كەشە مەملەكەت باسشىسى – «نۇر وتان» پارتياسىنىڭ توراعاسى نۇرسۇلتان نازارباەۆ ۇيىمنىڭ رەسپۋبليكالىق سايلاۋالدى شتابىندا بولىپ, نۇروتاندىقتارمەن بىرگە ساعات 00:00-دە جالپىۇلتتىق ەxit-poll ناتيجەلەرى باياندالعان جاڭالىقتار شىعارىلىمىن تىڭدادى.
ەلباسى نۇرسۇلتان نازارباەۆتى پارتيانىڭ سايلاۋالدى شتابىنا مولىنان جينالعان جاستار, سەنىمدى وكىلدەر, رەسپۋبليكالىق جانە وڭىرلىك شتابتاردىڭ بەلسەندىلەرى قۇرمەتپەن قارسى الدى. كوپشىلىكتىڭ «قازاقستان!», «نۇرسۇلتان!», «نۇر وتان!» دەگەن ءۇنى ەڭسەلى دە اسەم عيماراتتىڭ ءىشىن جاڭعىرتىپ جىبەردى.
شارانىڭ العاشقى ساتىندە «نۇر وتان» پارتياسى توراعاسىنىڭ ءبىرىنشى ورىنباسارى اسقار مىرزاحمەتوۆ ەلباسىنا جانە جينالعان قاۋىمعا قاراتا ورتالىق سايلاۋ كوميسسياسىمەن بايلانىسقا شىعىپ, ەxit-poll ناتيجەلەرىن تىڭداۋعا مۇمكىندىك بار ەكەنىن جەتكىزدى. ىلە بەينەكورسەتىلىم ارقىلى «دەموكراتيا ينستيتۋتى» عىلىمي-زەرتتەۋ اسسوتسياتسياسى جوباسى بويىنشا ديرەكتورى يۋليا كۋچينسكايا ەxit-poll ناتيجەلەرىن حابارلادى. سول ساتتە وسىعان دەيىن «نۇر وتان» پارتياسى سايلاۋشىلاردىڭ 82 پايىز داۋىسىن جيناعانى بەلگىلى بولدى. مەملەكەتىمىزدىڭ دامۋىنا, حالقىمىزدى بىرلىك پەن ىنتىماققا ۇيىستىرۋ جولىندا تابىستى قىزمەت ەتىپ كەلە جاتقان پارتيانىڭ بۇل جەڭىسىن ەستىگەن كوپشىلىك قوشەمەتپەن قول سوعىپ, كەڭ عيمارات قۋانىشتى داۋىستارمەن جاڭعىرىقتى.
بۇدان كەيىن جينالعاندارعا ءسوز ارناعان قازاقستان پرەزيدەنتى بارلىعىن تاريحي جەڭىسپەن قۇتتىقتادى.
– الدىن الا مالىمەتتەر بويىنشا, سايلاۋشىلاردىڭ باسىم كوپشىلىگى «نۇر وتان» پارتياسىنا سەنىم ءبىلدىردى, بۇل – بۇكىل حالىقتىڭ جەڭىسى. قازاقستاندىقتار ەلدە جۇرگىزىلىپ وتىرعان ساياساتتى, پارتيا جاريالاعان باعدارلامالار مەن رەفورمالاردى تاعى دا قولداپ شىقتى. بۇگىن مەن بارلىق داۋىس بەرۋشىلەرگە ريزاشىلىعىمدى بىلدىرەمىن. ءبىزدىڭ پارتيامىزدىڭ ءاربىر مۇشەسى وسى ءبىر كۇردەلى كەزەڭدە كورسەتىلگەن سەنىمدى باعالاۋى ءتيىس. بۇل جەڭىس – كوپجىلدىق جۇمىستىڭ ءناتيجەسى. سوعان وراي وڭىرلىك شتابتارعا, بەلسەندىلەر مەن پارتيا ەرىكتىلەرىنە العىس ايتامىن. سايلاۋدى 800 شەتەلدىك جانە 10 مىڭعا تارتا جەرگىلىكتى بايقاۋشىلار باقىلادى, ولار سايلاۋ ۇدەرىسى زاڭناماعا سايكەس وتكەنىن اتاپ ءوتتى. ءبىز الەمدىك قوعامداستىق الدىندا اشىق ءارى ءادىل سايلاۋ وتكىزدىك, – دەدى مەملەكەت باسشىسى.
ودان ءارى نۇرسۇلتان نازارباەۆ سايلاۋعا قاتىسقان وزگە پارتيالارعا دا العىس ءبىلدىردى.
– ولار بەلسەندىلىك تانىتتى, «نۇر وتان» پارتياسى ولاردىڭ ايتقان ۇسىنىستارى مەن ەسكەرتۋلەرىن نازارعا الادى جانە اتالعان ماسەلەلەر بويىنشا ءوزارا ءىس-قيمىلدى جالعاستىرادى, – دەدى قازاقستان پرەزيدەنتى.
سوڭىندا مەملەكەت باسشىسى بارشانى پارتيانىڭ جەڭىسىمەن قۇتتىقتاپ, پارتيا مۇشەلەرىنە الداعى ۋاقىتتا قاجىرلى ەڭبەك ەتىپ, تابىسقا جەتۋگە تىلەكتەستىگىن ءبىلدىردى.
ايتا كەتەيىك, جيىن بارىسىندا پارتيانىڭ سايلاۋدا ەڭ جوعارى ناتيجەگە قول جەتكىزگەن ءوڭىرلىك فيليالدارى وكىلدەرى ءوز ايماقتارىندا سايلاۋشىلاردىڭ بەلسەندىلىكپەن داۋىس بەرگەنىن ايتا كەلە, ەلباسىن, بارشا نۇروتاندىقتاردى جەڭىستەرىمەن قۇتتىقتادى.
سونداي-اق, شارادا جۇرتشىلىق ەلباسىمەن بىرگە «اتامەكەن» جانە «ۆەسنا نا زارەچنوي ۋليتسە» فيلمىندە ايتىلاتىن ءاندى قوسىلا شىرقادى. بۇدان بولەك, ءانىن ا.مۇحامەدي ۇلى, ءسوزىن م.قاسىمبەكوۆ جازعان جاڭا «ماقتانىشىم – ەلباسىم» ءانى دە ساتىمەن ورىندالدى. اسىرەسە, وسى ءاندى ايتۋ بارىسىندا: «قيىندىقتى جەڭگەن, قالىڭ ەلى سەنگەن. عاسىرلاردان وزعان نار تۇلعا. ەل باستاعان كوسەم, بولسىن امان-ەسەن, حالىق ءۇشىن تۋعان بوز تۇلپار!» دەگەن تۇسى شابىتتانا شىرقالدى.
«نۇر وتان» پارتياسىنىڭ وسىناۋ جەڭىستى ءساتىن اۋەزدى انمەن, كوتەرىڭكى كوڭىل-كۇيمەن اتاپ ءوتۋ ابدەن ورىندى. ويتكەنى, ۇلتىمىزدى ۇيىستىرىپ, كەمەل كەلەشەككە باستاپ كەلە جاتقان ەلباسى باسقارۋىنداعى بۇل ساياسي ۇيىمنىڭ جەڭىسى بارشا قازاقستاندىقتار ءۇشىن ءدال قازىرگى ۋاقىتتا اسا قاجەت. ال بۇل قاجەتتىلىكتەگى ماقسات-مۇددەنى حالىق جاقسى تۇسىنەدى.
جولدىباي بازار,
«ەگەمەن قازاقستان».
