رەسەي پرەزيدەنتىنىڭ ءباسپاسوز حاتشىسى دميتري پەسكوۆ سيريادا قازا تاپقان رەسەيلىك اسكەريلەردىڭ سانى تۋرالى ايتۋدى ءجون كورمەدى. «مەن بۇل سۇراققا جاۋاپ بەرمەسەم دەيمىن. سىزدەرگە مۇنداي ساۋالدى قورعانىس مينيسترلىگىنە قويۋدى ۇسىنامىن», – دەدى ول.
پەسكوۆ, سونداي-اق, 17 ناۋرىزدا كرەملدە اسكەريلەرمەن كەزدەسكەن كەزىندە پرەزيدەنت ۆلاديمير پۋتين سيريادا قازا تاپقان 4 وفيتسەردىڭ اتىن اتادى. ولاردىڭ اتى-جوندەرى بەلگىلى, وزگەلەر تۋرالى ەشتەڭە ايتىلعان جوق», – دەپ اتاپ ءوتتى ول. ال قازىرگى تاڭدا سيريادا 5 رەسەيلىكتىڭ قازا تاپقانى بەلگىلى. بىراق رەسمي تۇردە ولاردىڭ تورتەۋىنىڭ عانا اتتارى اتالىپ وتىر.
ترامپتى كوپ ەل حالقى جاقتىرمايدى
اقش پرەزيدەنتتىگىنە كانديدات ميللياردەر دونالد ترامپ «فەيسبۋك» الەۋمەتتىك جەلىسىنىڭ تاريحىندا ەڭ كوپ قايتا جاريالاۋلارعا يە بولعان. 4 كۇن ىشىندە ماتىنگە قاتىستى ميلليوننان استام پايدالانۋشى پىكىر بىلدىرگەن. حاتتاردىڭ استىنا ولار شامامەن 65 مىڭداي پىكىر جازىپتى.
ميللياردەردى سىنعا العان پوست Humans of New York فوتوبلوگىنىڭ پاراقشاسىندا جارىق كورگەن. جوبا اۆتورى برەندون ستەنتون سوڭعى 2 جىلدا ول كوپتەگەن يراننان, يراك پەن پاكىستاننان شىققاندارمەن سۇحبات جۇرگىزگەنىن جانە كوپتەگەن مۇسىلمان بوسقىندارمەن كەزدەسكەنىن جازىپتى. اۆتوردىڭ پىكىرىنشە, بۇل وعان الەمدەگى ەڭ جاعىمسىز جانە جەككورىنىشتى ادام ترامپ دەپ قورىتىندى شىعارۋعا مۇمكىندىك بەرەدى.
ساۋد ارابياسى مۇنايدان باس تارتپاق
ساۋد ارابياسىنىڭ وكىمەتى باستى تابىس كوزى جانە ەنەرگيامەن قامتاماسىز ەتۋ رەسۋرسى رەتىندەگى مۇنايدان باس تارتپاق پيعىلدا. بۇل تۋرالى وسى ەلدىڭ مۇناي ءمينيسترى ءالي ءال-نايمي Bloomberg اگەنتتىگىنە حابارلاعان.
كورولدىك ەنەرگيانىڭ جاڭعىرمالى كوزدەرىنە باعىت ۇستانۋعا نيەتتى. مەن جاڭعىرمالى ەنەرگيا ءۇشىن ساۋد ارابياسىنان ارتىق ەل بار دەپ ويلامايمىن, دەپ مالىمدەگەن مينيستر. ول ءوز پىكىرىن كورولدىكتەگى جارقىراپ تۇراتىن كۇننىڭ كوزىمەن, پايدالانىلماي جاتقان اۋقىمدى اۋماقتارمەن, سونداي-اق, قۇمنىڭ كوپتىگىمەن تۇسىندىرگەن. وسىنىڭ ءبارى كۇن ەلەكتر ستانسالارىن سالۋ ءۇشىن وتە قاجەت. سونىمەن بەرگە, نايمي ەلدەردىڭ تاياۋداعى 50 جىلدىڭ ىشىندە مۇنايدان ءباسىبۇتىن باس تارتا قوياتىنىنا دا ونشا سەنبەيدى. ءسوز رەتىندە ساۋد ارابياسىنىڭ ءوز ەكونوميكاسىن ءارتاراپتاندىرىپ, مۇناي ەكسپورتىنان تاۋەلدىلىكتى تومەندەتۋ تۋرالى العاش رەت مالىمدەپ وتىرماعانىن دا ايتا كەتۋ قاجەت.
قىسقا قايىرىپ ايتقاندا:
- پوليتسەيلەر اقش-تىڭ كاليفورنيا شتاتىندا ساۋساعىن شوشايتقان ادامدى اتىپ تاستاعان. «ول بىزگە قارۋ جۇمسايتىن سەكىلدى كورىندى. سوندىقتان ونىڭ الدىن وراپ, ءبىرىنشى بولىپ وق جۇمساۋدى ءجون كوردىك» – دەيدى پوليتسەيلەر. ال اتىپ ولتىرىلگەن ادامنىڭ كەيىن ساۋساق شوشايتقانى عانا بەلگىلى بولىپ وتىر. ويتكەنى, ودان قارۋ تابىلماعان.
