توسىننىڭ تورعىن قۇمىن كەشكەن اقىن

توپىراقتان جاراتىلعان ادام بالاسى توپىراققا تارتىپ تۋادى دەيدى. توسىننىڭ تورعىن توپىراعىن باسىپ, توبىلعىسىنا توبىعىن جىرعىزىپ, توراڭعىسىنىڭ ساياسىنان تابيعاتقا ەلتي قاراپ, تولقي اققان تورعايدىڭ تولقىنىمەن جارىسىپ تا, جاراسىپ تا جىر الەمىنە سۇلەي ءسوزدىڭ سۇيەكتىسىن اكەلگەن سەرى اقىن – سەرىك ەۋرازيا ۇلتتىق ۋنيۆەرسيتەتىنىڭ «كاۋسار» بىرلەستىگىندە ستۋدەنتتەر اراسىندا قوناقتا بولدى, سىرىن ايتتى, جىرىن وقىدى. حالىقارالىق «الاش» سىي­لى­عى­نىڭ لاۋرەاتى, قازاقستان­نىڭ ەڭبەك سىڭىرگەن قايراتكەرى, اقىن سەرىك تۇرعىنبەك ۇلىنىڭ 70 جىلدىق مەرەيتويىنا وراي ەلور­دالىق زيا­لى قاۋىم مەن جاس­تار اراسىندا پوەزيا كەشىن ءوت­كىزۋىنە مۇرىندىق بولعان «كاۋسار» بىرلەستىگىنىڭ وسى جول­عى باس­قوسۋى اڭعالدىق پەن ادال­دىق­تىڭ, با­تىلدىق پەن ەلدىك مۇرات­تى ويلاعان ەردىڭ بەينەسىمەن ەرەكشەلەندى, ەلىن سۇيگەن اقىن جۇرەگىنىڭ اعىنان اق­تارىلا, اڭقىل­داي توگىلگەن سىرلارىمەن ەرەك­شە­­­لەندى, كوكىرەكتەرگە وي سالىپ, كوڭىل­دەردى كوتەرىپ, دالانىڭ دارحان­دى­عىن كوز الدىڭا اكەلۋىمەن ەرەك­شە­لەندى دەسە, ارتىق ايتقاندىق بولا قويماس. توسىنداي ىرعاتىلىپ, تەڭسەلە باسىپ, تەربەتىلە توگىلگەن اقىن جىرلارى ساحنادان ورىمدەي جاستاردىڭ اۋزىنان كەيدە ەرەكشە جالىنداعان ورلىكپەن, كەيدە سىڭعىرلاي اققان سىرمەن, جەلپىپ وتكەن سامالداي جانعا جايلى پوەزيا اتتى قۇدىرەتتى الەمنىڭ ساف اۋاسىمەن دەمالدىرىپ تىڭداعان جاننىڭ بويىن ەرىتكەن. كەش ءانسىز وتكەن بە؟ سەرىك اقىننىڭ جىرلارى تالاي كومپوزيتوردىڭ شابىتىن شاقىرعان, سۇلۋ ساز تۋدىرىپ, ءان بولىپ ءورىلىپ, اۋەن بولىپ توگىلىپ, بويلاردى شىمىرلاتقان. ەندەشە, كەشتە ايتىلعان اندەردىڭ ءسوزىن سەرىك اقىن جازعان. ستۋدەنتتەر ونەرىنە وزىنە ابدەن جاراساتىن, اركەز رياسىز ايتار العىسىن جەت­كىز­گەن اقىن: «قازىر مىنا الەم شوۋ بولىپ كەتتى. قىڭقىل-سىڭقىل مۋزىكا اۋەنى قايسى, ءسوزى قايسى, اي­تىپ تۇرعانى ءان بە, ساحناداعى ءانشى مە, الدە سىرتتان ءوتىپ بارا جاتىپ, مەن دە ايتا الامىن دەگەن بىرەۋ مە, بىلمەيتىن بولدىق. ەستى ءسوز, ەستى اۋەن, سىرلى ءسوز بەن سىرباز ءانشى, جان تولقىتار, جۇرەك­تى تەربەر اسەم اۋەن تىڭداۋ­دان قالدىق. راديونى اشىپ قالساڭ دا سول, تەلەديداردى باسىپ قالساڭ دا سول. لىپاسى بويىن جاپپايتىن قارىنداسقا قاراۋدان ءجۇزىڭ اينيدى. اينالايىندار, ەسىرىك ەمەس, ەستى بولىڭدار. جاس­تىق­قا جاراساتىن جىندىلىق تا بولادى, بىراق ءبارى جونىمەن, ۇلتقا ءتان ەمەس, وزگەگە سولىقتاۋدان تۋ­ماي, ءتول مادەنيەتتەن وربىسە, بە­رەرى مول بولماق. كىتاپ وقىڭدار, سەن­دەر زەردەلى بولساڭدار, اعا بۋىن ارمانسىز. كەشەگى وتكەن الاش­تىڭ ارىستارى ارمانسىز», دەپ العىسىنىڭ سوڭى اعالىق اقىلعا اۋىسقان اقىننىڭ نە جاساسا دا, نە ايتسا دا شىنايىلىعىن باعامداعان كورەرمەن دە رياسىز ريزا بولىسقان. ونىڭ ۇستىنە كەشتىڭ جۇرگىزۋشىسى كەنجەعالي مىرجىقباي سەرى اقىننىڭ جاس كەزىندەگى كەيبىر اڭعالدىققا ۇرىن­عان ساتتەرىن ەسكە تۇسىرگەندە ءوزى دە راحاتتانا, ريزا بولىپ ك ۇلىپ, ءىلىپ الىپ كەتكەنىندە ستۋدەنتتەر قولدارىن اياماي سوعىپ, اقىنعا دەگەن قۇرمەتتەرىن تانىتتى. پوەزيا كەشىندە كوپەن امىربەك اقىنعا ارناعان ولەڭىن وقىپ, كەش سوڭىندا ۋنيۆەرسيتەت رەكتورى ەرلان سىدىقوۆ اقىندى گۋميلەۆ مەدالىمەن ماراپاتتاپ, سىي-سياپات جاسادى. انار تولەۋحانقىزى, «ەگەمەن قازاقستان». استانا.