىك قازاقستان وبلىسى.