زاڭ بۇزۋشىلىق تىركەلگەن جوق

سايلاۋ ۋچاسكەلەرىن ارالاۋ كەزىندە جاۋاپتى ناۋقاندى قاداعالاۋشىلار قاتارىنان سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ جەرگىلىكتى وكىلدەرىن ءجيى ۇشىراتتىق. ونىڭ سەبەبىن ءبىلۋ ماقساتىمەن قۇرىلىمنىڭ سولتۇستىك قازاقستان وبلىسى بويىنشا ورتالىعىنىڭ توراعاسى سەرگەي حۋدياكوۆتى سوزگە تارتقان ەدىك. – ونىڭ ەشقانداي قۇپياسى جوق, – دەپ باستادى ءسوزىن سەرگەي گەرول­دوۆيچ. – «ەرتە تۇرعان ەركەكتىڭ ىرىسى ارتىق, ەرتە تۇرعان ايەلدىڭ ءبىر ءىسى ارتىق» دەمەكشى, پار­لامەنت ءماجىلىسى مەن جەر­­گىلىكتى ءماسليحاتتار ساي­لاۋىنىڭ ەلىمىزدىڭ جار­قىن كەلەشەگى ءۇشىن ماڭىز­دىلىعىن سە­زىن­گەن قوعامدىق قادا­عا­لاۋ­شىلار تاس-ءتۇيىن ازىرلىكپەن كەلىپ, قۇرامىنا بىلىكتى دە ءبىلىمدى, سايا­سي, قۇقىقتىق جاعىنان ساۋاتتى 600-گە جۋىق ادام تارتىلدى. ارالارىندا جاستار كوپ. سەمي­نارلاردا قوسىمشا ءبىلىم بەرۋ مىندەتتەرى جۇكتەلىپ, ءنا­تيجەسىندە ساياسي ناۋقاندى باستان-اياق بىلگىرلىكپەن اتقارا بىلەتىن كاسىبي ماماندار شوعىرى دايىندالدى. ول ءۇشىن وبلىستىق, اۋداندىق, قالالىق ماسليحاتتارعا – 615, ساياسي پارتيالار اتىنان – 214 , ءوزىن-ءوزى ۇسىنۋ جولىمەن 401 ۇمىتكەردىڭ تىركەلگەنى, ولاردىڭ اراسىنان 217 ادامنىڭ عانا ەلەكتەن وتكەندەي دەپۋتاتتىق ماندات الاتىنى, تارتىس اسا كۇشتى بولاتىنى الدىن الا بولجانىپ, سايلاۋ, زاڭ نورمالارىن جەتىك بىلۋلەرى, ارا-جىگى ايىرىپ ءتۇسىندىرىلدى. 15 اۋماقتىق, 217 وكرۋگتىك, 697 ۋچاسكەلىك سايلاۋ كوميسسيا­لارى شەڭبەرىندە 391320 سايلاۋشى, ونىڭ ىشىندە 146 مىڭنان استامى پەتروپاۆل قالاسىندا شوعىرلانعانى ەسكەرىلىپ, نەگىزگى كۇش-ج­ى­­­گەر وبلىس ورتالىعىنا جۇ­­مىلدىرىلدى. 929 سايلاۋ كوميسسيالارى قۇ­رامىنداعى 6,5 مىڭعا جۋىق بەلسەن­دىلەرمەن, سونداي-اق, سايا­سي پارتيالاردىڭ سە­نىم­دى وكىلدەرىمەن, جاس­تار ۇيىمدارىمەن, قوعامدىق بىرلەس­تىكتەرمەن تىعىز قارىم-قاتىناس ورناتا وتىرىپ, بار نازار دەموكراتيا قۇندىلىقتارىن ساقتاۋعا اۋدارىلدى. بۇدان تىسقارى, ءار ۋچاسكەدە 50-دەن 2500-گە دەيىن, ال ورتا ەسەپپەن العاندا 560 سايلاۋشىدان كەلەتىنى دە ەسكەرىلىپ, اركىمنىڭ ءوز مىندەتىنە جاۋاپكەرشىلىگى بارىنشا ارتتىرىلدى. تاۋەلسىز مەملەكەتتەر دوستاس­تىعى اتىنان ات ءىزىن سالعان (رەسەي) 17 ءجا­نە دانيادان /ەقىۇ/ كەلگەن 1 بايقاۋ­شىمەن ىسكەرلىك بايلانىس ورناتىلىپ, بارلىق دەڭگەيدەگى سايلاۋ ۋچاسكەلەرىنە وكىلدەرىمىز جىبەرىلدى. وسىلايشا, قازاقستاننىڭ سايلاۋ جۇيەسىن جەتىلدىرۋگە بارىنشا كۇش سا­لىنىپ, ساياسي ناۋقانعا ازىرلىك قاي­ناعان قىزۋ ءىس ۇستىندە سىنالىپ, تاڭ­داۋدان قاتەلەسپەگەنىمىزدى كور­سەتتى. سايلاۋ ۋچاسكەلەرىندە ورىن العان ولقىلىقتار ءتيىستى ورىندارعا ىلە حابارلانىپ, ولاردىڭ تىزە قوسۋىمەن الدىن الۋ شارالارى قولدانىلدى. ارىز-شاعىمدار كوبىنە ءبىر جەردە تۇراقتى تىركەۋدە الىنىپ, بىراق باسقا مەكەنجايدا تۇراتىن ازاماتتار تاراپىنان تۋىنداعانىن ايتقان ءجون. بۇل ولقىلىقتار جە­كە تۇلعالار كىناسىنەن بولسا دا, ولار دەرەۋ تۇزەتىلدى. ءسويتىپ, ادامداردىڭ الاڭسىز تاڭداۋ جاساۋلارىنا تو­لىق مۇمكىنشىلىك بەرىلدى. دەن­ساۋلىعى دىمكاس, ءجۇرىپ-تۇرۋى قيىن جانداردىڭ ۇيلەرىندە داۋىس بەرۋ جايى دا قاداعالانىپ, ولارمەن بىرگە وكىلدەرىمىز ىلەسىپ ءجۇردى. ورەسكەل زاڭ بۇزۋشىلىق فاكتىلەرى ورىن العان جوق. وركەنيەتكە بەت ال­عان مەملەكەتتە زاڭ ۇستەمدىك قۇرادى. سايلاۋدى بايقاۋ جونىندەگى رەسپۋب­ليكالىق قوعامدىق كوميسسياسى جەر­گىلىكتى فيليالىنىڭ سايلاۋدىڭ ءادىل دە جوعارى دەڭگەيدە وتۋىنە ۇلەس قوسقانى ءتيىستى ورىندار تاراپىنان لايىقتى باعاسىن العانى قۋانتادى. ەڭ باس­تىسى, سايلاۋعا قاتىسقان بارلىق پار­تيالارعا تەڭ مۇمكىندىك بەرىلدى. پارلا­مەنتكە ىسكەر, كاسىبي بىلىكتىلىگى جوعا­رى ادامداردىڭ كەلۋىنە ءبارىمىز دە تىلەك­تەسپىز. جازىپ العان ءومىر ەسقالي, «ەگەمەن قازاقستان». سولتۇستىك قازاقستان وبلىسى. سۋرەتتى تۇسىرگەن امانگەلدى بەكمۇراتوۆ.