قوستانايدا ۇرلانعان «گەنەرالدىق» ساعاتتاردىڭ سوتى باستالدى

قوستاناي. 17 ناۋرىز. وبلىستىق ىشكى ىستەر دەپارتامەنتىنىڭ باستىعى, گەنەرال-مايور تىلەگەن ماتكەنوۆتىڭ ساعاتتارىن ۇرلاعان بۇرىن سوتتالعان 26 جاستاعى ازامات بولىپ شىقتى. ول كىناسىن مويىنداپ, ساعاتتاردى ءوزىنىڭ وڭىردەگى بەلگىلى قۇرىلىس فيرماسىنىڭ يەسى اعاسىنا قايتاردى. بۇل تۋرالى alau.kz-كە سىلتەمە جاساعان egemen.kz ءتىلشىسى حابارلادى. بۇل ءىس وسىدان ءبىراز بۇرىن قوستانايدى شۋلاتقان ەدى. جەرگىلىكتى اقپارات قۇرالدارىنىڭ حابارلاۋىنشا, ۇرى گەنەرال تۇرعان ەليتالىق تاۋنحاۋس ءۇيىنىڭ تەرەزەسىنەن ءتۇسىپ, 10 پار قىمبات شۆەيتساريالىق ساعاتىن الىپ كەتكەن. ۇرلانعان زاتتار تۋرالى اقپارات جۋرناليستەردىڭ قولىنا تۇسكەن بولاتىن. وندا ۇرلانعان ساعاتتاردىڭ Audemars Piguet, Zenith, Ulysse Nardin, Bridge, Rolex, Frederique Constant, Longines سەكىلدى برەندتەر ەكەنى ايتىلادى. الايدا, وبلىستىق ىشكى ىستەر دەپارتامەنتىنىڭ ءباسپاسوز قىزمەتى ارتىنشا مۇنى تەرىسكە شىعاردى, ساعاتتار قىمبات ەمەس, بار-جوعى 300 مىڭ تەڭگەگە باعالانعانىن ايتقان بولاتىن. دەپارتامەنتتەگىلەر مالىمدەگەندەي, گەنەرال قىمبات ۇيدە ۇرلىق وقيعاسى بولعانعا دەيىن, ءوز پاتەرىنە جوندەۋ جۇمىستارى اياقتالعانشا تۇرعان كورىنەدى. بۇل باسپانانى وعان كاسىپكەر ۇسىنىپتى, ۇرلانعان ساعاتتار گەنەرالدىكى ەمەس, ءۇيدىڭ يەسىنىكى دەپ شىعاردى. باسى داۋعا قالعان گەنەرال ماتكەنوۆ جۋرناليستەر كۇدىگىن سەيىلتۋ ءۇشىن ءوزىنىڭ ساعاتتارىن كورسەتۋگە ۋادە كەتكەن بولاتىن. كەيىن ول ويىنان اينىپ قالدى, ونىڭ ساعاتىن بۇقارالىق اقپارات قۇرالدارىنا دەپارتامەنتتىڭ قىزمەتكەرى كورسەتتى. مىنە, ءبىراز ۋاقىتتان كەيىن گەنەرالدىڭ ساعاتتارىن ۇرلاعان ۇرلىق اشىلعانىن مالىمدەپ, سوتى بولعالى تۇر. قولدى بولعان ميلليونداعان تەڭگە تۇراتىن ساعات گەنەرالعا تيەسىلى مە, جوق پا؟ وسى جاعى ءالى تۇمان سەكىلدى سەيىلمەي تۇر. ەندى سوت نە دەر ەكەن؟ ءنازيرا جارىمبەتوۆا. دەرەك, سۋرەت: alau.kz.