ءبىز «قازاقستان رەسپۋبليكاسىنداعى سايلاۋدى بايقاۋ جونىندەگى رەسپۋبليكالىق قوعامدىق كوميسسيا» رقب-مەن بىرلەسە وتىرىپ «جامبىل وبلىسى جاستار ۇيىمدارىنىڭ قاۋىمداستىعى» زاڭدى تۇلعالار بىرلەستىگى, «جامبىل وبلىسى جاستار ءماسليحاتى» جاستار قوعامدىق ءبىرلەستىگىنىڭ «جاس دەپۋتاتتار» كورپۋسى ءمۇشەلەرى مەن بەلسەندىلەرى تاراز قالاسىنداعى سايلاۋ ۋچاسكەلەرىندە بايقاۋشى رەتىندە قاتىستىق. باستى ماقساتىمىز – ءماجىلىس پەن ماسليحاتتارعا سايلاۋ كەزىندە ازاماتتاردىڭ, پارتيالاردىڭ, ءماسليحاتتارعا ۇمىتكەرلەردىڭ كونستيتۋتسيالىق قۇقىقتارىنىڭ ساقتالۋىن باقىلاۋ بولدى. ياعني, بۇل سايلاۋدى باقىلاۋدا جاستار دا شەت قالمادى دەگەن ءسوز.
جامبىل جەرى ەجەلدەن ماڭگىلىك ەل يدەياسىنان تۋىنداپ وتىرعان ۇلتتىق بىرلىكتى سانادا ساقتاعان, تاتۋلىقتىڭ ورداسى بولعان ءوڭىر عوي. سودان بولار اۋليەاتالىقتار سايلاۋ كەزىندە اسقان بەلسەندىلىك تانىتتى. داۋىس بەرۋگە كەلگەن جانداردىڭ قۋانىشتى جۇزدەرىنەن بۇل ساياسي ناۋقاننىڭ جاۋاپكەرشىلىگىن سەزىنىپ, وعان تىڭ دايىندىقپەن كەلگەنىن بايقادىق. جامبىلدىق سايلاۋشىلاردىڭ ءوز تاڭداۋلارىن جاساۋدا بەلسەندىلىك تانىتۋى, ارينە, ولاردىڭ بۇل جاۋاپتى ساتكە اسقان جاۋاپكەرشىلىكپەن قارايتىنىن بىلدىرسە كەرەك. بىرلىگى, ىنتىماعى جاراسقان ەلدىڭ حالقى وسىنداي ۇيىمشىل بولادى.
يسلامبەك داستان ۇلى,
بايقاۋشى.
جامبىل وبلىسى.
جاۋاپكەرشىلىك ۇلگىسى
ەل ومىرىندەگى ساياسي ماڭىزى زور ناۋقانعا بايقاۋشى رەتىندە العاش قاتىسقاندىقتان با, العان اسەرىم شەكسىز. سايلاۋدى بايقاۋ جونىندەگى رەسپۋبليكالىق قوعامدىق كوميسسياسى وبلىستىق ءمۇشەلىگىنە ىرىكتەلىپ العانىمدا ءارى-ءسارى تولقىنىستىڭ بولعانى راس. مۇنداي دودالى باسەكەلەردە تاجىريبەمنىڭ ازدىعىن بايقاعان كەي جاناشىر اعايىندار, البىرت جاستىقتىڭ قىزۋىمەن ءبىر نارسەگە ۇرىنىپ قالادى دەپ ويلاسا كەرەك, ۇسىنىستان باس تارتۋىمدى وتىنگەندەرىن دە جاسىرمايمىن. كەرىسىنشە, ەلىمىزدەگى سايلاۋدىڭ مەن ءۇشىن ۇيرەنۋ, تاجىريبە الماسۋ مەكتەبى بولعانىن قازىر مارتەبە كورەمىن. مەنى قوعامدىق كوميسسيا