گەننادي گولوۆكين ريو وليمپياداسىنا قاتىسا المايدى

قاراعاندى. 17 ناۋرىز. بۇكىلالەمدىك بوكس كەڭەسى (WBC) وسى ۇيىمنىڭ چەمپيوندارىنا ريو-دە-جانەيروداعى جازعى وليمپيادا ويىندارىندا ونەر كورسەتۋلەرىنە تىيىم سالدى. بۇل تۋرالى vringe.com سپورتتىق پورتالىنا سىلتەمە جاساعان egemen.kz ءتىلشىسى حابارلادى. سونداي-اق, مۇنداي تىيىم WBC رەيتينگىسىندەگى توپ-15 ساناتىنا ەنەتىن بوكسشىلارعا دا سالىندى. «WBC مۇنداي قادام وتە قاۋىپتى بولعاندىقتان, جوعارى دەڭگەيدەگى كاسىپقوي بوكسشىلاردىڭ ەشقايسىسى وليمپيادا ويىندارىنا قاتىسۋ تۋرالى ويلامايدى دەپ ۇمىتتەنەدى. بۇل ماسەلەنىڭ باسى تولىقتاي اشىلمايىنشا, جارىس فورماتى قاۋىپسىز دەپ باعالانبايىنشا, WBC ءوزىنىڭ چەمپيوندارى مەن ۇيىمنىڭ توپ-15 رەيتينگىسىندەگى بوكسشىلارىنا الداعى ريو ويىندارىنا قاتىسۋعا تىيىم سالادى», – دەلىنگەن ۇيىم تاراتقان حابارلامادا. بۇل حابارلاما وسىدان ءبىراز بۇرىن حالىقارالىق اۋەسقوي بوكس قاۋىمداستىعىنىڭ (AIBA) 2016 جىلعى وليمپياداعا كاسىپقوي بوكسشىلار دا قاتىسۋى مۇمكىن دەپ جاريالاعان مالىمدەمەسىنە جاۋاپ رەتىندە قايتارىلعان. ايتا كەتەيىك, WBC تۇجىرىمى بويىنشا ورتا سالماقتا قازىرگى الەم چەمپيونى مەكسيكالىق ساۋل الۆارەس. ال قازاقستاندىق گەننادي گولوۆكين WBC (Interim) تيتۋلىنىڭ يەگەرى. قايرات ءابىلدينوۆ. دەرەك: vringe.com. سۋرەت: ibirzha.kz.