ەل بولاشاعى ءۇشىن ماڭىزى زور

پارلامەنت ءماجىلىسى جانە بارلىق دەڭگەيدەگى ءماسليحاتتار سايلاۋىن قاداعالاۋعا ءبىر مىڭعا جۋىق حالىقارالىق بايقاۋشى تىركەلسە, ولاردىڭ ءبىر لەگى قىزىلجار وڭىرىندە ءجۇر. ءبىز رەسەيدىڭ تۇمەن وبلىسى سايلاۋ كوميسسياسىنىڭ توراعاسى يگور حاليندى س.مۇقانوۆ اتىنداعى امبەباپ كىتاپحانادا ورنالاسقان №635 سايلاۋ ۋچاسكەسىندە جولىقتىرىپ, ءوتىپ جاتقان سايا­سي ناۋقان بارىسى جايلى وي بولىسكەن ەدىك. – يگور نيكولاەۆيچ, قازاق­ستانداعى سايلاۋ ناۋقاندارىنا رەسەيلىكتەر ۇنەمى ۇلكەن قى­زىعۋشىلىق تانىتادى. ونىڭ سىرى نەدە دەپ ويلايسىز؟ – ەسكە سالا كەتەيىن, بىلتىر قازاقستان پرەزيدەنتىنىڭ كەزەكتەن تىس سايلاۋىن قاداعا­لاۋعا تۇمەن جاعىنان جيىرمادان استام بايقاۋشى كەلىپ, دايىندىق جۇمىستارىنا, داۋىس بەرۋ بارىسى مەن داۋىستاردى ساناۋ راسىمىنە جوعارى باعا بەرگەن بولاتىن. ەشقانداي زاڭبۇزۋشىلىقتاردىڭ ورىن الماعانىن تىركەگەن. بۇل جولى دا وسى ۇردىستەن اۋىتقىماعانىنا, بارعان سايىن دەموكراتيالىق قۇندىلىقتاردىڭ ورنىعا تۇسكەنىنە انىق كوز جەتكىزىپ وتىرمىز. قازاقستان مەن رەسەيدىڭ شەكارالاس ايماقتارىنداعى سايلاۋ ورگاندارى اراسىنداعى قارىم-قاتىناس پەن ىنتىماقتاستىقتان ۇتارىمىز كوپ. وسىندا كەلەر الدىندا سايلاۋعا ازىرلىك جۇرگىزۋ تۋرالى اقپاراتتارمەن تانىستىم. باسەكەلى دودادا باعىن سىناۋدى ۇيعارعان بارلىق پارتيالارعا تەڭ قۇقىقتار مەن مۇمكىندىكتەردىڭ بەرىلۋى, اقپاراتتىق ۇگىت-ناسيحات شارالارى شەڭبەرىندە بىردەي قولجەتىمدىلىكتىڭ بولۋى ءتۇرلى ساياسي ۇيىمدار اراسىندا ءوزارا تۇسىنىستىككە, بىرلىككە, ورتاق ماقسات جولىنداعى كۇش-جىگەردى ءبىر ارناعا تولىقتىرۋعا جول اشاتىنى, اۋقىمدى رەفورمالار مەن باعدارلامالاردى ىسكە اسىرۋعا جەتەلەرى ءسوزسىز. بۇل جاعىنان قازاقستاننان ۇيرەنەرىمىز كوپ. مەن 2004 جىلدان بەرى ساياسي ناۋقانداردى قاداعالاۋعا ۇزبەي قاتىسىپ كەلەمىن. تاجىريبەمنەن انىق بىلەتىنىم, جىل وتكەن سايىن سىزدەردە سايلاۋ جۇيەسى جەتىلدىرىلىپ, زاڭناما اياسىندا ءوتىپ كەلەدى. سايلاۋشىلاردىڭ بەلسەندىلىگى دە اسا جوعارى. اسىرەسە, مۇنداي قاسيەتتەردى جاس­تار اراسىنان ءجيى كەزدەستىرۋگە بولادى. دەموكراتيالىق ۇردىستەردى دامىتىپ, قالىپتاستىرۋ جاعىنان تاۋەلسىز مەملەكەتتەر دوستاستىعى اراسىندا العا شىعاتىندارىڭىز تالاس تۋدىرمايدى. – وعان جەرگىلىكتى جەرلەردەن ناقتى مىسالدار كەلتىرە الاسىز با؟ – ارينە. وبلىس ورتالىعى مەن اۋداندارداعى سايلاۋ ۋچاسكەلەرىنە اتباسىن تىرەگەنىمىزدە سايلاۋعا ازىرلىكتىڭ جوعارى دەڭگەيدە ۇيىمداستىرىلعانىن, سايلاۋشىلار قاراسىنىڭ مولدىعىن, ولاردى ءوز وتانىنىڭ بولاشاعى, وسكىن ۇرپاقتىڭ ەرتەڭگى ءومىرى بەيجاي قالدىرمايتىنىن اڭعارعانىمدى اتاپ وتكىم كەلەدى. تۇسكە دەيىن 17 سايلاۋ ۋچاسكەسىنە بارىپ, ۇلكەنمەن دە, كىشىمەن دە ەمەن-جارقىن تىلدەستىك. قاي-قايسىسىنىڭ بولسىن كوڭىل-كۇيى ەرەكشە. ماسەلەن, پەتروپاۆل قالاسىنداعى تەمىرجول كوللەدجىندە ورنالاسقان № 705 سايلاۋ ۋچاسكەسىندە تاڭعى ساعات 10-عا دەيىن بارلىق سايلاۋشىلاردىڭ ۇشتەن ءبىرى ءوز تاڭداۋلارىن جاساپ ۇلگىرگەنىنە كۋا بولدىق. كابينالار جەتكىلىكتى. كەزەكتە ىركىلىس جوق. ءبىزدىڭ ميسسيامىزدا العا قويعان ۇستانىم– كەمشىلىك-ولقى­لىقتاردى تەرمەلەۋ ەمەس, كەرىسىنشە, سايلاۋدى ۇيىمداستىرۋ جۇمىستارىن ءجىتى باقىلاۋ, ۇلگى الار جاڭالىقتار مەن باس­تامالاردى بويىمىزعا ءسىڭىرۋ, ويعا توقۋ, تاجىريبەگە اينالدىرۋ. وسى تۇرعىدان باعا بەرەتىن بولساق, پارلامەنت ءماجىلىسى مەن وبلىستىق, اۋداندىق, قالالىق ءماسليحاتتار سايلاۋى ادىلەتتى, حالىقارالىق تالاپتارعا سايكەس ءوتىپ جاتتى دەپ باتىل ايتا الامىن. ەڭ باستىسى, قازاقستاندا الەۋمەتتىك احۋال, ەكونوميكالىق ءوسىم ورنىقتى. مۇنىڭ ءبارى ادام­داردىڭ كوڭىل-كۇيى مەن ءومىر ءسۇرۋ ساپاسىنا ايتارلىقتاي اسەر ەتەدى. بۇگىنگىدەي قايشىلىقتى, كۇردەلى گەوساياسي جاعدايدا ەل تۇتاستىعى ءۇشىن تاڭداۋ جاساۋدىڭ ماڭىزى زور.  اڭگىمەلەسكەن ءومىر ەسقالي, «ەگەمەن قازاقستان».  سولتۇستىك قازاقستان وبلىسى. سۋرەتتى تۇسىرگەن امانگەلدى بەكمۇراتوۆ.