بىرلىكتىڭ ۇلگىسىن كورسەتتى

جىلدىڭ باستى ساياسي ناۋقانى ءوز مارەسىنە دە جەتتى. سايلاۋ بارىسى قالاي ءوتتى؟ وعان قىزىلوردالىقتار قالاي اتسالىستى؟ وسى تەكتەس سۇراقتاردى سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ قىزىلوردا وبلىسى بويىنشا وڭىرلىك ورتالىعىنىڭ توراعاسى ماقسۇت دوسجانوۆقا قويدىق. – بۇگىنگى سايلاۋداعى قىزىل­وردالىقتاردىڭ بەلسەندىلىگى قانداي؟ –قىزىلوردا قالاسى جانە جەتى اۋدان بويىنشا سايلاۋ ۋچاسكەلەرى تاڭعى ساعات 7-دە ءوز جۇمىستارىن باستاپ كەتتى. ايماقتاعى 325 ساي­لاۋ ۋچاسكەسىندە سايلاۋ­دى باقىلايتىن قوعامدىق كو­ميس­سياسىنىڭ وكىلدەرى ءوز كۋا­لىكتەرىمەن, ادىستەمەلىك نۇس­قاۋ­لارىمەن جۇمىستارىنا كىرىستى. ايتا كەتەيىن, بايقاۋشىلار قا­تارىنا ەڭ بەلسەندى, جاۋاپتى ازاماتتار مەن جاستار تارتىلدى. بارلىق سايلاۋ ۋچاسكەلەرىندە بايقاۋشىلار ءۇشىن الدىن الا سەمينار-ترەنينگتەر وتكىزىلدى. جالپى, ءجۇ­يەلى جۇمىستىڭ ناتيجەسىندە وتكەن سايلاۋدى تولىق نازاردا ۇستاي بىلدىك. جەكسەنبى كۇن بول­عاندىقتان با, تاڭعى ساعات 9-عا دەيىن سايلاۋ ۋچاسكەلەرىنە داۋىس بەرۋشىلەر اعى­لىپ كەلدى. سودان سوڭ ءبىر جارىم سا­عاتتاي ادام اياعى از-ماز باسىل­دى. ال ساعات ون جارىمنان كەيىن داۋى­س بەرۋشىلەردىڭ سانى قايتادان كوبەيدى. ساي­لاۋ ۋچاسكەلەرىندە بايقاۋشىلارعا بار­لىق جاعداي جا­سالعان. ءبىر قۋان­تار­لىعى, ءبىزدىڭ ەلىمىزدە ساي­لاۋ مەرەكەگە اي­نال­عان دەسەك, ارتىق ايت­قاندىق ەمەس. وسى جولعى ساي­­لاۋ دا مە­رەكەلىك كوتەرىڭكى كو­ڭىل-كۇيمەن ءوتتى. وسى­عان قاراپ, حا­لىق­تىڭ سايلاۋعا قا­تىسۋ بەلسەندىلىگىن بايقاۋعا بولادى. وبلىس بويىن­شا 400 مىڭنان استام سايلاۋ­شى تىركەلگەن. سايلاۋدىڭ قورىتىندىسى بويىنشا ءبىزدىڭ ءوڭىر بەلسەندىلىگى جاعىنان رەسپۋب­ليكادا الدىڭعى قاتاردا كورىنەدى دەپ ويلايمىن. كەلەشەكتىڭ كەمەل بولۋى – ەلدىڭ تاڭداۋى مەن بىرلىگىنە بايلانىستى. وسى رەتتە, سىربويىلىقتار ەلدىك پەن بىرلىكتىڭ ۇلگىسىن كورسەتۋدە. – سايلاۋدىڭ ناۋرىز مەرە­كەسىمەن تۇسپا-تۇس كەلۋى دە جاق­­سىلىقتىڭ نىشانى ەمەس پە؟ – البەتتە, مەرەكەگە مەرەكە قوسىلىپ جاتىر. بۇل كۇن «قوس تويىڭ قابات بولسىن, ەكى دۇنيەڭ ابات بولسىن» دەپ تىلەك قىلعان حالقىمىزدىڭ اق پەيىلىن ەسكە ءتۇسىردى. ءبىر جاعىنان, سايلاۋ مەرەكەلىك كوڭىل-كۇيمەن ءوتىپ جاتسا, ەكىنشى جاعىنان, ۇلىستىڭ ۇلى كۇنى دە تويلانۋدا. سالت-ءداستۇر ۇلىقتالىپ, ۇلتتىق ويىندار وينالىپ جاتىر. ءان-جىر شىرقالۋدا. ونىڭ ۇستىنە, اۋا رايى دا جادىراپ تۇر. ال شەتەلدىك بايقاۋشىلار وسىنىڭ ءبارىن كورىپ «سىزدەردە ءار سايلاۋ وسىلاي وتە مە؟» دەپ تاڭداي قاعا تاڭعالۋدا. – سايلاۋ كەزىندە قانداي دا ءبىر كەلەڭسىزدىك نەمەسە زاڭ­بۇزۋشىلىق كەزدەستى مە؟ – وبلىس بويىنشا سايلاۋ ۋچاسكەلەرىنىڭ كارتاسى جاساقتال­عان. باقىلاۋ شتابىنىڭ مۇشەلەرى ۋچاسكەلەردى تاڭەرتەڭنەن باس­تاپ تىنباي ارالادى. بۇعان قوسا, ءبىزدىڭ شتابقا قاراستى بارلىق باقىلاۋشىمەن Whatsap جەلىسى ارقىلى ونلاين بايلانىس­تا بولدىق. ولار بىزگە سايلاۋ ۋچاس­كەلەرىندەگى احۋالدى ءسات سايىن حابارلاپ تۇردى. تۋىنداعان ماسەلە نەمەسە سۇراق بولسا, سۋرەت ارقىلى نەمەسە ءماتىن ارقىلى جولدايدى. جالپى, سايلاۋ ايقاي-شۋسىز ءوتتى, زاڭبۇزۋشىلىق جانە ەرسى قىلىق بايقالعان جوق. – راحمەت. اڭگىمەلەسكەن ەرجان بايتىلەس, «ەگەمەن قازاقستان». قىزىلوردا وبلىسى.