جاستار جاۋاپكەرشىلىگى جوعارى ەكەن

ەلىمىزدەگى پارلامەنت ءماجىلىسىنىڭ دەپۋتاتتارىن سايلاۋ بارىسىن قاداعالاۋعا شەكارا اسىپ 800-دەن استام حالىقارالىق ساراپشى جانە 150-گە جۋىق شەتەلدىك باق وكىلدەرى كەلگەن بولاتىن. قازاقستانداعى سايلاۋ ۇدەرىسىن قاداعالاۋ جۇمىستارى بويىنشا ارنايى كەلگەن شەتەلدىك ساراپشى, سەناتور جانە ناتو پا-داعى يتاليا دەلەگاتسياسىنىڭ مۇشەسى فرانكو پانيتستسادان بىرەر ساۋالعا جاۋاپ العان ەدىك. – فرانكو مىرزا, ءبىزدىڭ ەلگە قوش كەلىپسىز دەي وتىرىپ, بۇگىنگى سايلاۋ بارىسىنا بايلانىستى ءوزىڭىزدىڭ ساراپشى رەتىندەگى پىكىرىڭىزدى بىلسەك دەيمىز؟ – مەن قازاقستانعا كەل­گەنىمە قۋانىپ وتىرمىن. را­سىندا, يتاليا مەن قا­زاقستان اراسىندا دوستىق قارىم-قاتىناس ورناتىلعان. ءبىز جاس مەملەكەت رەتىندەگى قازاقستاننىڭ الەمدىك سايا­ساتتاعى ورنىنىڭ ۋاقىت ساناپ ارتىپ كەلە جاتقاندىعىن مويىندايمىز. ال سايلاۋ بارىسىنا كەلەر بولساق, داۋىس بەرۋگە كەلۋشىلەردىڭ سانىنىڭ كوپتىگى ءبىرىنشى كەزەكتە نازارىما ىلىكتى, ياعني ازاماتتاردىڭ بەلسەندىلىگى تاڭعالدىردى. سو­نىمەن قاتار, ايتا كەتۋ كەرەك, ءوز بولاشاعىنا الاڭدايتىن جاستاردىڭ سايلاۋعا كوپتەپ كەلۋى قۋانتتى. دەسەك تە, ەل تاعدىرىنا تول­عاناتىن ەگدە جاستاعى ازا­مات­تاردىڭ دا قاتارى قالىڭ بولدى. وعان سەبەپ, جاستارمەن بىردەي ۇلكەندەر دە سايلاۋ ۋچاسكەلەرىنە تاڭ اتپاي كەلىپ, داۋىس بەرۋدىڭ جاۋاپكەرشى­لىگىن سەزىنەتىندىگىن اڭعارتتى. جانە دە مۇمكىندىگى شەكتەۋلى جاندارعا ارنايى جاعىمدى دا قولايلى جاعدايلار جا­سالعاندىعى كوڭىل قۋانتتى. ايتا كەتەيىك, ەل دەپۋتاتتارىن سايلاۋ ءۇشىن شەتەلدەگى قازاقستاندىقتارعا دا سول ەلدەردەن ۋچاسكەلەر اشىلىپ, داۋىس بەرۋگە مۇمكىندىكتەر قاراستىرىلعان. – وزگە مەملەكەتتەردەگى سايلاۋ بارىسىن باقىلاي وتىرىپ, ومىرلىك ءتاجىري­بەڭىزدە ءبىزدىڭ ەلدەگى نەندەي ەرەكشەلىكتەردى اتاپ ايتار ەدىڭىز؟ – جوعارىدا ايتىپ ءوت­كە­نىمدەي, جۇرتشىلىقتىڭ جاپپاي بەلسەندىلىگىن ءبىرىنشى ايتار ەدىم. جانە دە دايىندىق جاع­دايى, ۇيىمداستىرۋشىلىق جۇمىستارى, تەحنيكالىق جا­راقتار ساقاداي ساي, ازاماتتار ءوز ىسىنە جاۋاپتى بولعانىن بايقادىم. سونىمەن قاتار, سايلاۋ كەزىندە ەشقانداي ولقىلىقتاردى كەزدەستىرگەنىم جوق, ياعني زاڭ نورمالارى ساق­­تالعان, بارلىق تالاپتار­عا ساي وتۋدە. ءبىر قىزىعى – ساي­­لاۋ كۇنى تۋعان نارەس­تە­لەرگە ادەمى سىيلىقتار تا­عايىندالعانى تاڭعالدىردى. بۇل دەگەنىڭىز – جۇرتشىلىقتىڭ قىزىعۋشىلىعى مەن قۇرمەتىن ارتتىرۋ دەگەندى بىلدىرەدى. ءبىر عانا سايلاۋ ۋچاسكەسىندە تۇسكە دەيىن-اق 700-گە جۋىق ادام داۋىس بەرىپ ۇلگەرگەنىن كوردىك. بۇل دا اۋىز تولتىرىپ ايتارلىقتاي ۇلكەن كورسەتكىش, جوعارى باعاعا لايىق جاعداي. مەنىمەن بىرگە كەلگەن يتاليالىق ماماندار دا جاستاردىڭ جاپپاي بەلسەندىلىگىن ايتىپ جاتىر. مەنىڭ دە بايقاعانىم وسى جاعدايلار بولدى. الداعى ۋاقىتتا قازاقستان مەملەكەتىنە مول تابىستار تىلەيمىن! – راحمەت. اڭگىمەلەسكەن ەلميرا ماتىباەۆا, «ەگەمەن قازاقستان».