- رەسەيدىڭ دونداعى روستوۆ قالاسىنىڭ پەرۆوماي اۋداندىق سوتى جەرگىلىكتى تۋريستىك فيرمانى تۇركياعا جولدامالار ساتۋدى توقتاتۋعا مىندەتتەگەن. تۇركياعا قاتىستى سانكتسيا تۋرالى جارلىققا رەسەي پرەزيدەنتى ۆ.پۋتين وتكەن جىلدىڭ 28 قاراشاسىندا قول قويعانى بەلگىلى.
- ۇلىبريتانيادا تەمىر داۋىرىندە ءومىر سۇرگەن 75 جاۋىنگەردىڭ قورىمى تابىلعان. ولاردىڭ اراسىندا وسىدان 2,5 مىڭ جىل بۇرىن جەرلەنگەن اسكەري كوسەم دە بار كورىنەدى. بۇل وقيعا سوڭعى ونجىلدىقتارداعى اسا ۇلى جاڭالىق دەپ باعالانىپ وتىر. ال كوسەمنىڭ جاسى شامامەن 17 مەن 23-ءتىڭ ارالىعىندا ەكەن.
- رەسەيدە باشقۇرتستاننىڭ استاناسى – ۋفا قالاسىنان ەكاتەرينبۋرگكە 20 توننا اراق اكەلۋگە ءتيىستى بولعان الىس قاشىقتىققا جۇك كولىگىن جۇرگىزۋشى جوعالىپ كەتكەن. 54 جاستاعى يۋري وجەرەلەۆ بايلانىسقا 4 ناۋرىزدان بەرى شىقپاپتى.
بەسەسكۋ مولداۆيا ازاماتتىعىن الماقشى
رۋمىنيانىڭ بۇرىنعى پرەزيدەنتى ترايان بەسەسكۋ مولداۆيا ازاماتتىعىن الۋ ءۇشىن قۇجاتتارىن وتكىزگەن. بۇل تۋرالى كەشە «مولداۆان بيزنەسى» باسىلىمى جاريالادى. اتالعان ساياساتكەر مەن ونىڭ زايىبى ماريا وتىنىشتەرىن مولداۆيا پرەزيدەنتى نيكولاي ءتيموفتيدىڭ اتىنا جولداسا كەرەك.
باسىلىمنىڭ دەرەكتەرىنە قاراعاندا, بۇل اقپاراتتى مولداۆيا پرەزيدەنتىنىڭ ءباسپاسوز قىزمەتى قۋاتتاعان. وسى ناۋرىز ايىنىڭ باسىندا رۋمىنيانىڭ بۇرىنعى پرەزيدەنتى مولداۆيانىڭ رۋمىنيامەن بىرىگۋى تيىستىگى جونىندە ماسەلە كوتەرگەن ەدى. ونىڭ سوزىنە قاراعاندا, بۇلاي جاسالماعان جاعدايدا مولداۆيا ەۋرووداق پەن ناتو-عا مۇشەلىككە ءوتۋ مۇمكىندىكتەرىنەن ايىرىلادى.
جيرينوۆسكيدىڭ تۇسىنىكسىز ۇستانىمى
رەسەي ليبەرال-دەموكراتيالىق پارتياسىنىڭ سەركەسى, اتىشۋلى ۆلاديمير جيرينوۆسكي اجىراسۋ ارەكەتىمەن جۇرگەن دەپۋتاتتاردى جەر-كوككە سىيعىزباي ماقتادى. ونىڭ پىكىرىنشە, اجىراسقاننان كەيىن ايەلدىڭ ءرولىن پارلامەنتتەگى جۇمىس اتقاراتىن بولادى.
رەسەي مەملەكەتتىك دۋماسى جۇمىس ورنىنا كەلمەگەن دەپۋتاتتاردى مانداتىنان ايىرۋ تۋرالى زاڭ جوباسىن قاراعان كەزدە جۇمىس ورنىندا حالىق قالاۋلىلارىنىڭ ۇشتەن ەكىسى بولماي شىققان. دەگەنمەن, زاڭ جوباسى ءبىرىنشى وقىلىمدا قابىلدانىپتى. ال ۆ.جيرينوۆسكي ايەلدى جۇمىس الماستىرادى دەپ دەپۋتاتتاردىڭ وسىنداي جاۋاپسىزدىعىنان كەيىن ايتىپ وتىر.
ناعىز «ىلكىمدىلىك» دەپ وسىنى ايت
يسپانيا پوليتسياسى پينەدا-دە-مار قالاسىندا پايدالانىلۋدان قالعان قوناقۇيدە كوكنار وسىرۋمەن اينالىسقان ەكى رەسەيلىك ايەلدى تۇتقىنعا الدى. پلانتاتسيا جەرورتا تەڭىزىنىڭ جاعالاۋىندا, بارسەلونادان شامامەن 60
شاقىرىم جەردە ورنالاسقان ەسكى قوناقۇيدىڭ بەس قاباتىنىڭ ءۇش قاباتىن الىپ جاتسا كەرەك.
رەسەيلىك ايەلدەرمەن قاتار, تاعى ەكى ەر ادام – يسپانيا ازاماتتارى قامالعان. ولار كورشىلەس بلانەس جانە لورەت-دە-مار قالالارىنىڭ تۇرعىندارى ەكەن. وپەراتسيا بارىسىندا قۇنى شامامەن 60 مىڭ ەۋرو تۇراتىن 2,5 مىڭعا جۋىق كوكنار ءتۇبىرى تاركىلەنگەن. ال ۇستالعاندارعا قانداي جازا قولدانىلاتىنى تۋرالى ناقتى ەشتەڭە ايتىلمايدى.
ينتەرنەت ماتەريالدارى نەگىزىندە ازىرلەندى.