قۇرامىنا ەنگىزىپ, وبلىس ورتالىعىنداعى №644 سايلاۋ ۋچاسكەسىنە جىبەرگەندە قازاقستاندىق سايلاۋدىڭ دەموكراتيالىق نەگىزدە ۇيىمداستىرىلعانىنا كۋا بولدىم. سايلاۋ زاڭعا جانە حالىقارالىق نورمالارعا سايكەس ءوتىپ, اشىقتىق قامتاماسىز ەتىلدى. مۇنىڭ ءوزى داۋىس بەرۋ قولجەتىمدىلىگىن ارتتىرىپ, ەل ەرتەڭىنە دەگەن بيىك سەنىمدى قاناتتاندىردى. كۇنى بويى داۋىس بەرۋ ۋچاسكەسىندە بولىپ, ساياسي پارتيالارعا بىردەي جاعداي جاسالعانىنا كوزىم انىق جەتتى. رەسەيلىك بايقاۋشىلار دا قازاقستانداعى سايلاۋ ۇدەرىسىنىڭ ءوز دارەجەسىندە ۇيىمداستىرىلعانىن, زاڭ بۇرمالاۋشىلىقتاردىڭ ورىن الماعانىن, تاراپتاردان شاعىمدار تۇسپەگەنىن, ۇيىمداستىرۋشىلىق, ىسكەرلىك جاعىنان العاندا, كوپ ەلدەردەن الدا تۇرعانىن قاناعاتتانعاندىق سەزىممەن اتاپ كورسەتتى. قازاقستان – شىنايى دەموكراتيالىق قوعام قۇرۋدى باستى ماقسات ەتكەن ەل. ۇزاق مەرزىمدى باعدارلامالار مەن ستراتەگيالار الدىمەن حالىقتىڭ ءومىر ساپاسىن كوتەرۋدى باستى نىسانا ەتىپ, دەموكراتيالىق وزگەرىستەرگە جول اشىپ كەلەدى سايلاۋدىڭ ءادىل ءوتۋى جوعارى جاۋاپكەرشىلىك ۇلگىسىمەن قوسا سايلاۋشىلاردىڭ ازاماتتىق ۇستانىمىنىڭ بەرىك ەكەندىگىن دە تانىتتى. بۇل سايلاۋدان الار ءتالىمىمىز مول. ءاز-ناۋرىزداي عاجايىپ مەرەكەمەن تۇسپا-تۇس كەلگەن سايلاۋ شىن مانىندەگى مەرەكەلىك كوڭىل-كۇيگە ۇلاستى. ەڭ باستىسى, جاڭادان سايلانعان پارلامەنت يگى ىستەردىڭ ۇيىتقىسى, باستاۋشىسى بولاتىنىنا سەنەمىن. سايلاۋ وتكىزۋدىڭ تۇپكى ميسسياسىندا الەۋمەتتىك, ەكونوميكالىق ورەلى وزگەرىستەردىڭ جاتقانى كۇمانسىز. ولاي بولسا, بۇل سالادا حالىقارالىق تالاپتارعا نەگىزدەلگەن سايلاۋ ازىرلەۋ مەن وتكىزۋ تاجىريبەمىز دە ارتا تۇسەتىن بولادى. ومىرسەرىك باكىروۆ, سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ سولتۇستىك قازاقستان وبلىسى بويىنشا ورتالىعىنىڭ مۇشەسى. سولتۇستىك قازاقستان وبلىسى. سۋرەتتى تۇسىرگەن تالعات تانىباەۆ.بەلسەندىلىكپەن قاتار ساۋاتتىلىق تا جوعارى
