جول قۇرىلىسى جالعاسا بەرەدى

كەشە ورتالىق كوممۋنيكاتسيالار قىزمەتىندە ينۆەستيتسيالار جانە دامۋ مينيسترلىگىنىڭ كولىك كوميتەتى توراعاسىنىڭ ورىنباسارى دميتري پوتلوۆ ءباسپاسوز ءماسليحاتىن وتكىزدى. ول «نۇرلى جول» مەملەكەتتىك ينفراقۇرىلىمدىق باعدارلاماسىنىڭ جۇزەگە اسىرىلىپ جاتقانى جونىندە اڭگىمەلەدى. توراعا ورىنباسارىنىڭ ايتۋىنا قاراعاندا, باعدارلاما بويىنشا 2020 جىلعا دەيىن جالپى قۇنى 2,4 ترلن. تەڭگەگە تەڭ 11 اۆتوجولدى سالىپ ءبىتىرۋ كوزدەلىپ وتىر ەكەن. «ناقتى ايتار بولسام, 7 مىڭ شاقىرىمنان استام اۆتوجولداردى قايتا جاڭعىرتىپ, تۇپكىلىكتى جاڭعىرتۋدى قولعا الىپ وتىرمىز. «نۇرلى جول» مەملەكەتتىك باعدارلاماسىندا جالپى باعاسى 2,4 ترلن. تەڭگە بولاتىن 11 اۆتوجول قۇرىلىسىن 2020 جىلعا دەيىن تولىق جۇزەگە اسىرۋ كوزدەلگەن. بۇگىنگى تاڭدا وسى جۇمىستار جوسپارداعى كەستەگە ساي جالعاسىپ جاتىر. جولداردى سالۋعا سوڭعى ۇلگىدەگى تەحنولوگيالار پايدالانىلىپ, الەمدىك ستاندارتتارعا ساي جۇرگىزىلۋدە», دەدى ول. ايتىلعان اۆتوجولدار استانادان باستاۋ الىپ, ورتالىق – وڭتۇستىك, ورتا­لىق – شىعىس, ورتالىق – باتىس بولىپ تارتىلا بەرەدى. اۋقىمدى جۇمىستاردىڭ تولىق اياقتالۋى 2020 جىلعا جوس­پار­لانعانىن جەتكىزگەن سپيكەر, نەگىزگى ترانزيتتىك جوباعا نازار اۋدارتتى. «باستى نازار جۇك تاسىمالىنىڭ اعىنىن وتكىزەتىن حالىقارالىق كولىك دالىزدەرى ەكەنى ءمالىم. ونىڭ ىشىندە باتىس ەۋروپا – باتىس قىتاي ترانزيتتىك اۆتوماگيسترالىنىڭ ورنى بولەك ەكەنى بارشاڭىزعا ايان. وسى تۇرعىدا ايتارىم, ءبىز ءوز ەلىمىزدىڭ اۋماعىنان وتەتىن اتالعان ماگيسترالدىڭ جۇمىسىن بيىل تولىق اياقتاعالى وتىرمىز. وسى كەزگە دەيىن رەسەي شەكاراسى مەن وڭتۇستىك قازاقستان وبلىسىنا دەيىنگى جولدىڭ بولىگى تولىق پايدالانۋعا بەرىلدى. ەندى بۇدان بىلاي تاقتايداي تەگىس ماگيسترالمەن رەسەيگە جانە ورتالىق ازيا ەلدەرىنە جۇك تاسى­مالداي الامىز», دەدى د.پوتلوۆ. قىتايدان ەۋروپاعا قاراي سوزىلعان ەڭ قىسقا جول بولاتىن ءاۆتودالىز سۋەتس كانالى ارقىلى وتەتىن تەڭىز جولىنان 3,5 ەسە قىسقا. وسىنى ايتقان سپيكەر, قازىرگى ۋاقىتتا ەلىمىزدە 6 حالىقارالىق كولىك ءدالىزى قالىپتاسىپ, جۇمىس ىستەپ تۇرعانىن جەتكىزدى. «حالىقارالىق كولىك دالىزدەرىن دامىتۋ ەكونوميكالىق ءوسۋدىڭ, وڭىرلەر اراسىنداعى ساۋدا وپەراتسيالارى مەن بايلانىستى وڭاي­لاتۋدىڭ ماڭىزدى قۇرامداس بولىگى بولىپ سانالادى. قازىر ەلىمىز دۇنيەجۇزىلىك ەكونوميكالىق فورۋمنىڭ جاھاندىق باسەكەلەستىككە قابىلەتتىلىك رەيتينگىندە 30 ساتىعا كوتەرىلدى. ياعني, الەمدەگى 140 ەلدىڭ ىشىندە 88-ءشى ساتىدان 58-ءشى ورىنعا جوعارىلادى», دەگەن د.پوتلوۆ, بۇگىندە قۇرىق پورتىندا قۋاتى 4 ميلليون توننا پارومدىق كەشەن سالۋ جوباسى جۇزەگە اسىرىلىپ جاتقانىن العا تارتتى. نۇرباي ەلمۇراتوۆ, «ەگەمەن قازاقستان».