اۋىلدى جەرگە ەڭ كەرەك ادام

«سەنىم جوق جەردە – ادامگەرشىلىك جوق, سەنىم بار جەردە – كۇمان جوق» دەمەكشى, حالقىنا, ەلىنە, ەلباسىنا, ونىڭ ساليقالى ساياساتىنا سەنىممەن قاراپ, نىق قادام باسىپ, ءوزىنىڭ ومىرلىك كوزقاراسىمەن, تاجىريبەسىمەن, ادالدىعىمەن جاستارعا ونەگە بولىپ, قوعامدا ءوز ورنىن تاۋىپ جۇرگەن ازاماتتار قانشاما دەسەڭىزشى. سونىڭ بىرەگەيى قاتارىندا استراحان اۋدانى ورتالىق ەمحاناسىنىڭ 35 جىل باس دارىگەرى بولىپ, حالقىنا ايانباي ەڭبەك ەتكەن ارداگەر ۇستازىمىز, بۇگىندە ۋزي دارىگەرى نۇرمۇحامبەت ايتقوجىن ۇلى سەمباەۆتى قۇرمەتپەن اتار ەدىك.  اعامىز 1975 جىلى قاراعاندى مەديتسينا ينستيتۋتىن ويداعىداي اياقتاپ, دارىگەر-بالالار حيرۋرگى ماماندىعىن الدى. اۋداندىق اۋرۋحانادا قىزمەت ىستەدى. اراعا جىل سالماي ءبىلىمدى دە بىلىكتى مامانعا سەنىم ارتىلىپ, كىندىك قانى تامعان جالتىر اۋىلدىق ەمحاناسىنا باس دارىگەر ەتىپ تاعايىندالدى. مۇندا دا ول ۇيىمداستىرۋشىلىق قىرىنان اۋدان كولەمىندە ابى­روي تۇعىرىنان كورىنە ءبىلدى. ءۇش جىلدىق ەڭبەك ناتيجەسى رەتىندە بالالار ءولىمىنىڭ كۇرت تومەندەۋىن, انا ءولىمىنىڭ تىركەلمەۋىن ايتار ەدىك. الەۋمەتتىك كە­سەل­دىكتەر ونكولوگيا, جۇرەك تالماسى, قانت اۋرۋى كور­سەت­كىشتەرىنىڭ جاقسارۋى بايقالدى. وسىدان بولسا كەرەك, وبلىستىق دەنساۋلىق ساقتاۋ باسقارماسى نۇر­مۇحامبەت ايتقوجىن ۇلىنىڭ ەڭبەگىن باعالاپ, 1980 جى­­لى اۋداندىق ورتالىق ەمحاناعا باس دارىگەر ەتىپ تاعايىندادى. اسىل ازامات, بىلىكتى باسشى ءوز كاسىبىنە ءاردايىم ادال بولىپ, كوپشىلىكتىڭ العىس-قۇرمەتىن ەنشىلەدى. قوعامدىق جۇمىستارعا دا بەلسەنە قاتىستى. نۇرمۇحامبەت اعا 1980 جىلدان باستاپ 2015 جىلعا دەيىن اۋداندىق ءماسليحاتتىڭ دەپۋتاتى, سونداي-اق, وبلىستىق ءماسليحاتتىڭ بىرنەشە شاقىرىلىمىنىڭ دەپۋتاتى بولدى. – ەگەمەندىك جىلدارى ەلباسىنىڭ الەۋمەتتىك سالاعا ەرەكشە كوڭىل ءبولۋى مەديتسينا سالاسىنىڭ قۇلاشتاي دامۋىنا سەپتىگىن تيگىزدى, – دەيدى اعامىز. – ماسەلەن, ەمحانا 2010 جىلى سۋداي تازا رەانيموبيل اۆتوكولىگىن 25 ميلليون تەڭگەگە, يتاليالىق «اپوللو» رەنتگەن اپپاراتىن, 12 ميلليونعا جاڭا مامموگراف, تسيفرلىق فليۋوروگراف, «كاماز» كولىگىنە قوندىرىلعان جىلجىمالى فليۋورواپپاراتتى ساتىپ الۋعا مۇمكىندىك تۋدى. جالپى, اقمولا وبلىسى وڭىرىندە مەديتسينا سالاسىنىڭ قۇرىلىستارى ءبىر ءسات تە باسەڭسىگەن ەمەس. وبلىستىق دەنساۋلىق ساقتاۋ باسقارماسى تىزگىنىن ۇستاعان مەديتسينا عىلىمدارىنىڭ كانديداتى گۇلنار ق ۇلىشەۆانىڭ باسشىلىعىمەن بۇگىندە قىرۋار جۇمىستار اتقارىلۋدا. دارىگەرلەرگە مىڭداعان ادامنىڭ ءومىرى سەنىپ تاپسىرىلعاندىقتان, بوساڭسۋعا ەش حاقىمىز جوق. تىرشىلىك كەدىر-بۇدىر قيىنشىلىقتاردان دا تۇراتىنى بەلگىلى. مۇنداي جاعدايدا نۇرەكەمىز ەلدىڭ ارقا سۇيەر ازاماتى رەتىندە, كوپشىلىكتى اقىل مەن سابىر­عا شاقىرىپ, تىعىرىقتان شىعۋدىڭ وڭتايلى جولدارىن تابا ءبىلدى. باس دارىگەرلىك قىزمەتى جىلدارى ءوزىنىڭ مىق­تى مەنەدجەر ەكەنىن دە كورسەتتى. اۋرۋحانامىز وبلىس پەن رەسپۋبليكاداعى وزاتتار ساپىنان ءتۇسىپ كورگەن ەمەس. اعامىز دەنساۋلىق ساقتاۋ مينيسترلىگىنىڭ «قۇرمەت» گراموتاسىمەن, ەكى رەت «دەنساۋلىق ساقتاۋ سالاسىنىڭ ۇزدىگى» بەلگىسىمەن, «ەرەن ەڭبەگى ءۇشىن» مەدالىمەن ماراپاتتالدى. بۇل ماراپات ەكىنىڭ بىرىنە بەرىلمەي­تىنى اقيقات. وتان الدىندا مەملەكەتتىك قۇرىلىسقا, ەكو­­نو­ميكانىڭ قارقىندى دامۋىنا قوسقان ۇلەسى رەسپۋبليكانىڭ حالىقارالىق دەڭگەيدە ابىرويىنىڭ ارتۋىنا, ەڭبەكتەگى بيىك جەتىستىكتەرىنە, جوعارى قوعامدىق قىزمەتىنە بەرىلەتىن ماراپات. بۇل كىسىنىڭ ومىرلىك جولداسى, بالالارىنىڭ اناسى, اسىل دا التىن نەمەرەلەرىنىڭ اجەسى شولپان امان­جول­قىزى وسى ەمحانادا 37 جىل دارىگەر-كارديولوگ, تەر­اپيا ءبولىمىنىڭ مەڭگەرۋشىسى بولىپ, حالقىنا ادال ەڭبەك ەتتى. ادامگەرشىلىك, ادالدىق رۋحىندا تاربيەلەنگەن پەرزەنتتەرى: ۇلى سايات بەدەلدى زاڭگەر, قىزى ءلاززات اكە-شەشە جولىن قۋىپ جوعارى ساناتتى دارىگەر-كارديولوگ رەتىندە ەل سىيلىسى. ءبىزدىڭ قازاق بالاسىن بالىم, نەمەرەسىن جانىم دەيدى. اعامىز بەن جەڭگەمىز 6 نەمەرە ءسۇيىپ وتىر. مۇحتار نۇراليەۆ, دارىگەر.  اقمولا وبلىسى, استراحان اۋدانى.