– دەيدى سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ قوستاناي وبلىسى بويىنشا وڭىرلىك ورتالىعىنىڭ مۇشەسى جانسەرىك بايدەنوۆ – جانسەرىك مارات ۇلى, ءوزىڭىز بايقاۋشى بولىپ قاتىسقان بۇل سايلاۋدان نە بايقادىڭىز؟ – سايلاۋشىلاردىڭ جوعارى بەلسەندىلىگى الدىمەن كوزگە ءتۇستى. بۇل وسى سايلاۋالدى جۇمىستاردىڭ جاقسى ناتيجەسى عانا ەمەس, ەلىمىزدەگى دەموكراتيانىڭ دامۋى دەر ەدىم. دەموكراتيانىڭ ءوزى قانداي دا زاڭنىڭ, ادىلدىكتىڭ سالتانات قۇرۋى عوي. وسى تۇرعىدان العاندا سايلاۋدىڭ ءوزى دە ادىلدىك, دەموكراتيا ءۇشىن وتكىزىلەدى. ادامدارعا ەرتەڭ ەلىمىزدىڭ ەكونوميكالىق-الەۋمەتتىك دامۋىن قامتاماسىز ەتەتىن بىلىكتى زاڭ, حالىقتىڭ قامىن ويلايتىن, ادال قىزمەت جاسايتىن دەپۋتاتتار كەرەك. سول ءۇشىن اركىم ءوزىنىڭ ازاماتتىق داۋسىن ءبىلدىرىپ, ادىلدىككە, دەموكراتياعا ءۇن قوسۋعا كەلىپ جاتىر دەپ ويلايمىن. مەن ارقالىق قالاسىنداعى №80 سايلاۋ ۋچاسكەسىندە وتىردىم. تۇسكە دەيىن ادامدار وتە كوپ كەلدى, سايلاۋشىلاردىڭ شامامەن 60-70 پايىزى كەلىپ ۇلگەردى دەپ ەسەپتەۋگە بولادى. ءبىزدىڭ مىندەتىمىز, ولاردىڭ از-كوپ ەكەنىن ەمەس, سايلاۋدىڭ زاڭ شەڭبەرىندە ءوتۋىن قاداعالاۋ عوي. مەن ەشقانداي ورەسكەلدىك بايقاعان جوقپىن, بارلىعى دا زاڭ اياسىندا ءوتتى. سونىمەن قاتار, سايلاۋشىلار تاراپىنان دا, ۋچاسكەلىك سايلاۋ كوميسسياسى مۇشەلەرى تاراپىنان دا سىرت قىزىعارلىقتاي مادەنيەتتى, كىشىپەيىلدىكتى باقىلاۋدىڭ ءوزى ءبىر عانيبەت دەۋگە بولادى. – سايلاۋدىڭ زاڭ شەڭبەرىندە ءوتۋى, بۇرمالاۋشىلىقتاردىڭ بولماۋى ءبىزدىڭ سايلاۋشىلاردىڭ ساياسي ساۋاتتىلىعىنا دا تارازى سەكىلدى عوي؟ – البەتتە, سولاي. كەلگەن سايلاۋشىلاردىڭ كوپشىلىگى الدىمەن قابىرعادا تۇرعان پلاكاتتىڭ تۇسىنا بارادى. وندا قانداي پارتياعا, قانداي ءماسليحاتتىڭ قاي دەڭگەيىنىڭ دەپۋتاتتىعىنا ۇسىنىلعان كانديداتقا داۋىس بەرەتىندىگى جازىلعان. سونى وقىپ العاننان كەيىن بيۋللەتەن الۋعا جاقىندايدى. بيۋللەتەنىن العان سوڭ, كابيناعا كىرىپ, بەلگىلەپ, جاشىككە سالىپ جاتتى. ولاردىڭ قيمىلىنان, قاباعىنان ءوزىنىڭ ازاماتتىق, كونستيتۋتسيالىق قۇقىن جۇزەگە اسىرعانىنا جانە ءوز تاڭداۋىنا دەگەن سەنىمدىلىكتى بايقاعانداي بولدىم. – بۇل جولى ءار سايلاۋشى ءۇش بيۋللەتەن الدى عوي؟ كەيدە سايلاۋشىلار زاڭ شەڭبەرىندەگى سايلاۋدىڭ, داۋىس بەرۋدىڭ ەرەجەلەرىن ادەيى ەمەس, بىلمەۋشىلىكتەن بۇرمالاپ الۋى مۇمكىن عوي؟ – ءيا, بۇدان بۇرىنعى پرەزيدەنت سايلاۋىندا ءار سايلاۋشى كابيناعا ءبىر بيۋللەتەنمەن كىردى عوي. ال بۇل جولى ءۇش بيۋللەتەن الدى, ءۇش رەت داۋىس بەرەدى دەگەن ءسوز. مەن سايلاۋشىلاردىڭ وعان بولا كىدىرگەنىن, اڭتارىلىپ قالعانىن, سول ءۇشىن داۋرىعۋ جاعدايىن بايقامادىم. ءبىزدىڭ سايلاۋشىلاردىڭ ساياسي ءبىلىمى, بىلىگى ارتقان, ولارعا سايلاۋ ناۋقانىندا ۇگىت, ءتۇسىندىرۋ جۇمىستارى ءوزىنىڭ ناتيجەسىن بەرگەن دەپ بىلەمىن. قارت اجەلەر مەن اتالار كەلگەندە ۋچاسكەلىك سايلاۋ كوميسسياسىنىڭ مۇشەلەرى ۇشىپ تۇرىپ, ولاردى جەتەلەپ كەلىپ, بيۋللەتەندەرىن بەرىپ, باعىتتاپ جىبەردى. كەيبىر سايلاۋشىلار بيۋللەتەندەرىن الىپ تۇرىپ, ساۋال بەرسە, ۋچاسكەلىك سايلاۋ كوميسسياسىنىڭ مۇشەلەرى ولارعا دەرەۋ قابىرعادا ءىلۋلى تۇرعان اقپاراتتاردى كورسەتىپ, ونى وقىپ الىپ, سودان كەيىن كابيناعا كىرۋىن ءوتىندى. بىراق ناسيحاتتاۋ, ارتىق ءسوز ايتۋ بولعان جوق. سايلاۋدىڭ ءادىل ءوتۋى زاڭدى تەك مۇقيات ساقتاعاندا عانا مۇمكىن بولادى. مۇندايدا قوعامدىق بايقاۋشىلاردىڭ ۇساق-تۇيەك دەپ قاراۋعا كەلمەيتىن كوپتەگەن ماسەلەلەرگە ءجىتى كوزبەن قاراۋىنا تۋرا كەلەدى. سايلاۋدى بايقاۋ جونىندەگى وڭىرلىك ورتالىق قوعامدىق بايقاۋشىلار ءۇشىن سەمينارلار وتكىزىپ, ولاردى وسى ساياسي ناۋقانعا دايىندادى. ەلىمىزدەگى ساياسي تۇراقتىلىق, ەكونوميكالىق, الەۋمەتتىك دامۋ وسى سايلاۋ قورىتىندىسىمەن تىعىز بايلانىستى. ەرتەڭگى بەلسەندى, ءبىلىمدى, پاتريوت دەپۋتاتتار حالىققا ادال قىزمەت ەتكەندە عانا جۇدىرىقتاي جۇمىلعان بىرلىگىمىز كۇشەيەدى, مەملەكەت داميدى. سوندىقتان ونىڭ ءادىل وتۋىنە سايلاۋشىلار دا, بايقاۋشىلار دا ۇلكەن ۇلەس قوستى. بۇل سايلاۋدا دا قوعامدىق بايقاۋشىلار وتە جاۋاپتى مىندەتتى قىراعىلىقپەن اتقاردى. اڭگىمەلەسكەن ءنازيرا جارىمبەتوۆا, «ەگەمەن قازاقستان». ارقالىق.
